Hya Ludivico

Nagpaabot ng pakikiisa si Pangulong Ferdinand Marcos Jr., sa milyun-milyong Katoliko sa pagdiriwang ng pista ng Itim na Nazareno.

Sa kanyang mensahe, hinikayat ni PBBM ang mga Katoliko na tuklasin ang kanilang lakas at bagong kahulugan ng pag-asa at layunin sa buhay.

Binigyang diin pa ni PBBM na ang pista ng Itim na Nazareno ay isang napakagandang pagdiriwang ng walang hanggang awa at walang katapusang pagmamahal ng Makapangyarihan sa lahat, na ibinibigay sa bawat isa.

Hinimok naman ni Pangulong Marcos ang mga deboto na tandaan ang kahalagahan ng pagsasakripisyo, dahil sa mga ganitong panahon aniya sumasailalim sa pagbabago at spiritual transformation ang lahat.

Kasabay nito, hinikayat ng presidente ang mga mananampalataya na palalimin ang kanilang koneksyon sa Diyos at maging instrumento ng kapayapaan, pagkakaisa, at habag para sa mga Pilipino at maging sa bansa. - mula sa ulat ni Gilbert Perdez (Patrol 13)

Posibleng mawalan ng kapayapaan at pagkakaisa sa sektor ng transportasyon sakaling ipilit ng gobyerno ang consolidation ng mga lumang jeepneys para sa tuluyang implementasyon ng PUV Modernization Program.

Ito ang ibinabala ni Senate Minority Leader Koko Pimentel, kasabay nang paggiit na hindi pa hinog o hindi pa handa ang naturang programa, kaya’t mainam aniya na huwag munang ituloy ng Department of Transportation ang implementasyon nito.

Paliwanag ng senador, sa ilalim ng programa ay kailangan pa ring umutang ng mga driver at operator kahit pa may maliit na bahagi rito na sasagutin ng gobyerno.

Iginiit pa ng Senate Minority Leader na isa sa kahinaan ng programa ay ang reklamo ng mga PUV driver at operator na hindi sila kinonsulta at hindi naipaliwanag sa kanila nang maayos ang proseso o magiging sistema nito, dahil ang kasalukuyang sistema na alam nila ay papasada sila araw-araw at tiyak ang cash flow o kita.

Bukod dito, problema pa rin aniya ang route rationalization na hanggang ngayon ay hindi pa rin naisasa-ayos at posibleng nagkasanga-sanga na at hindi pa na-i-a-akma sa kasalukuyang programa.

Nagpaabot ng pakikiramay si Pangulong Ferdinand Marcos Jr., sa Japan matapos itong tamaan ng magnitude 7.6 na lindol.

Kaugnay nito, nangako si PBBM na handang magbigay ng tulong ang Pilipinas sa Japan.

Tiniyak din  ng pangulo sa publiko na binibigyang pansin ng pamahalaan ang kaligtasan ng mga Pilipino roon.

Ayon sa Philippine Embassy sa Japan, walang nasaktan o namatay na Pilipino dahil sa malakas na lindol, at tiniyak din ni DMW OIC Undersecretary Hans Leo Cacdac na binabantayan ng kanyang departamento ang kalagayan ng mga Pinoy doon, lalo na sa Ishikawa at Toyama prefectures.

Dagdag pa ni Usec. Cacdac, may kabuuang 1,194 na Pilipino sa nabanggit na mga lugar, kung saan mayroong 469 Pinoy sa Ishikawa at 725 naman sa Toyama.

Sinalubong ng rollback sa presyo ng produktong petrolyo ang unang linggo ng taong 2024.

Sa magkakahiwalay na abiso, sinabi ng mga kumpanyang Chevron Philippines Inc. o Caltex, Petron Corp., Pilipinas Shell Petroleum Corp. at Seaoil Philippines Corp., na kasado na ngayong araw ang ₱0.10 na bawas sa kada litro ng gasolina;

Habang ₱0.35 ang tapyas sa diesel; at ₱1.40 naman ang bawas sa kada litro ng kerosene.

Ang naturang price adjustments ay ipinatupad ng kumpanyang Caltex kaninang 12:01 ng hatinggabi, habang kaninang 6:00 ng umaga naman nang ilarga ng ibang oil companies ang kahalintulad na presyo.

Hinimok ng Department of Migrant Workers ang mga overseas Filipino worker sa Japan na naapektuhan ng malakas na lindol na makipag-ugnayan sa kanilang ahensya.

Kasunod ito ng pagtama ng magnitude 7.4 na lindol sa Central Japan at kanlurang baybayin nito.

Sa social media platform na X, ibinahagi ni DMW Officer-in-Charge Hans Leo Cacdac ang mga numero na maaaring tawagan ng mga OFW na nangangailangan ng tulong.

Maaaring makipag-ugnayan sa DMW-OWWA Japan Help desk (local) – 1348; DMW-OWWA Japan Help Desk (abroad) – (+632) 1348; at DMW-MWO-Osaka – (+81) 7022756082 o (+81) 7024474016

Siyamnapu’t anim na porsyento ng mga Pilipino ang nagsabing sasalubungin nila ang bagong taon nang may pag-asa.

Batay sa survey ng Social Weather Stations, mas mataas ang nasabing numero kumpara noong 2022 na nakapagtala ng 95%.

Samantala, 3% naman ang nagsabing sasalubungin nila ang taong 2024 nang may pangamba, na mas mababa kumpara sa 5% noong 2022.

Isinagawa ang naturang survey mula December 8 hanggang December 11, 2023 sa pamamagitan ng face-to-face interviews sa 1,200 indibidwal na edad labingwalo pataas.

Epektibo na ngayong araw ang malakihang dagdag sa presyo sa produktong petrolyo.

Eksaktong alas dose uno ng hatinggabi nang ipatupad ng Caltex ang P1.60 na umento sa kada litro ng gasolina;

P1.70 na dagdag sa kada litro ng diesel; at P1.55 naman sa kada litro ng kerosene.

Kaninang ala sais ng umaga naman nang ipatupad ng mga kumpanyang Shell at Seaoil, ang kaparehong price adjustments sa gasolina at diesel, habang P1.54 na sentimo naman ang dagdag sa kada litro ng kerosene o gaas.

Una nang sinabi ng Department of Energy – Oil Industry Management Bureau na ang pagtaas ng presyo ng mga produktong petrolyo ay bunsod ng pag-iwas ng mga kumpanya ng langis at ng mga oil tanker na dumaan sa red sea dahil sa pag-atake ng mga rebelde.

Nilagdaan na ni Pangulong Ferdinand Marcos Jr. ang higit sa ₱5-T na budget para sa taong 2024.

Sa kanyang talumpati, binigyang-diin ni PBBM na mapupunta sa iba’t ibang proyekto at programa ng gobyerno ang pambansang pondo, at tiniyak na lahat ng mga nakapaloob dito ay pakikinabangan ng mga Pilipino.

Ang higit sa ₱5.7-T 2024 national budget ay katumbas ng 21.7% ng gross domestic product ng bansa at mas mataas ng 9.5% kumpara sa ₱5.26-T 2023 budget.

Sinaksihan naman nina Senate President Juan Miguel Zubiri, House Speaker Martin Romualdez, Budget Sec. Amenah Pangandaman, gayundin ng iba pang mga mambabatas at ilang miyembro ng gabinete ang ceremonial signing. - mula sa ulat ni Gilbert Perdez (Patrol 13)

Nanawagan si Pangulong Ferdinand “Bongbong” Marcos Jr., sa publiko kaugnay sa responsableng paggamit ng kuryente.

Ginawa ni PBBM ang pahayag kasabay ng pagdiriwang ng 2023 National Energy Consciousness Month.

Mahalaga aniyang matuto ang mga Pilipino na magtipid sa pagkonsumo ng kuryente at maging responsable sa paggamit ng enerhiya, sa pagsusulong ng sustainable development.

Binigyang diin pa ng pangulo na sa pamamagitan ng pagtutulungan at kooperasyon ng sambayanan, makakamit ang mas matatag na kinabukasan para sa mga susunod na henerasyon.

Isusulong ni Pangulong Ferdinand Marcos Jr., ang makabagong pamamahala sa gobyerno para sa susunod na taon.

Iginiit ni PBBM na kailangang ipagpatuloy ang pagsasamoderno ng structural changes ng gobyerno dahil obsolete na ito o luma na.

Binigyang diin pa ng pangulo na mahalaga ang structural changes dahil makakatulong ito sa pagre-adjust, halimbawa ng fiscal policy, monetary policy at spending policy.

Ito, aniya ay hakbang para tuluyan nang makalagpas sa epekto ng COVID-19 pandemic.

Naniniwala rin ang pangulo na ang ginagawang structural changes ay may malaking epekto sa pamamahala sa gobyerno para sa susunod na taon. - mula sa ulat ni Gilbert Perdez (Patrol 13)