Walang batas na sumasaklaw sa mga Pilipinong iligal na lumalabas ng bansa.
Ito’y ayon kay Immigration Spokesperson Dana Sandoval sa gitna ng isinasagawang imbestigasyon ng ahensya kaugnay ng iligal na paglabas ng bansa ni dating presidential spokesman Atty. Harry Roque.
Samantala, iginagalang naman ng Bureau of Immigration ang pahayag ni Sen. Win Gatchalian na ang ahensya ang ‘weakest link’ sa nasabing isyu.
Pinaniniwalaang patay na ang dinukot na American Vlogger na si elliot eastman.
Ayon kay PNP Spokesperson Brig. Gen. Jean Fajardo, batay sa salaysay ng isa sa mga suspek, namatay si Eastman matapos pagbabarilin ng mga kidnapper noong araw na dinukot ito sa kanyang bahay noong Oktubre sa Zamboanga Del Norte.
Nagtamo aniya ng dalawang tama ng bala ang American Vlogger at isinakay ito sa isang bangka at inihulog sa dagat.
Dagdag pa ni Brig. Gen. Fajardo, natunton na rin ng mga otoridad ang bangkang ginamit ng mga suspek.
Nagpaabot ng mensahe si Vice President Sara Duterte sa mga tumutulong sa Office of the Vice President.
Ito’y sa gitna ng aniya’y krisis sa kanyang tanggapan.
Kaugnay nito, nagpasalamat si VP Sara sa mga abogado, doktor at iba pang propesyonal na tumutulong sa OVP.
Sinabi rin ng Bise Presidente na sa kabila ng mga hamon, mananatili silang matatag para serbisyuhan ang mga Pilipino.
Sisilbihan din ng subpoena ng National Bureau of Investigation ang mga dumalo sa zoom press conference ni Vice President Sara Duterte.
Ito ang kinumpirma ni NBI Director Jaime Santiago, kung saan hindi aniya bababa sa 10 ang kanilang iimbitahan sa gagawing imbestigasyon.
Karamihan dito ay kawani ng media, partikular ang mga nakita na nagtanong o may naging partisipasyon sa zoom conference.
Samantala, pinagbigyan naman ng NBI ang hiling ng pangalawang pangulo na i-reschedule ang kanyang pagharap sa ahensya, na itinakda sa Disyembre 11.
Kinumpirma mismo ni Pangulong Ferdinand Marcos jr., na sa kanya galing ang kumalat na text messages kung saan inihihirit niya sa kongreso na huwag nang maghain ng impeachment complaint laban kay Vice President Sara Duterte.
Sa isang ambush interview sa Quezon, sinabi ni PBBM na dapat ay isang pribadong komunikasyon lamang iyon ngunit wala na aniya siyang magagawa dahil kumalat na ito, at ito rin ang kanyang opinyon sa nasabing usapin.
Binigyang-diin pa ng Pangulo, na distraction lamang ito at walang maitutulong na mabuti sa buhay ng mga Pilipino.
Giit pa ng presidente, masyadong mabusisi ang impeachment at uubusin lamang nito ang oras ng kamara at senado.
Samantala, ‘never say never’ naman ang naging sagot ng Pangulo sa tanong ng media kung magkakabati pa sila ni VP Sara o hindi na. – Sa ulat ni Gilbert Perdez (Patrol 13)
22% o isa sa kada limang Pilipino ang kuntento sa pagtugon ng pamahalaan sa climate change.
Batay ito sa resulta ng survey ng Harvard Humanitarian Initiative, kung saan lumabas din sa survey na 53% ang hindi sigurado sa hakbang ng pamahalaan sa nasabing isyu.
Aabot naman sa 85% ng mga Pilipino ang naniniwalang totoo ang climate change, at 46% naman ang nangangambang maaapektuhan sila nito sa susunod na limang taon.
Napag-alaman din sa nasabing survey na anim sa kada sampung Pinoy ang walang ginagawang hakbang laban sa posibleng epekto ng climate change.
Nakolekta ang mga datos mula sa mahigit 4,000 Pilipino sa iba’t ibang bahagi ng bansa.
Naniniwala si Vice President Sara Duterte na hindi na sila magkaka-ayos ni Pangulong Ferdinand Marcos jr.
Sa press briefing sa Office of the Vice President Western Mindanao Satellite Office sa Zamboanga, sinabi mismo ni VP Sara na nais ng kasalukuyang administrasyon na tanggalin siya sa pwesto.
Iginiit pa ng bise presidente na nais ni Speaker Martin Romualdez ang kanyang posisyon.
Kinondena ng Malacañang ang panawagang pag-aaklas ni dating pangulong Rodrigo Duterte laban kay Pangulong Ferdinand Marcos jr.
Tinawag ni Executive Secretary Lucas Bersamin na “garapalang panawagan” Ang naging pahayag ng dating pangulo sa Armed Forces of the Philippines na maglunsad ng kudeta laban kay PBBM.
Iginiit pa ng kalihim na hindi katanggap-tanggap ang marahas na pang-aagaw ng kapangyarihan upang madaling maluklok bilang pangulo sa pamamagitan ng pagpaslang, panggugulo at pag-aalsa.
Hindi naman aniya magpapatinag ang kasalukuyang administrasyon sa sinumpaan nitong tungkulin na pagsilbihan ang mga Pilipino, nang naaayon sa saligang batas at sa prinsipyo ng rule of law.
Nanawagan naman si Executive Secretary Bersamin sa mga duterte na maghintay ng tamang panahon at sumunod sa wastong proseso. – Sa ulat ni Gilbert Perdez (Patrol 13)
Itinuturing ng Department of Justice na “Self-confessed mastermind” Si Vice Pres. Sara Duterte.
Kasunod ito ng pahayag ng bise presidente na may kinausap na siyang papatay kina Pangulong Ferdinand Marcos Jr., First Lady Liza Araneta-Marcos, at Speaker Ferdinand Martin Romualdez, kapag mayroon masamang nangyari sa kanya.
Binigyang diin ni Usec. Andres na kahit pa bise-presidente si Duterte ay maaari itong sampahan ng kasong kriminal at administratibo.
Maliban dito, may kapangyarihan din aniya ang Office of the Ombudsman na disiplinahin si VP Sara o kaya’y gumawa ng kaukulang hakbang o imbestigasyon laban sa mga matataas na opisyal ng pamahalaan.
Iginiit pa ni Usec. Andres na tanging si VP Sara ang makikinabang sakaling maisakatuparan ang planong pagpatay sa pangulo.
Iginiit ni House Speaker Martin Romualdez na direktang banta sa demokrasya ang mga binitiwang pahayag ni Vice Pres. Sara Duterte laban sa kanya, maging kina Pangulong Ferdinand Marcos jr., at First Lady Liza Araneta-Marcos.
Sa kaniyang talumpati sa kamara, sinabi ng lider ng kamara na walang puwang sa lipunan ang karahasan.
Pinabulaanan din ng house speaker ang akusasyong sinisiraan niya ang pangalawang pangulo para sa kanyang planong pagtakbo sa 2028 elections.
Binigyang diin naman ng lider ng kamara na nais lamang ilihis ni VP Sara ang isyu sa confidential funds ng kanyang tanggapan at department of education.
Kaugnay nito, muling hinamon ni Speaker Romualdez si VP Sara na ipaliwanag ang sinasabing maling paggamit ng confidential funds ng OVP at DEPED.