DWIZ 882

Naki-simpatya si Vice President Sara Duterte sa mga tauhan ng OVP, na inimbitahan at kinwestyon ng mga kongresista sa nagpapatuloy na imbestigasyon kaugnay sa confidential funds ng kanyang tanggapan.

 Ito ay matapos tanungin, kung ano ang pinakamalaking hamon sa kanya ngayon bilang bise-presidente.

 Ayon kay VP Sara, hindi mga opisyal at pulitiko ang mga tauhan ng ovp, kaya’t hindi dapat ang mga ito naiipit sa usaping politikal.

 Pinabulaanan naman ng pangalawang pangulo na nasa Butuan City siya dahil nagtatago sa caraga region ang kanyang staff na si Gina Acosta.

 Muli namang iginiit ni VP Sara na ipinauubaya na niya ang desisyon ng 2025 budget ng OVP sa kamay ng kongreso, at sinabing tatanggapin niya kung magkano mang pondo ang ibigay sa tanggapan.  – Sa panulat ni Laica Cuevas

Nasermunan ni Deputy House Majority Leader Erwin Tulfo ang Employers Confederation of the Philippines matapos ang pagtutol nito sa panukalang batas na oobligahin ang mga pribadong kumpanya na mag-hire ng mga persons with disabilities.

Batay sa house bill 8941 na inihain ni Cong. Tulfo ng ACT-CIS partylist at mga kasamang sina Rep. Edvic Yap, Jocelyn Tulfo, Eric Yap, Ralph Tulfo at Agri-partylist Rep. Wilbert Lee, kailangang mag-hire ng 2% ng workforce ng isang kumpanya na may 1,000 employees.

Kailangan ding mag-hire ng 1% ng workforce ang mga small businesses na mayroong 100 o mas kaunting empleyado.

Hindi pinalagpas ni Congressman Tulfo ang tila pagkontra ng resource person ECOP sa nasabing panukalang batas makaraang igiit ng tagapagsalita ng grupo na dagdag gastos sa employer kung oobligahing mag-hire ng PWD.

Ipinunto naman ng mambabatas na mag-ha-hire lamang ang employer ng PWD na kakayanin ang trabahong ibibigay at halimbawa nito ang may kapansanan sa paglakad na dapat ilagay sa front desk o office o mga I.T.

Walang katiyakang mabibigyan ng tig-1,000 pesos na buwanang social pension ang may 6,000 waitlisted indigent senior citizens dahil sa kawalan ng pondo para rito sa susunod na taon.

Ito ang inamin ni Senator Imee Marcos sa deliberasyon ng 2025 proposed budget ng department of social welfare and development.

Ayon sa presidential sister, posibleng umakyat sa 800,000 ang waitlisted indigent senior citizen.

Sa kanyang interpellation, ipinarating ni Senador Loren Legarda ang reklamo ng ilang lolo’t lola na hanggang ngayon ay hindi pa nakakatanggap ng cash assistance na mina-mandato sa ilalim ng expanded senior citizens act of 2022.

Kinumpirma naman ito ng DSWD sa pamamagitan ni marcos kung saan noong 2023 pa lamang anya ay 490,000 senior citizens ang hindi nakatanggap ng pensyon dahil sa problema sa budget.

Bukod naman sa mga waitlisted o mga senior citizen na hindi pa nakakatanggap ng pension ay mayroon ding mga nakatanggap na pero natigil.

Kinumpirma ni President-elect Donald Trump na plano niyang magdeklara ng national emergency sa border security at gamitin ang US Military para magsagawa ng mass deportation ng mga undocumented migrants.

Ipinangako ni Trump na i-deport ang milyun-milyong indibidwal at patatagin ang border ng Mexico matapos ang mga naitala na bilang ng mga migrante na ilegal na tumawid sa panahon ng administrasyon ni Pangulong Joe Biden.

Bago ito, una nang sinabi ni Philippine Ambassador to the United States Jose Manuel Romualdez na magiging safe ang mga Filipino migrants kahit ipatupad ang malawakang deportasyon.

Nasa 200,000 undocumented Filipinos na rin aniya kasi ang naghain na ng petisyon para sa permanent residency status.

Pinabulaanan muli ng Philippine National Police ang mga ulat na mayroong ipinatupad na quota system sa pagpatay o pag-aresto ng pulisya hinggil sa war on drugs ng administrasyong Duterte.

Ayon kay PNP Spokesperson Brigadier General Jean Fajardo, wala siyang maaalala kaugnay sa nasabing usapin kahit pa nuong siya pa lamang ay station chief sa kasagsagan ng Oplan Double Barrel.

Bukod pa rito, hindi rin anya siya nakatanggap ng kautusan na may quota sa pag-aresto at pagpatay sa mga drug suspects.

Nagpahiwatig naman si BGen. Fajardo na karamihan sa mga pulis na nasa estasyon ay nais magpa-impress sa mga superiors nito.

Gayunman, ipinunto ng PNP official na kinakailangan nilang magsumite ng mga ulat hinggil sa bilang ng kabahayan na kanilang bibisitahin, pati na rin ang mga drug pusher at mga user na kanilang binisita bunsod ng pagpapatupad ng Oplan Double Barrel.

Isinusulong ng Department of Education ang pagpapatupad ng alternative delivery modes sa pagtuturo sa mga eskwelahang naapektuhan ng magkakasunod na bagyo.

Ayon kay Education Secretary Sonny Angara, mas mainam na gumamit ng learning delivery methods upang mas makasabay sa lesson o aralin ang mga estudyante.

Inatasan din ng kalihim ang mga DEPED field office na makipag-ugnayan sa local government units para sa clean-up operations, minor repairs, at sa paglalaan ng temporary learning spaces kung kinakailangan.

Pinagsusumite rin ng kalihim ang mga Regional Field Office ng DEPED ng daily situation reports hinggil sa epekto ng bagyo sa mga paaralan at mga mag-aaral.

Inatasan din ni Angara ang kanilang school disaster risk reduction teams na magsumite ng rapid assessment sa pinsalang idinulot ng bagyo sa mga paaralan gamit ang kanilang radar application o offline template.

Lubos na maaapektuhan ang ekonomiya ng bansa sa pagbabalik-white house ni US President-elect Donald Trump.

 Ito ayon kina Capital Economics Deputy Chief Emerging Markets Economist Jason Tuvey and Assistant Economist Lily Millard, kabilang ang Pilipinas sa may may matataas na cash remittances na siya namang nagpapalakas sa buying powers ng publiko at domestic economy.

Una rito, inihayag ni US President-elect Trump na handa siyang ideklara bilang national emergency ang mass deportation campaign ng kanyang administrasyon para sa mga illegal immigrant.

Bukod pa rito, bukas din si Trump na gamitan ng military assets ang nasabing in insyatiba.  – Sa panulat ni Kat Gonzales

Opisyal nang idineklara ng PAGASA ang pagsisimula ng Northeast monsoon o Amihan season.

Ito’y matapos maobserbahan ang paglakas ng northeasterly winds sa hilagang bahagi ng Luzon, matapos ang pananalasa ng bagyong Pepito.

Ayon pa sa state weather bureau, inaasahan din ang sunod-sunod na pagbugso ng northeasterly winds sa susunod na dalawang linggo.

Kaugnay nito, asahan na ang malamig na panahon, na titindi pa sa mga susunod na araw.

Hinikayat ng Malakanyang ang lahat ng ahensya ng pamahalaan na iwasan ang mga marangyang pagdiriwang ngayong pasko.

Ayon kay Executive Sec. Lucas Bersamin, alinsunod sa panawagan ni Pangulong Ferdinand Marcos Jr., na bilang pakikiisa sa milyun-milyong Pilipino ang patuloy na nagdadalamhati dahil sa mga buhay, tahanan, at kabuhayang nawala bunsod ng pitong bagyong nanalasa sa bansa.

Hindi na kailangang magpalabas ng opisyal na direktiba sapagka’t naniniwala aniya sila sa kabutihang-loob ng mga kapwa nila kawani ng gobyerno at kumpiyansa itong kusang magpapatupad ang mga ito ng pagtitipid sa kanilang mga pagdiriwang.

Dagdag pa ng palace official, na nais din ng palasyo na ang anumang matitipid mula sa mas payak na pagdiriwang ay i-donate para sa mga kababayang naapektuhan ng kalamidad. –  Sa ulat ni Gilbert Perdez (Patrol 13)

Iginiit ni Pangulong Ferdinand Marcos jr., na malaki ang naitulong ng Enhanced Defense Cooperation Agreement (EDCA) sites sa bansa, partikular sa panahon ng kalamidad.

Sa kanilang pagpupulong ni U.S. Defense Sec. Lloyd Austin sa Malacañang, binigyang diin ng pangulo na mas nagawa ng pamahalaan ng pilipinas ang kanilang trabaho sa tulong ng EDCA sites at ng mga tropa ng amerika.

Ayon pa kay PBBM, nagsisilbi ring staging area ang EDCA sites para sa pre-positioning ng assets, mga kagamitan at relief supplies.

Maliban dito, sa EDCA sites din aniya nanggagaling ang mga air asset na ginagamit para sa pagdadala ng relief goods at pagtaya sa pinsalang iniwan ng mga nagdaang bagyo.

Dagdag pa ni PBBM, maraming mga kalsada ang sarado at hindi madaanan dahil sa mga pagbaha at landslides, kaya’t tanging mga helicopter lamang mula sa EDCA sites ang nakakarating sa mga isolated na barangay.