Hya Ludivico

Maituturing na “Gold Medalist” Ang Pilipinas sa usapin ng teenage pregnancies sa buong Asean Region.

Ito’y ayon kay Commission on Population and Development Communication Division Chief Mylin Mirasol Quiray, matapos lumobo sa 150,000 ang kaso ng teenage pregnancy sa bansa noong 2022.

Batay aniya sa datos ng Philippine Statistics Authority, tumaas ng 10.15 % ang teenage pregnancies sa bansa, mula sa mahigit 136,000 cases na naitala noong 2021.

Kabilang sa mga tinukoy na dahilan ng CPD official sa pagtaas ng bilang ng teenage pregnancies ang pagkakalantad ng mga kabataan sa pornographic content online.

Nakita rin aniya ang mataas na exposure dito ng mga kabataan noong 2021, na kasagsagan ng pandemya.

Kaugnay nito, hinimok ng POPCOM ang mga magulang na magsilbing first sexuality educators sa kanilang mga anak at bantayan ang mga pinapanood ng mga ito sa internet.

Halos isang milyong senior citizens ang inaasahang makikinabang sa bagong batas na nilagdaan ni Pangulong Bongbong Marcos.

Batay sa population census ng Philippine Statistics Authority noong 2020, nasa 9,242,121 ang naitalang older persons sa buong bansa.

Sa nasabing bilang, nasa 950,000 ang edad 80 hanggang 90.

Sa ilalim ng R.A. 11982 o granting benefits to filipino octogenarians and nonagenarians, makatatanggap ang mga senior ng P10,000 ang mga senior citizen na umabot sa edad na 80, 85, 90, at 95.

Mananatili naman ang P100,000 na benepisyo para sa mga tutuntong sa edad na 100.-  mula sa ulat ni Gilbert Perdez (Patrol 13).

Lusot na sa House Committee on Appropriations ang House Bill 6770 o ang Internet Voting Bill na substitute bill ni OFW party list Rep. Marissa “Del Mar” Magsino, na una nang inaprubahan ng committee on suffrage and electoral reforms noong Agosto nang nakaraang taon.

Layon ng panukala na bigyang daan ang mga Overseas Filipino Worker na magamit ang kanilang karapatan sa pagboto habang nasa ibang bansa.

Dahil na rin ito sa hamong kinakaharap ng OFWs sa pagboto kada eleksyon dahil sa oras at layo ng kanilang trabaho sa mga lugar kung saan pwedeng makaboto.

Target din nito na suportahan ang inisyatiba ng Commission On Elections (COMELEC) na ipakilala ang internet registration at voting sa mga ofw sa pamamagitan ng pagbibigay ng legal na batayan para dito.

Una nang nanawagan si rep. Magsino sa mga OFW na magparehistro na para sa 2025 national elections, na isasagawa via internet voting sa 76 na foregin posts. – sa ulat mula kay Agustina Nolasco ( Patrol 11)

Sinibak na sa serbisyo ang 10 pulis na nakadestino sa National Capital Region Police Office (NCRPO), na sangkot sa iba’t-ibang kaso.

Sinasabing dawit ang mga ito sa iligal na pag-aresto, arbitrary detention, at pagnanakaw sa 4 na babaeng Chinese sa isang Philippine Offshore Gaming Operator o POGO sa Parañaque noong nakaraang Setyembre

Kabilang sa mga  tinanggal sa serbisyo sina Lieutenantt. Colonel Jolet Tutor Guevara, Major Jason Domingo Quijana; Major John Patrick Oxales Magsalos; Captain Sherwin Clete Limbauan;

Executive Master Sergeant Arsenio Valle, Corporal Rexes Claveria, at Staff Sergeants Roy Pioquinto, Mark Democrito, Danilo Desder at Christian Corpuz.

Epektibo ang dismissal order ng mga ito noon pang February 12, at nahaharap sa mga kasong grave misconduct, grave irregularity in the performance of duty, less grave neglect of duty, grave neglect of duty at conduct unbecoming of a police officer.- sa ulat mula kay Agustina Nolasco ( Patrol 11).

Pinamamadali ni Pangulong Ferdinand Marcos Jr., sa mga kaukulang ahensya ang pag-kumpleto sa mga proyekto sa lahat ng water projects sa bansa, sa harap ng tumitinding epekto ng El Niño.

Sa kanyang talumpati sa inagurasyon ng Davao City bulk water supply project, binigyang-diin ni PBBM ang kahalagahan ng water security.

Iginiit pa ng pangulo na ang kakulangan ng tubig ay hindi na lamang isang seasonal challenge, kundi isang permanente nang problema, na kaakibat ng climate change.

Ang anumang balakid aniya sa supply ng tubig tulad ng tagtuyot, ay makasisira sa kalidad ng pamumuhay, maging sa ekonomiya. – sa ulat mula kay Gilbert Perdez (Patrol 13).

Kasado na ngayong araw ang big-time price increase sa mga produktong petrolyo.

Buena manong nagpatupad ng taas-presyo ang CALTEX kaninang 12:01 a.m., kung saan P2.80   ang dagdag sa kada litro ng gasolina.

P1.30 naman ang umento sa kada litro ng Diesel, habang P0.45  naman ang taas-presyo sa kada litro ng kerosene.

Inilarga na rin ng mga kumpanyang pilipinas shell at seaoil ang kaparehong price adjustment kaninang ala sais ng umaga, gayundin ang mga kumpanyang jetti petroleum, unioil, at petrogazz, maliban sa kerosene.

Mamayang 4:01 p.m. naman ipatutupad ng cleanfuel ang kahalintulad na presyo sa gasolina at diesel.

Una nang sinabi ni Energy Director Rodela Romero na ang pagtaas sa presyo ng oil products ay bunsod ng pagbaba ng U.S. crude stock sa gitna ng mataas na demand, gayundin ang pagpapalabas ng stimulus package ng Chinese Central Bank para sa economic recovery, na mayroon ding kinalaman sa demand.

Pinalawig ng pamahalaan ang deadline ng consolidation para sa P.U.V. Modernization Program.

Ayon sa Presidential Communications Office, inaprubahan ni Pangulong Ferdinand Marcos Jr., ang rekomendasyon ni Transportation Secretary Jaime Bautista na palawigin pa ng 3 buwan hanggang April 30, 2024 ang consolidation ng mga tradisyunal na jeep.

Ito’y upang bigyan ng pagkakataon ang mga jeepney operator at drivers na hindi umabot sa cut off na makapag-consolidate.
Matatandaang natapos noong december 31, 2023 ang deadline para sa P.U.V. Consolidation. – sa ulat mula kay Gilbert Perdez (Patrol 13).

Nakararanas na ng tagtuyot ang walong probinsya sa bansa dahil sa El niño phenomenon.

Ayon kay Office of Civil Defense Administrator Ariel Nepomuceno, ramdam na ngayon ang tagtuyot sa Apayao, Bataan, Cagayan, Cavite, Ilocos Norte, Kalinga, Palawan, at maging sa Zambales.

Dagdag pa ng OCD official, posibleng makaranas ng tagtuyot sa abril ang karamihan sa mga lugar sa bansa, maliban sa ilang lalawigan sa Mindanao.

Una nang sinabi ng pagasa na inaasahang magpapatuloy ang matinding tagtuyot simula ngayong buwan hanggang sa Pebrero

5 pinay ang napabilang sa listahan ng “50 over 50: Asia” 2024 ng Forbes.

Tampok dito ang achievements ng mga kababaihan sa Asia-Pacific Region sa iba’t ibang larangan, gaya ng pharmaceuticals, fashion, at iba pang industriya.

Pasok sa naturang listahan ang 66-anyos na si Susan Co, ang co-founder ng Puregold Price Club Inc., at Vice Chairman ng Cosco Capital Inc.;

Napasama rin sa “50 over 50: Asia” 2024 list ang aktres na si dolly de Leon, na naging kauna-unahang pinay na nakakuha ng nominasyon bilang best supporting actress sa Golden Globe Awards;

Gayundin ang 54-anyos na pangulo at Chief Executive Officer ng Ayala Land Inc., na si Anna Ma. Margarita Dy.

Napabilang din sa nasabing listahan ang peace negotiator at professor ng political science sa university of the philippines na si Miriam Coronel-Ferrer; at

Ang 52-anyos na pangulo at executive officer ng Electronic Health-Tech firm na medilink networks na si Esther Go.

Mahigit 187,000 katao sa Davao region ang naapektuhan ng masamang panahon dahil sa epekto ng shear line.

Ayon sa National Disaster Risk Reduction Management Council, nagmula sa 109 na barangay sa Davao De Oro, Davao Del Norte, Davao Occidental at Davao Oriental ang mga apektadong indibidwal

Aabot sa mahigit 6,000 katao ang pansamantalang nananatili sa evacuation centers habang mahigit 2,000 individuals naman ang nanunuluyan sa ibang mga lugar.

Nagpaabot naman ng tulong ang Coast Guard Southeastern Mindanao at Department of Social Welfare and Development-11 sa mga apektadong residente.