Hya Ludivico

Nanganganib na maapektuhan ang nasa 900,000 tsuper at operator, sakaling hindi makapag-renew ng prangkisa at hindi makapag-consolidate sa Land Transportation Franchising and Regulatory Board sa December 31.

Ibinabala ni Piston President Mody Floranda na kapag hindi sila pinagbigyan sa kanilang hiling ay muling magkakaroon ng transport crisis, na makakaapekto sa ekonomiya.

Kaugnay nito, nanawagan ang PISTON President sa pamahalaan na pag-aralang mabuti ang naturang hakbang.

Matatandaang hiniling ng grupo na irekonsidera ng LTFRB ang desisyon nitong ituloy ang deadline ng konsolidasyon ng jeepney drivers at operators sa kooperatiba at korporasyon hanggang sa nabanggit na petsa.

Idineklara ni Pangulong Ferdinand Marcos Jr., ang Disyembre 26 bilang special non-working day sa buong bansa.

Ito’y batay sa Proclamation No. 425 ni PBBM na nilagdaan ni Executive Sec. Lucas Bersamin.

Ayon sa pangulo, sa pamamagitan nito ay mabibigyan ng pagkakataon ang mga Pilipino na maipagdiwang ang araw ng Pasko kasama ang kanilang pamilya at mga mahal sa buhay.

Maliban dito, maitataguyod din ng long weekend ang domestic tourism.

Kasabay nito, inatasan naman ng Malacañang ang Department of Labor and Employment na maglabas ng circular para sa implementasyon ng proklamasyon sa pribadong sektor. - mula sa ulat ni Gilbert Perdez (Patrol 13)

Kinilala ni Pangulong Ferdinand Marcos Jr., ang mahalagang papel ng mga kababaihan sa pagbuo ng Bagong Pilipinas.

Ang pahayag ay ginawa ni PBBM sa oath-taking ceremony ng mga bagong opisyal ng Lady Local Legislators League of the Philippines o Four-L Phils.

Sa kanyang mensahe, pinuri ng pangulo ang Four-L Phils sa pagtataguyod ng karapatan ng kababaihang Pilipino, mga batang babae, at mga pamilya.

Kasabay nito, nanawagan din si PBBM ng pagkakaisa upang mapalawak ang partisipasyon ng mga ito sa lipunan at labanan ang diskriminasyon.

Tiniyak naman ni Pangulong Marcos ang mas pinalakas na pagpapatupad sa Magna Carta of Women sa lahat ng antas ng pamahalaan. - mula sa ulat ni Gilbert Perdez (Patrol 13)

Nanindigan si Pangulong Ferdinand Marcos Jr., na hindi na palalawigin pa ang December 31 deadline para sa franchise consolidation application ng mga operator para sa PUV Modernization Program.

Iginiit ni Pangulong Marcos na 70% ng  mga operator sa bansa ay nakapag-commit at nakapag-consolidate na sa ilalim ng naturang programa.

Dagdag pa ni PBBM, hindi hahayaan ng pamahalaan na maantala pa ang implementasyon nito.

Sinabi pa ng presidente na sa pamamagitan ng pagsunod sa kasalukuyang timeline ay masisiguro na ang lahat ay makikinabang sa buong operasyon ng modernisadong sistema ng public transport.  - mula sa ulat ni Gilbert Perdez (Patrol 13)

Nanumpa si Pangulong Ferdinand Marcos Jr., bilang Chief Scout ng Boy Scout of the Philippines, kasabay ng pagbubukas ng 18th National Scout Jamboree sa lungsod ng Passi, Iloilo.

Pinangunahan nina BSP National President Dale Corvera, at Passi City Mayor Stephen Palmares, ang formal investiture ni PBBM.

Sa kanyang talumpati, hinikayat ng pangulo ang mga scout na i-enjoy ang iba’t ibang pagsasanay at gamitin ito sa nation building at magsilbi bilang mabuting kabataan at mamamayan.

Inilarawan naman ni PBBM ang event bilang “Mother of All Activities” Sa buhay ng scout.

Tinatayang aabot sa 35,000 delegasyon ng boy scouts ang dumalo sa naturang okasyon.

Epektibo na ngayong araw ang bigtime oil price rollback sa mga produktong petrolyo.

P1.60 ang ipinatupad na tapyas ng mga kumpanya ng langis sa kada litro ng gasolina;

P1.40 ang bawas sa presyo ng kerosene o gaas, habang P1.85 naman sa kada litro ng diesel.

Paliwanag ng Department of Energy, ang paggalaw sa presyo ay bunsod ng pagbaba ng demand sa Organization of the Petroleum Exporting countries.

Inaasahan naman ng ahensya na magpapatuloy pa rin sa mga unang buwan ng 2024 ang mababang pangangailangan sa langis.

Naglabas na ng bagong suggested retail price ang Department of Trade and Industry para sa school supplies.

Layon ng srp bulletin “gabay sa pamimili ng school supplies,” na magabayan ang mga consumer sa pagbili ng mga gamit pang-eskwela.

Batay sa inilabas na price guide, naglalaro sa P23- P52 ang presyo ng mga notebook habang ang pad paper naman mula Grade 1 – 4 ay nagkakahalaga ng P21- P28.- P19 ang presyo ng ballpen.

Nakadepende naman sa laki ng eraser ang presyo nito na mabibili mula P4.50 – P 20.

Ayon sa ahensya, bagamat hindi gumalaw ang presyo ng ilang school supplies, tumaas naman ang presyo ng ilang gamit pang-eskwela dahil sa epekto ng pagsirit ng global cost ng mga basic raw material.

Tiniyak naman ng DTI na nakikipag-ugnayan sila sa mga manufacturer ng school supplies upang masiguro ang makatwirang presyo at sapat ang supply ng mga ito sa merkado.

Sim card registration sa bansa, natapos na; halos 60,000,000 sim deactivated na.

Deactivated na ang halos 60,000,000 sim card sa bansa na hindi nairehistro makaraang mapaso ang pinalawig na deadline ng sim card registration kahapon.

Kapwa nanindigan ang National Telecommunications Commission at Department of Information and Communications technology na hindi na nila palalawigin pa ang deadline sa pagpaparehistro ng sim cards.

Dahil dito, tuluyan nang naputulan ng serbisyo ang mga mobile user na hindi nakapag-register ng kanilang gamit na sim card simula kaninang 12:01 am .

Gayunman, bibigyan pa rin sila ng 5 araw na grace period upang ma-reactivate ang kanilang mga sim card.

Batay sa datos ng NTC, umabot sa 105, 917, 844 ang bilang ng registered sims sa bansa hanggang noong July 24.

Katumbas ito ng 63.04 % ng active sim subscribers sa bansa na umabot sa mahigit 168 , 000, 000.

 Naglabas ng traffic advisory ang Metropolitan Manila Development Authority para sa ikalawang State of the Nation Address ni Pangulong Ferdinand Marcos Jr.

Sa mga patungong Northbound na magmumula sa Quezon Memorial Circle patungong fairview, maaaring tahakin ang North Avenue, kumanan sa Mindanao Avenue, at muling kumanan sa Sauyo Road o Quirino Highway papunta sa destinasyon.

Para naman sa mga pa-Southbound na manggagaling sa fairview patungong Quezon Memorial Circle, maaaring baybayin ang sauyo road o Quirino Highway, kumaliwa sa Mindanao Avenue, at kumaliwa sa north avenue.

Sa mga light vehicle na magmumula sa c5 road, kumanan lamang sa magiting street, kumaliwa sa maginhawa street, at kumanan sa mayaman street patungo sa kalayaan avenue.

Para naman sa mga truck, maaaring dumaan sa Luzon flyover at kumaliwa sa Congressional Avenue patungo sa kanilang destinasyon.

Upang magabayan ang mga motorista, tiniyak naman ng mmda na maglalagay sila ng traffic advisory signage at traffic cones sa mga alternatibong ruta.

Inulan ng batikos ang bagong logo ng Philippine Amusement and Gaming Corporation na nagkakahalaga ng mahigit P3-M .

Tila hindi nagustuhan ng mga social media user ang bagong disenyo ng logo ng ahensya na ikinumpara sa logo ng isang gasolinahan at inilarawan pa na parang demonyo at halimaw na may pulang mukha at dalawang sungay.

Iginiit pa ng ilang netizens na hindi katanggap-tanggap ang halaga ng ginastos para sa nasabing logo.

Matatandaang nitong Martes nang isapubliko ng pagcor ang bagong logo kasabay ng kanilang ika-apatnapung taong anibersaryo.

Batay sa notice of award na iginawad sa proprietor ng printplus graphic services na si francisco diplon, wala pang value added tax at zero-rated transaction rin ang mahigit P3-M  na halaga ng logo.

Una rito, sinabi ni PAGCOR Chairman at Chief Executive Officer Alejandro Tengco na tampok sa bagong logo ang elemento ng apoy na sumisimbolo sa enerhiya, inspirasyon, passion at transformation ng ahensya.

Kinakatawan din nito ang apoy na nagmimitsa ng pagbabago at progreso, at ang liwanag para sa pag gabay at liderato, na nagsisilbing patnubay sa mga tao upang mahanap ang kanilang direksyon.