Hya Ludivico

Nakatakdang ilunsad ng Department of Education sa mga susunod na linggo ang revised curriculum ng K-10 program para sa school year 2024- 2025.

Ayon kay DepEd Spokesperson Undersecretary Michael Poa, pagtutuunan sa bagong curriculum ang mga asignaturang Math, Science, English, Reading at Values Formation.

Matatandaang noong Abril nang buksan ng kagawaran ang public review sa draft ng K- 10 curriculum, kung saan hinimok ang mga eksperto, miyembro ng academe, at iba pang education stakeholders na magbigay ng feedback kaugnay dito.

Sinabi naman ni Sec. Poa na patuloy pang nire-review ang K-12 Curriculum.

Nasa kamay na ng mga lokal na pamahalaan sa National Capital Region ang desisyon kaugnay sa pag-regulate sa paggamit ng tubig sa mga business establishment upang makatulong na pagtugon sa epekto ng El Niño Phenomenon.

Ayon kay Metro Manila Council President at San Juan City Mayor Francis Zamora, nakadepende na sa mga LGU kung magpapasa ng ordinansa dahil hindi magkakapareho ang demographics ng bawat lungsod at hindi lahat ay may mga establisyimento na malakas sa paggamit ng tubig tulad na lamang ng mga hotel na may swimming pool.

Umapela naman si Mayor Zamora sa mga LGU na magtipid sa paggamit ng tubig at hinimok niya rin ang mga ito na mag-recycle  at magkarron ng rainwater catchment system.

Una rito, hinimok din ng alkalde ang publiko na i-report sa barangay o city hall sakaling may makitang tagas sa tubo ng tubig o ilegal na koneksyon sa lugar upang mabilis itong maisaayos.

Sinabi pa ni Mayor Zamora na pinagana na ng mga LGU ang kani-kanilang El Niño Task Force.

Pinag-iingat ng Department of Health ang publiko laban sa iba’t ibang sakit na maaaring lumaganap ngayong panahon ng El Niño.

Binigyang diin ni Health Secretary Teodoro Herbosa na may malaking epekto ang lagay ng panahon sa kalusugan ng mga tao, kaya’t dapat aniyang mag-ingat ang publiko laban sa vector-borne diseases gaya ng dengue, at waterborne diseases tulad ng cholera.

Iginiit pa ni Sec. Herbosa na dapat na mapaghandaan ang panganib na dala ng El Niño, kaya’t kaniyang aatasan ang  disaster program na tingnan ito upang kaagad na matugunan.

Ibinahagi naman ni Health Spokesperson at Undersecretary Enrique Tayag na nagkaroon ng dengue outbreak sa kasagsagan ng El Niño noong 1998.

Tuwing may El Niño aniya ay maraming nag-iigib at nag-iimbak ng tubig, kaya naman maraming water containers ang nagsisilbing ‘breeding places’ ng mga lamok.

Sinabi pa ng DOH official na naglabas na ng guidelines ang kagawaran kaugnay sa mga dapat gawin ng mga ospital ngayong may banta ng El Niño at nagbabadyang kakapusan sa supply ng tubig.

Babantayan din aniya ng kagawaran ang presyo ng mga gamot sa merkado upang matiyak na walang mananamantala sa sitwasyon.

Magpapatupad ng bawas-singil sa kuryente ang MANILA ELECTRIC COMPANY (MERALCO) ngayong buwan.

Bunsod ito ng mababang singil sa kuryente ng mga supplier o generation charge at bumaba rin ang halaga ng kuryente sa wholesale electricity spot market.

Maliban dito, nabawasan din ang pangangailangan sa kuryente ng mga konsyumer dahil nagsimula na ang tag-ulan.

Ayon sa MERALCO, 0.72¢ kada kilowatt hour ang matatapyas sa bayarin sa July billing ng mga costumer nito.

Dahil dito, mababawasan ng ₱144 ang ibinabayad sa kuryente ng mga residential customer na kumukonsumo ng 200 kilowatt hour kada buwan;

Habang ₱360 naman ang matatapyas sa bill ng mga nakakakonsumo ng 500 kilowatt hour kada buwan.

Abiso sa mga motorista!

Asahan ang dagdag-bawas sa presyo ng mga produktong petrolyo simula bukas July 11.

Batay sa pagtaya, maaaring umabot sa 0.50¢ hanggang 0.80¢ ang dagdag sa presyo ng kada litro ng Diesel at Kerosene;

Habang posible namang walang paggalaw o bumaba nang hanggang 0.30¢ ang presyo ng kada litro ng Gasolina.

Karaniwang ina-anunsyo ng mga kumpanya ng langis ang price adjustments tuwing Lunes, at ipinatutupad ito sa susunod na araw.

Wala masyadong magiging epekto sa inflation ngayong taon ang umiiral na El Niño Phenomenon.

Ito’y ayon kay NEDA Undersecretary Rosemarie Edillon, dahil tinayang mas mararamdaman ito sa pagsisimula ng 2024, ngunit ngayon pa lamang aniya ay dapat nang simulan ang paghahanda sa epekto nito.

Tiniyak naman ni Usec. Edillon na may ginagawang mga hakbang ang administrasyon ni Pangulong Ferdinand Marcos Jr. Para maibsan ang negatibong epekto ng El Niño.

Pabor aniya para sa ‘residential use’ ang pagbabawas ng alokasyon ng tubig para sa irigasyon mula sa Angat Dam, ngayong tapos na ang panahon ng pagtatanim.

Binigyang diin pa ni Usec. Edillon na dapat ding samantalahin ng pamahalaan ang madalas na pag-ulan, at pagpapabilis sa pagkumpleto ng mga maliliit na impounding water projects upang mapagaan ang posibleng epekto ng El Niño sa bansa.

Inalis na ng Commission on Higher Education ang Moratorium o ang kautusang nagbabawal sa  mga bagong programa para sa nursing.

Taong 2011 nang ipasara ang mga nursing program dahil sa dami ng nursing graduates, subalit bagsak naman ang performance pagdating sa licensure examinations.

Sinabi ni CHED Chairman Prospero De Vera III na kabilang ito sa inilatag niyang mga panukala kay pangulong ferdinand marcos jr., para matugunan ang kakulangan ngayon ng mga nurse sa bansa.

Bahagi aniya ng long term plan ang pagpapawalang bisa sa moratorium para sa mga bagong nursing program.

Sa katunayan, mayroon na aniyang 55 unibersidad sa bansa ang nag-apply sa CHED para sa muling pagbubukas ng bagong nursing programs.  – sa ulat mula kay Gilbert Perdez  (Patrol 13). 

Tinatayang 7, 000 – 8,000 pulis at iba pang pwersa ng pamahalaan ang idedeploy sa ikalawang state of the nation address ni Pangulong Ferdinand Marcos Jr.

Ayon kay Quezon City Police District Director Brigadier General Nicolas Torre III, 2,000 pulis ang magmumula sa kanilang hanay habang 3,000 naman ay manggagaling sa iba pang istasyon ng pulisya.

Aabot naman sa 400 – 500 personnel ang ipakakalat mula sa iba pang Law Enforcement Agencies, gaya ng Armed Forces of the Philippines at Philippine Coast Guard.

Sa ngayon aniya ay wala pa silang natatanggap na aplikasyon para sa permit to rally mula sa mga grupong nagbabalak na magdaos ng kilos protesta.

Dagdag pa ni Bgen. Torre, handa sila sa posibleng ‘Worst-Case Scenarios’ at pagtiyak ng seguridad ng mga makikiisa sa SONA.

Asahan bukas ang ipatutupad na rollback sa presyo ng mga produktong petrolyo.

Batay sa pagtaya, posibleng magkaroon ng 0.60 ¢ hanggang 0.80 ¢ na bawas sa kada litro ng Diesel;

Habang maglalaro sa 0.70 ¢ hanggang 0.90 ¢ ang estimated na rollback sa kada litro ng Gasolina at Kerosene.

Ayon sa Department of Energy, ito’y dahil sa negatibong interest rates outlook ng mga investor at long term demand dahil sa pangamba sa global recession.

Maliban dito, bumulusok din ang crude oil stocks ng estados unidos sa 9.6 million barrels, kasabay ng mataas na demand habang papalapit ang driving season sa naturang bansa.

Pito sa sampung Pilipino ang nagsabing ‘satisfied’ sila sa performance ng administrasyon ni Pangulong Ferdinand Marcos Jr.

Batay sa “Tugon ng Masa” Survey na isinagawa ng OCTA Research, 72% ng mga Pinoy ang nagsabing kuntento sila sa performance ni PBBM.

Mas mababa ito kumpara sa survey ng OCTA noong Oktubre, kung saan nakakuha ang kasalukuyang administrasyon ng 76% na satisfaction rating.

Nakuha ng Marcos Administration ang pinakamataas na rating sa Visayas, 83%, sinundan ng balanced Luzon, 77%; at Mindanao, 67%.

Samantala, 8% naman ng respondents ang dissatisfied sa general performance ng Marcos government.

Isinagawa ang naturang survey noong March 24 hanggang 28, 2023 na may 1,200 respondents nationwide.