DWIZ 882

Pinawi ng Department of Health ang pangamba ng mga Davaoeño matapos maitala ang dalawang kaso ng monkey pox o Mpox sa  Davao City.

Ayon sa DOH, ang dalawang kaso ng Mpox na naiulat sa davao ay Clade II variant, nangangahulugang, milder o hindi ito malalang variant ng nasabing sakit.

Nabatid na isa sa dalawang biktima ng Mpox sa davao ay namatay, ngunit nilinaw ng DOH na hindi ang naturang virus ang sanhi ng pagkamatay nito.

Tiniyak din ng Davao City Health Office sa publiko na patuloy nilang mino-monitor ang kaso ng Mpox sa kanilang lugar, lalo na ang mga “close contact” ng dalawang tinamaan ng nabanggit na sakit.—sa panulat ni John Riz Calata

Sisimulan na bukas ng Commission on Elections ang pagpapadala ng mga balota sa iba’t ibang bahagi ng bansa.

Ayon kay  COMELEC Chairman George Erwin Garcia, direktang ipadadala ang mga balota sa City o Municipal Treasurers’ Offices.

Aniya, unang makatatanggap ng nasabing election material ang mga malalayong lugar sa bansa, partikular na ang Bangsamoro Autonomous Region in Muslim Mindanao, Caraga region, Zamboanga Peninsula, at Batanes.

Sinabi ni Chairman Garcia na 95% na ng kabuuang bilang ng mga inimprentang balota ang sumailalim sa verification process.

Target ng COMELEC na maipadala ang lahat ng mga balota bago matapos ang Abril.—sa panulat ni John Riz Calata

Nanawagan si Senior Deputy Speaker Aurelio “Dong” Gonzales Junior ng isang pambansang hakbang para protektahan ang mga botante mula sa digital deception, kasunod ng ulat tungkol sa paggamit ng mga pekeng social media accounts upang ipagtanggol si dating Pangulong Rodrigo Duterte at manipulahin ang mga isyu na maaaring makaapekto sa resulta ng 2025 midterm elections.

Ayon sa House Leader, dapat ipagtanggol ang mga mamamayang Filipino hindi lamang mula sa “Guns and goons” Kundi pati na rin sa paglaganap ng mga ghost accounts sa kanilang social media feeds bitbit ang propaganda at panlilinlang.

Lumabas anya sa ulat ng Reuters na halos 1/3 ng mga social media account na nagpo-post tungkol sa kaso ni Duterte sa International Criminal Court ay peke.

Nagbabala naman ang mambabatas mula Pampanga na ang patuloy na pagkalat ng digital manipulation ay isang seryosong banta sa integridad ng proseso ng halalan sa bansa.—sa panulat ni Kat Gonzales

Kinumpirma ang International Criminal Court Chief Prosecutor na nagpapatuloy pa rin ang imbestigasyon ng nasabing korte sa sinasabing madugong war on drugs ng Duterte administration.

Ayon kay ICC Prosecutor Khan, layon ng prosekusyon na suriin ang anumang mga bagong ebidensya na nakolekta sa nagpapatuloy na imbestigasyon.

Batay sa mga naunang dokumento, ilang itinuturing na suspek din ang iniimbestigahan ng ICC kaugnay sa nationwide drug war at sinasabing Davao Death Squad killings.

Samantala, sinabi naman ni ICC accredited Lawyer Gilbert Andres, posibleng maharap pa si dating Pangulong Rodrigo Duterte sa karagdagang kaso ng crimes against humanity dahil sa panggagahasa at torture.

Nabatid na sa original application para sa arrest warrant ng dating pangulo, binanggit ng ICC Prosecutor ang 45 acts of murder; 4 na torture at 3 rape bilang “representative sample of the multiple acts of violence” na posibleng bumubuo sa kasong crimes against humanity ng dating presidente. —sa panulat ni Kat Gonzales

Umakyat na sa halos 400 ang kaso ng aksidente sa kalsada sa nagdaang Semana Santa.
Batay sa pinakahuling datos  ng Department of Health, umabot na sa 383 ang bilang ng mga naaksidente nuong Holy Week, mas mababa ng 32% kumpara nuong nakaraang taon.

Sa kabuuang bilang 296 ang kaso na may kinalaman sa motorsiklo habang nasa mahigit 300 naman ang hindi ang hindi gumamit ng mga safety gear tulad ng helmet at seatbelt.

31 driver naman ang nagmaneho ng lasing o nasa ilalim ng impluwensya ng alak at 4 katao na ang naiulat na namatay.

Dahil dito, pinaalalahanan ng DOH ang mga motorista na iwasang uminom ng alak at siguruhing kumpleto ang tulog bago magmaneho upang maiwasan ang aksidente sa kalsada. —sa panulat ni Kat Gonzales

Nakatakda nang ilabas ng Philippine Postal Corporation ang mga postcard na tampok ang ganda ng Pilipinas at galing ng Pilipino.

Tampok sa isa sa mga ilalabas na postcard ng PhlPost si  Two-Time Gold Medalist Carlos Yulo.

Dahil dito, iniimbitahan ng PhlPost, katuwang ng Philippine Philatelic Federation Inc. ang publiko na dumalo sa National Philatelic Exhibition o NAPEX 2025, kung saan makikita ang mga bagong stamp.

Isasagawa ang nasabing event sa April 23 hanggang 25 sa  Lucky Chinatown Mall, Binondo, Manila.—sa panulat ni John Riz Calata

Iniimbestigahan na ng Department of Education ang naganap na insidente sa Laua-An, Antique, kung saan lantarang ipinag-utos ng isang Principal sa mga estudyante na hubarin ang mga toga nito sa kasagsagan ng Senior High School Graduation ceremony sa  Col. Ruperto Abellon National School.

Ayon sa DEPED, ikinalungkot nito ang nangyari dahil sa halip na maging panahon ito ng pagdiriwang para sa mga estudyante ay nagdulot ito ng pagkabahala sa mga mag-aaral at kanilang pamilya.

Sa nag-viral na video, sinabi ng Principal ng nasabing paaralan na si Venus Divinia Nietes na paglabag sa polisiya ng DEPED ang pagsuot ng toga sa graduation at nagbanta na tatawag ito ng pulis kapag hindi hinubad ng mga graduates ang kanilang mga toga.

Pinasinungalingan naman ito ng DEPED at nilinaw na hindi ipinagbabawal ang pagsusuot ng graduation robes sa mga  end-of-school-year rites.—sa panulat ni John Riz Calata

Planong ng Land Transportation Franchising and Regulatory Board na maglabas ng show cause order sa mga bus operator ng mga driver na nagpositibo sa paggamit ng iligal na droga nitong Semana Santa.

Ayon kay LTFRB Chairman Teofilo Guadiz III, dapat ipaliwanag ng mga bus operator kung bakit hindi dapat parusahan ang mga ito, sa kabila ng pagkakaroon ng mga driver na nag-positibo sa paggamit ng droga.

Dagdag pa ni Chairman Guadiz,  banta sa kaligtasan ng mga pasahero ang pagkakaroon ng driver na nasa impluwensya ng iligal na droga.

Batay sa isinagawang Oplan: Harabas ng Philippine Drug Enforcement Agency noong April 16, nagpositibo ang 84 na Public Utility Vehicle Driver; kabilang dito ang 13 Bus Driver, 19 na Jeepney Driver, at 47 Tricycle Driver.—sa panulat ni John Riz Calata