Hya Ludivico

Dapat na maitaas ang sahod at maiayos ang working condition ng mga nurse sa Pilipinas.

 Ito ang binigyang diin ni Maristela Abenojar, Pangulo ng Filipino Nurses United, upang matugunan ang kakulangan ng mga nurse sa bansa.

 Sa katunayan aniya ay nasa 570 pesos ang arawang sahod ng mga nurse na nasa private hospital sa metro manila at  mababa pa aniya sa nasabing halaga ang natatanggap na sahod ng mga nasa probinsya.

 Sinabi pa ni abenojar na hindi makatarungan ang tinatanggap na sahod ng mga nurse sa bansa, kung saan tila hindi aniya sila mga propesyonal.

 Iginiit pa ni abenojar na ang Pilipinas ang may pinakamababang pasahod sa mga nurse sa buong asya.

 Umaasa naman ang pangulo ng Filipino Nurses United na maitaas  sa 50,000 ang entry salary ng mga nurse sa Pilipinas.

Kasabay ng National Hemophilia Awareness Month, pinayuhan ng Department of Health ang mga indibidwal na posibleng nakararanas ng hemophilia na magpatingin sa doktor.

 Hinikayat din nito ang mga mamamayan na magpakonsulta sa mga  primary care at health centers, gayundin sa health support groups.

 Paliwanag ni Dr. Marielle Lois Manuel, Medical Specialist ng Philippine Blood Center, namamana ang nasabing sakit kaya’t mainam na magpatingin ang mga may family history ng bleeding disorder.

 Ang hemophilia ay isang bihirang sakit, kung saan ang dugo ay hindi normal na namumuo dahil sa hindi sapat na blood-clotting proteins.

 Para sa mga nais magpakonsulta, mayroong DOH Hemophilia treatment centers sa Baguio General Hospital and Medical Center; Region 1 Medical Center; Jose B. Lingad Memorial Regional Hospital; Batangas Medical Hospital; Ospital ng Palawan; Bicol Regional Training and Teaching Hospital; Vicente Sotto Memorial Medical Center; at Western Visayas Medical Center.

 Gayundin sa Zamboanga City Medical Center; Northern Mindanao Medical Center; Southern Philippines Medical Center; Philippine Children’s Medical Center; National Children’s Medical Center at Jose R. Reyes Memorial Medical Center.

Nanawagan na ng tulong sa pamahalaan ang Occidental Mindoro dahil sa problema sa kuryente sa lalawigan.

Sa panayam ng DWIZ, sinabi ni Occidental Mindoro Vice Governor Diana Apigo Tayag, na nakararanas ng mahabang rotational brownouts ang lalawigan dahil sa power crisis, kung saan apat na oras na lamang aniya silang mayroong kuryente.

Iginiit pa nito na maging ang mga paaralan at pagamutan sa Occidental Mindoro ay apektado na ng power crisis.

Kaugnay nito, sinabi ng bise gobernador na lumiham na sila sa National Power Corporation (NAPOCOR) upang matugunan ang nasabing problema sa lalawigan.

Paliwanag pa ni Vice Governor Tayag na layon nang idineklarang state of calamity sa Occidental Mindoro na magamit ang calamity fund upang maipagpatuloy ang serbisyo-publiko partikular sa mga ospital.

Isang malaking sakuna ang nararanasang krisis sa kuryente sa Occidental Mindoro.

 Ito ang sinabi sa DWIZ ni Occidental Mindoro Vice Governor Diana Apigo Tayag, kasunod ng naging epekto sa lalawigan ng kakulangan sa supply ng kuryente.

 Aminado naman ang bise gobernador ng Occidental Mindoro na hindi sapat ang kanilang calamity fund para tugunan ang power crisis.

Nananatili sa 80 katao ang nasawi sa Pilipinas dahil sa pagkalunod nitong Semana Santa.

 Ayon kay PNP Spokesperson Police Col. Jean Fajardo na mayorya ng mga nasawi ay nagmula sa Calabarzon na may 19, 14 sa Ilocos at 10 sa Central Luzon.

 Mula rin sa nasabing bilang ng mga namatay dahil sa pagkalunod, 23 ang mga menor-de-edad at tatlo ang senior citizens.

 Tiniyak naman ng PNP na patuloy nilang mino-monitor ang mga naitatalang nasawi dahil sa pagkalunod at nananatili ang deployment ng mga pulis sa mga matataong lugar upang mabilis na makaresponde sa mga mangangailangan ng tulong.