Drew Nacino

Nagsama-sama ang mga lider ng iba’t ibang political party sa kamara upang ihayag ang kanilang suporta sa peace initiative ni Pangulong Ferdinand Marcos Junior.

Ayon kay House Secretary General Reginald “Reggie” Velasco, ang mga ginagawa ni Pangulong Marcos ay isang makasaysayan at malaking hakbang upang maabot ang inaasam na kapayapaan at pag-unlad ng bansa.

Kabilang anya sa mga nagpahayag ng suporta sa peace initiative ng pangulo sina Senior Deputy Speaker at Pampanga Rep. Aurelio “Dong” Gonzales; Majority Leader at Zamboanga City Rep. Mannix Dalipe at Agusan del Norte Rep. Jose “Joboy” Aquino II ng Lakas- CMD;

Pinangunahan ni House Speaker Martin Romualdez ang paghahain ng House Concurrent Resolution Numbers 19, 20, 21, at 22, na nagpapahayag ng pagsang-ayon sa inilabas na amnesty proclamation ni PBBM.

Saklaw ng proklamasyon ang mga miyembro ng Rebolusyonaryong Partido ng Manggagawa ng Pilipinas; CPP-NPA-NDF, MILF. at MNLF.

Nais naman ng leader ng kamara na mapagtibay nilang mga mambabatas ang mga resolusyon bago ang Christmas break ng kongreso.

Pina-plantsa na ang labanan sa bidding ng mga election technology company para sa 2025 Midterms elections.

Inihayag ito ni Senator Imee Marcos matapos kumpirmahin ng COMELEC na nakatakda na nilang hatulan kung papayagan pa ang Smartmatic na sumali sa bidding sa paparating na halalan.

Ayon kay Senador Marcos, bubuksan na ng pamahalaan ang pinto upang makalahok sa bidding ang iba pang IT provider, hindi lamang ang Smartmatic.

Gayunman, aminado si Senador Marcos na problema sa ngayon ay ang naturang kumpanya lang ang kuwalipikado sa ilalim ng dalawang probisyon ng batas.

Tiniyak ng senador na ginagawan na nila ng paraan para makalahok ang mga Pilipinong IT provider at hindi i-monopolyo ng ‘smartmagic’ ang halalan.

Binabaklas na rin aniya ang kontrata sa public bidding para sa procurement ng bagong vote counting machines sa 2025 polls.

Una nang inihayag ng poll body na maglalabas sila ng resolusyon kaugnay ng mga petisyon laban sa Smartmatic dahil sa kabiguan nitong maabot ang ‘minimum capabilities’ kaya’t nagkaroon umano ng iregularidad sa transmission at resibo ng mga boto noong May 2022 National elections.

Aminado ang Department of Social Welfare and Development (DSWD) na hindi sapat ang 3,000 peso food stamp credit ngayong patuloy na tumataas ang presyo ng mga bilihin, lalo ng pagkain.

Ito ang inihayag ni DSWD Secretary Rex Gatchalian sa kanyang pagharap sa budget briefing sa house appropriations committee.

Ayon kay Secretary Gatchalian, bagaman maaari lamang tumagal ng dalawang linggo, hindi talaga sapat ang 3,000 pesos subalit ito lamang ang kayang ibigay ng gobyerno dahil limitado ang pondo nito.

Ang naturang halaga ay napagdesisyunan ng DSWD batay sa datos ng PSA na ang food-poor ay kumikita lamang ng mas mababa sa 8,000 pesos kada buwan.

Tiniyak ng bagong talagang Land Transportation Office Chief at Assistant Secretary Vigor Mendoza na wala siyang sasayanging oras upang mabigyan ng maayos na serbisyo ang publiko.

Ito ang inihayag ni Asec. Mendoza matapos manumpa bilang bagong LTO Chief sa harap ni Transportation Secretary Jaime Bautista.

Ayon kay Atty. Mendoza, ipa-prayoridad ng L.T.O. Ang pagbibigay solusyon sa backlog sa plaka ng mga sasakyan at kakulangan ng driver license.

Umaasa rin ang opisyal na sa lalong madaling panahon ay maaayos ang mga dapat ayusin sa ahensya.

Suportado naman ni mendoza si Secretary Bautista at tatalima sa anumang utos ng kalihim sa L.T.O.

Naniniwala ang Department of Tourism na mas nakikilala na ng mundo, lalo ng mga dayuhang turista, ang iba’t ibang mga pasyalan sa Pilipinas.

Kasabay ng ikalawang State of the Nation Address ni Pangulong Ferdinand Marcos Junior, ipinagmalaki ng DOT na marami nang mga hakbang na ginawa ang bansa upang makamit ang pagiging tourism powerhouse ng Pilipinas sa Asya.

Kabilang na rito ang mga pagkilala na natanggap ng Pilipinas, tulad ng World’s Leading Beach Destination, World’s Leading Dive Destination at Asia’s Leading Tourist Attraction sa 2022 World Travel Awards.

Kinilala rin ang bansa bilang World’s Leading Country Destination sa Uzakrota Global Travel Awards sa Turkey at bilang emerging Muslim-friendly destination sa halal in Travel Awards 2023 sa Singapore.

Batay sa datos ng kagawaran, dumami ang mga turista noong 2022 sa 2.65 million foreign arrivals o lampas sa 1.7 million yearend projections.

Tiniyak ng National Grid Corporation of the Philippines ang buong suporta sa mga isinusulong na programa ni Pangulong Ferdinand Marcos Jr. para sa supply ng kuryente.

Ayon sa NGCP, kanilang ibubuhos lahat ng kakayanan upang matapos ang mga transmission project at bibilisan din ang pagpapagawa ng iba pang nakalinyang proyekto ng ahensya.

Kinilala naman ng NGCP Ang kahalagahan ng renewable energy sa bansa at huhugot ito ng suporta mula sa kanilang strategic partner na State Grid Corporation of China o SGCC.

Malaking bagay anila ang pakikipagtulungan sa SGCC upang maipasok ang renewable energy technology sa national grid.

Samantala, prayoridad ng NGCP na pagbutihin pa ang disaster resilience ng grid infrastructure.

Nagdeklara ng suporta sa gobyerno ang ilang transport group laban sa ikinakasang tigil-pasada ng grupong manibela kasabay ng ikalawang State of the Nation Address ni Pangulong Bongbong Marcos.

Pinangunahan ang aktibidad kontra transport strike ng magnificent 7, partikular ng pasang masada at iba pang pinaka-malalaking transport group sa bansa.

Nanindigan ang pasang masda na hindi dapat magpa-hostage ang gobyerno sa banta ng manibela na paparalisahin ang biyahe ng mga jeep sa ilang kalsada sa Metro Manila simula July 24 hanggang 26.

Ayon kay Pasang Masda President Roberto “Ka Obet’’ Martin, hindi sila patitinag sa isang tao lang at hindi makikiisa sa tigil pasada.

 tiniyak naman ni Land Transportation Franchising and Regulatory Board na handa nilang harangin ang mga jeepney driver at operator na lalahok sa transport strike.

Sasadsad na sa critical ang water level sa Magat Dam dahil sa kawalan ng ulan at tubig na dumadaloy sa malalaking ilog mula sa Nueva Vizcaya at Ifugao.

Ito ang kinumpirma ni Engineer Gileu Michael Dimoloy, Department Manager ng National Irrigation Administration-Magat River Integrated Irrigation System o NIA-MARIIS.

Batay anya sa datos ng PAGASA Hydro-Meteorology Division hanggang kaninang 6 am , bumulusok na sa 162.89 meters ang lebel ng tubig sa magat kumpara sa 163.60 meters kahapon.

Ibinabala ni Dimoloy na maaaring sumadsad na sa critical level na 160 meters ang tubig sa naturang dam sa mga susunod na araw kung hindi pa rin uulan.

Dahil dito, nagsagawa ng Rotational Irrigation ang NIA-MARIIS upang makatipid sa tubig kasabay ng panawagan sa mga magsasaka na gamitin nang maayos ang kanilang mga patubig upang hindi masayang.

Sa kabila nito, tiniyak ng opisyal na sapat pa rin ang supply ng tubig dahil karamihan sa mga magsasaka ay nakapag-ani na.

Implementasyon ng P40 na umento sahod, tuloy na tuloy na ayon sa DOLE.

Tuloy na ang P40 na umento sahod sa mga manggagawa sa pribadong sektor sa metro manila simula Hulyo 16 sa kabila ng apela na isinampa ng mga labor group.

Ayon sa Department of Labor and Employment (DOLE), inaasahang ipatutupad ng mga employer ang panibagong minimum wage

Kabilang sa naghain ng apela ang Alliance of Nationalist and Genuine Labor Organization at Labor Alliance for National Development noong Hulyo 3.

Iginiit ng mga labor group na dapat maging basehan ng minimum wage ang family living wage na nagkakahalaga ng P1,161 at hindi ang poverty threshold

Nito lamang Hunyo 26 nang aprubahan ng Regional Tripartite Wages and Productivity Board ang dagdag sahod sa Metro Manila o itinaas sa P610 mula sa kasalukuyang P570 epektibo simula sa Lunes.