Guia Rafael

Kung hindi ka pa committed sa isang relasyon, makipaghiwalay ka na lang. Hindi ‘yong maghahanap ka pa ng iba habang ikaw ay may jowa, katulad ng isang boyfriend na nahuli ng kaniyang girlfriend na nakikipag-meet up at nanliligaw sa ibang babae.

Kung ano ang kinahinatnan ng lalaki, eto.

Sa isang video, nakuhanan kung paano nabisto ang isang lalaking may girlfriend na pero nakikipagkita pa sa ibang babae. Ang mas matindi pa rito ay nililigawan niya pa ito!

Pero hindi ito isang tipikal na kwento ng love triangle, dahil ang dalawang babaeng involved sa kwento ay nagsabwatan!

Nang madiskubre kasi ng 26-anyos na si Joy Aninang na mayroon palang girlfriend ang kaniyang suitor na si ‘Mark’, agad niyang inabisuhan ang jowa nito na itinago sa pangalang ‘Jenny’ na mayroong ginagawang kalokohan ang lalaki.

Nakipagkita si Joy sa kaniyang manliligaw sa isang foodcourt sa isang mall. Habang magkasama ang dalawa at nagkukumustahan ay siya namang cue ng legal girlfriend na si Jenny para pumasok sa eksena.

Marahil ay dahil sa kahihiyan, sinabi ni Joy sa isang pahayag na namula raw ang mukha ni Mark at hindi makatingin ng diretso sa kaniya.

Pinagsabihan niya pa ito na huwag mag-walkout kundi ay mag-eeskandalo sila ni Jenny.

Ibinahagi rin ni joy na sa kaparehong araw na ‘yon ay nakipaghiwalay din si Jenny kay Mark.

Samantala, pagkatapos ng insidente ay naging magkaibigan daw sila Joy at Jenny at nagkakausap pa noon sa social media.

Ikaw, tutularan mo rin ba ang ginawa ni Joy kung malalagay ka sa kaparehong posisyon?

Para sa mga babad sa trabaho riyan, ingat-ingat at huwag kalimutan ang sarili dahil baka kalusugan niyo ang maging kapalit ng sobrang kasipagan niyo. Pero mayroon nga bang ambag ang pagiging subsob sa trabaho sa pagputok ng ugat sa utak?

Ang buong kwento, alamin.

Nitong nakaraang Nobyembre lang ay na-comatose at sumailalim sa isang operasyon ang negosyante na si Erika Duran dahil sa biglaang pagputok ng ugat sa kaniyang utak.

Nakaranas daw muna siya ng seizure at nakita na lang na tila wala ng malay bago ito dinala sa ICU at tinubuhan.

Pero bago ‘yon ay matagal na palang nakakaramdam ng pagsakit ng ulo si Erika. Hinala niya, resulta ito ng stress at pagiging workaholic niya.

Dahil dito ay dumaan sa isang open brain surgery si Erika para tanggalin ang namuong dugo sa ugat ng kaniyang utak.

Nang dalhin sa ospital ay napag-alaman na mayroon palang Arteriovenous Malformations o AVM si Erika na ayon sa Cerebrovascular Neurosurgeon na si GV T. Liabres ay ang pagkakaroon ng abnormal connection sa artery at utak.

Sa isang pahayag, sinabi ni Dr. Liabres na ang dugo na pina-pump ng ating puso ay dumederetso rin sa ating utak at dumadaan sa arteries. Pero sa kaso ng AVM, naghahalo-halo ang daloy ng dugo at may tyansa na mauwi sa rupture.

May posibilidad din daw na ang stress at pagpupuyat ay mayroong kontribusyon sa pressure sa ugat sa utak kung kaya ito pumutok.

Bukod sa sakit na inabot niya rito ay halos wala rin daw maalala si Erika matapos ang kaniyang operasyon.

Samantala, nagpapahinga muna si Erika mula sa trabaho at tuluy-tuloy pa ring nagpapagaling.

Ikaw, workaholic ka rin ba? Hinay-hinay.

Tila nakuyog sa kaniyang hearing ang lalaking nahaharap sa kasong murder matapos mag-eskandalo at sumugod sa gitna ng courtroom ang ilang mga kaanak ng biktima.

Kung ano ang buong kwento, eto.

Enero nitong nakaraang taon nang barilin si Alianna Farfan sa loob mismo ng kaniyang kwarto at ang hinihinalang salarin ay ang kaniyang nobyo na si Alexander Ortiz.

Ayon sa court records, binawian daw ng buhay si Farfan matapos barilin ng kaniyang nobyo at pagkatapos daw ng insidente sa kwarto ng biktima ay nakita si Ortiz na lumabas mula sa bintana nito.

Dahil dito ay sinampahan ng kasong 1^st degree murder at inaresto noong February 2024 si Ortiz ngunit naghain ito ng not guilty plea noong marso.

Ngunit nito lamang Enero ay nagkaroon ng hearing si Ortiz sa Bernalillo County Courthouse kung saan makikita sa isang footage kung paano siya sinugod ng ilang kaanak ni Farfan.

Sa kalagitnaan ng hearing ay bigla na lang tinalon ng tiyuhin ng biktima na si Carlos Lucero ang isang barrier at sinugod ng suntok si Ortiz at nagtamo ng mga sugat pati ang mga umawat na pulis. Bukod sa kaniya ay mayroon pang isang babae at isang lalaki na nakisali sa tila kuyog na nangyari.

Gumamit naman ng taser gun ang pulis upang pigilan ang mga sangkot sa insidente kung saan naaresto si Lucero at ang dalawa pang mga indibidwal na sumunod sa kaniya.

Samantala, biglaan mang naaresto ay hindi raw pinagsisihan ni Lucero ang ginawa niya sa akusado.

Ikaw, ano ang gagawin mo kung ikaw ang nasa posisyon ng mga kaanak ng biktima?

Sinong hindi kakabahan kung bigla na lang may dumating na masamang loob sa bangko? Bukod sa takot para sa sarili mong buhay ay matatakot ka rin na baka mawala ang pinaghirapan mong pera.

Pero hindi kaya aatras ang takot mo kung malaman mo na water gun pala ang armas ng masamang loob na iyon katulad ng isang korean man na nanloob ng isang bangko?

Kung magkano ang nasabat ng lalaki, eto.

Sa isang CCTV footage na nakuhanan sa isang bangko sa Gijang Busan, South Korea, makikita ang pagpasok ng isang lalaki na mayroon pang dalang attache case.

Kung titignan ay iisipin mo na mayroon itong dalang malaking halaga ng pera na kaniyang idedeposit.

Pero matapos ilapag sa sahig ang dalang bag ay sandali itong nagpalakad-lakad bago nagdeklara ng holdap.

Itinutok ng lalaki ang kaniyang baril na nakabalot sa isang itim na plastik sa mga customer at empleyado na siya namang sumindak sa mga ito.

Gusto pa raw sanang pasukin ng suspek ang opisina ng branch manager pero sa kabutihang palad ay naka lock ito, kung kaya naman inutusan niya na lang ang isang empleyado na ilagay sa kaniyang bag ang pera.

Ngunit nang paluhurin ng suspek ang mga tao sa loob ng bangko ay ang kaniya namang pagbagsak matapos siyang dambain ng isang lalaki hanggang sa matumba ito sa sahig.

Kinuha na yon ng mga empleyado bilang oportunidad at tulong-tulong na dinaganan ang suspek hanggang sa dumating na ang saklolo.

Nang inspeksyunin naman ng mga pulis ang dalang weapon ng lalaki ay napag-alaman na isa lang pala itong water gun na hugis dinosaur.

Hawak naman na ng mga pulis ang lalaki at naghanda ng certificate upang bigyang parangal ang matapang na lalaki sa bangko.

Kung magkano naman ang hiningi ng lalaki sa kaniyang failed roberry attempt? 50,000 Korean Won lang naman o mahigit 2,000 Pesos.

Samantala, hindi na idinetalye ng mga pulis kung bakit nagawa ng suspek na manloob ng bangko.

Ikaw, anong masasabi mo sa kwento na ito? Aatras din ba ang kaba mo?

Sa isang branch ng Walmart malapit sa Detroit kung saan maraming nahuling nang-shoplift, magkakaroon ng libreng carwash pagdating ng spring season.

Kung bakit? Alamin?

Ang Judge ng Genesee County District Court na si Judge Jeffrey Clothier, nagpataw kamakailan lang ng parusa sa mga nahuling nangshoplift sa branch ng walmart sa grand blanc township.

Ang parusa? Hindi pagkakakulong o pagbabayad ng multa kundi paglilinis ng mga sasakyan sa parking lot ng Walmart!

Ayon sa Judge, aabot ng halos isandaan katao ang maglilinis ng mga sasakyan nang libre.

Sa isang pahayag sinabi ni Judge Clothier na paraan niya raw ito para pigilin ang mga masasamang loob sa pagnanakaw sa nasabing store.

Nagpakita pa ng malawak na pag-unawa ang Judge at sinabi na humaharap lang sa hirap ng buhay ang ibang tao na nagawang magnakaw at hindi naman talaga masasamang tao.

Gayunpaman, nagpaalala pa rin ito na ang batas ay batas, at dapat itong sundin. Dahil kung hindi ay mahaharap ka sa kaukulang reklamo.

Samantala, sa spring season sa March hanggang April ay magsasagawa ng community service na free carwash ang mga shoplifter sa mga weekend events sa Walmart.

Ikaw, sa tingin mo ba ay sapat na ang parusa na ito?

Tapos na ang new year pero mayroon pa ring nabiktima ng mga mapaminsalang mga paputok, katulad ng isang batang babae na tumilapon dahil sa malakas na impact ngpagsabog nito.

Kung ano ang kinahantungan ng bata, eto.

Sa isang footage na nakuhanan sa isang kalsada sa Chongqing, China, makikita ang isang 12-anyos na batang babae na nakaupo sa harapan ng isang manhole na mayroong katabing dalawa pang sewers.

Maya-maya lang ay tumayo ang bata upang tumakbo, pero hindi pa man ito nakakalayo ay sumabog na ang paputok na sinindihan pala ng bata sa ibabaw ng takip ng mga manhole.

Napuno ng usok ang pinangyarihan ng insidente at makikita pa ang pagtalsik ng bata sa ere na nagdulot sa napakasakit na pagbagsak nito sa semento.

Ayon sa mga otoridad, sumabog ang sewer gas na nasa ilalim ng takip ng drainage dahil sa paputok kung kaya naman ganoon na lang kalakas ang impact nito.

Samantala, sinabi rin ng mga otoridad na nasa maayos na kalagayan na ang bata at patuloy na nagpapagaling dahil sa mga tinamo nitong bali sa katawan at paso sa ulo.

Ikaw, anong masasabi mo sa kalunus-lunos na sinapit ng bata?

Sa liit ng aso na si Tiger, hindi mo aakalain na isa pala itong K-9 dog at naging star of the show pa dahil kabilang ito sa mga na-promote kasama ng mahigit 200 mga pulis.

Ang nakakagigil sa ka-cute-an na kwento, eto.

Nitong Febaruay 6 ay ginanap sa parade ground ng Rizal Police Provincial Office ang nationwide oath-taking upang bigyang parangal ang mga 2^nd-level uniformed personnel.

Kabilang sa mga ito ang K9-dog ng Rizal PPO na shih tzu-poodle mix na si Tiger. Palagi raw itong kasama ng mga pulis sa tuwing tumutugon sa tawag ng serbisyo.

Naghatid ng karagdagang aliw sa selebrasyon si Tiger at naging main event pa dahil na-promote lang naman ang matapang na police dog na ito bilang Corporal!

Ang mas nakatutuwa pa riyan ay kadalasan malalaking breeds ng aso ang mga nagiging K-9 dogs kung kaya naman hindi mo aakalain na ang small but terrible na si tiger ay mayroon palang noble duties.

Ang nasabing event ay isinagawa sa buong bansa at tinatayang mahigit 33,000 mga pulis ang na-promote sa mas mataas na ranggo na ayon kay PNP Chief Gen. Rommel Francisco D. Marbil ay mga patunay ng kanilang commitment sa kanilang responsibilidad.

Ikaw, nanggigil ka rin ba sa achiever dog na ito?

Ganon na lang ang pagkawindang ng fur parent ng chihuahua na si Tiny nang malaman na mayroong daga sa tulugan ng kaniyang mga alaga at si Tiny pa mismo ang nagdala rito.

Kung bakit iyon nagawa ni Tiny, eto.

Ang fur parent na si Erwin Estoque mula Cabanatuan, Nueva Ecija, ginulat ng kaniyang alaga na si Tiny dahil bigla na lang itong tila na-attach sa isang daga.

Nagtaka pa raw siya noong una kung bakit mayroong kasama na kulay itim na tuta si Tiny, at nang tingnan itong maigi ay napagtanto niya na hindi pala ito kabilang sa mga ipinanganak ng kaniyang aso kundi isa palang daga.

Sa isang pahayag, sinabi ni Erwin na mas masipag pa raw manghuli ng mga daga si Tiny kaysa sa alaga nilang pusa dahil ayaw na ayaw daw talaga nito sa mga daga.

Pero kakaiba ang mga ikinilos ni tiny nang subukang alisin ni Erwin ang daga sa loob ng kahon kung nasaan si tiny at ang kaniyang mga tuta.

Pumalag si Tiny at nagalit pa raw! Kung kaya naman kumuha na lang ng tongs si Erwin para ihiwalay ang daga mula sa kaniyang mga alaga.

Ipinaliwanag naman ng beterinaryo na si Dr. Sean Javier kung bakit ito nangyari sa aso.

Sinabi niya na hirap daw ang mga mommy dogs na matukoy kung sino ang kanilang mga baby, at baka rin daw palagiang bumibisita kina Tiny ang daga kung kaya naging kaamoy na ito ng mga tuta ay napagkamalan niya ito na isa sa kaniyang mga anak.

Samantala, mabuti na lamang at nagawang alisin ni Erwin ang daga kahit pa nagalit si Tiny dahil maaari raw pala itong magdulot ng iba’t ibang uri ng sakit katulad ng Leptospirosis at Rocky Mountain Spotted Fever.

Ikaw, ano ang gagawin mo kung gulatin ka rin ng alaga mong hayop sa ganitong paraan?

Hanap mo ba ay work benefits na hindi ikakaltas sa sahod mo? Kung mahilig kang uminom, baka magka-interes ka sa kompanya na ito sa osaka na nagbibigay ng hangover leaves.

Kung ano ang dahilan para gawin ito ng CEO, eto.

Sa Midoribashi, Osaka, mayroong maliit na tech company na tinatawag na Trust Ring Co., Ltd. Pero huwag itong iismolin dahil generous ang CEO nito.

Kung bakit? Nagdadala lang naman ito ng alak sa kompanya at pinapayagan ang mga empleyado na uminom sa oras ng trabaho.

Hindi pa diyan nagtatapos ang saya sa nasabing kompanya dahil mayroon ding hangover leaves ang mga empleyado!

Weird man tignan, useful naman ito para sa mga empleyado. Sinabi ng isang female employee sa local media na mas mabuting gamitin ang hangover leave para klaro ang isip bago bumalik sa trabaho.

Pero bakit nga ba ito pinahihintulitan ng kanilang boss?

Iyon ay dahil hindi niya raw kayang magpasahod ng mataas.

Dahil sa hirap na sumabay sa mga malalaking kompanya na mayroong mataas na salary offers, nag-isip na lang siya ng unusual benefits para maka-attract ng possible applicants.

Sinabi pa ng ceo na dapat ay maging creative rin ang mga maliliit na negosyo sa pag-iisip ng kakaibang benefits para maka-attract ng mga aplikante.

Ikaw, interesado ka ba na mag-apply sa kompanya na ito?

Sa dami ng mga nauusong gimmicks ng mga expecting parents sa social media para mag-gender reveal, ang mag-asawa na ito pinili ang napakasimple pero saksakan ng witty na paraan para alamin ang gender ng kanilang baby.

Kung paano nila ito ginawa? Eto.

Para sa mga magulang, lalo na sa first time parents, mahalagang event sa kanilang buhay na malaman kung ano nga ba ang magiging gender ng kanilang baby.

Kung kaya naman kahit na nagtitipid, gumawa ng paraan ang content creator mula sa Binmaley, Pangasinan na si Banong delos Angeles para i-celebrate ang gender reveal ng kanilang unang anak ng kaniyang misis.

Sa isang pahayag, sinabi ni Banong na para hindi sila masyadong mapagastos, naisip niya na isabay ang gender reveal party sa kanilang new year’s celebration.

Ang noo’y expecting dad, inilabas ang kaniyang creativity at wit para sa kanilang first baby.

Kung saan ginawa ang gender reveal party? Sa kanilang bahay, partikular na sa CR. Kung bakit? Iyon ay dahil hindi pinata o confetti poppers ang main tool ni Banong para i-reveal ang kasarian ng kanilang anak, kundi toilet flush!

Para gawin pang mas special ang main event, nilagyan nila ng pink at blue na lobo ang banyo at metallic curtains.

Sinabi rin ni Banong na gumamit daw siya ng ink ng printer para kumulay ang tubig kapag pinindot na ang flush.

Ang resulta? Kulay asul ang tubig na inilabas ng toilet bowl, kung kaya naman pinlano ni banong na isunod ang pangalan ng kanilang anak sa tunay niyang pangalan na Urbano at tatawagin itong Sixto dahil ito na ang pang-anim na Urbano sa kanilang pamilya.

Simple man ang naging selebrasyon, suportado naman ito ng kaniyang asawa at ng kanilang pamilya, at paniguradong isa ito sa mga hindi malilimutang milestone sa buhay nila ng kaniyang misis lalo na at malayo ito sa ordinaryo.

Ikaw, kaya mo bang tapatan ang napaka unique na gender reveal gimmik na ito?