Jenn Patrolla

Tumaas ang Farmgate price ng palay nitong buwan ng Pebrero.

Ito ang inihayag ng Philippine Statistics Authority na muling naitala ang mas mataas na average Farmgate price ng palay na aabot sa P25.21 kada kilo.

Ayon sa PSA, mas mataas ito ng 1.2 % kung ikukumpara sa farmgate price na naitala noong Enero na aabot sa P24.92 kada kilo.

Mas mataas din ito ng 38.6% kumpara sa naitalang farmgate price noong nakaraang taon na aabot sa P18.19 kada kilo.

Binigyang diin ng PSA na ang Region 1 o Ilocos Region ang may pinakamataas na farm gate price ng palay na umabot sa P28.41  kada kilo. – sa ulat mula kay Gilbert Perdez (Patrol 13).

Nilagdaan ng Commission on Elections at MIRU Systems Company limited ang kontrata para sa pagkuha ng bagong automated election system para sa 2025 National and Local Elections.

Pinangunahan nina Comelec Chairman George Garcia, Comelec Commissioner Rey Bulay, at Miru President Chung Jin Bok ang paglagda sa naturang kontrata.

Ayon sa comelec, sakop ng 17.99- B kontrata ang mahigit 100 machine at peripheral kabilang ang mga ballot box, laptop, at iba pang kailangan sa pag-imprenta para sa 2025 elections.

Dahil dito, tiniyak naman ng miru systems company limited na susunod sila sa “Terms of reference” ng Comelec kasabay ng paniniguro ng isang malinis at mapayapa na halalan sa 2025.

Matatandaang nagwagi sa bidding ang South Korean Company para sa isasagawang 2025 midterm elections.

May mga Mafia at sindikato sa  National Food Authority.

Ito ang binigyang diin ni SINAG President Rosendo So  matapos na may mga ulat na nagbebenta ang ahensya ng libu-libong toneladang NFA rice sa isang negosyante na sobrang baba ng presyo at lugi ang gobyerno.

Una nang sinabi ni Agriculture Secretary Francisco Tiu Laurel Junior na may mga opisyal ng NFA ang nagbigay permiso sa bentahan ng milled rice na nakaimbak sa warehouse sa halagang P25  kada kilo ng walang bidding at makaraang mabili ang palay sa halagang P23 per kilo.

Ipinagbabawal na ang paggamit ng mga E-bikes, E-trikes, at iba pang electric motor vehicle sa mga pangunahing kalsada sa National Capital Region simula sa Abril.

Ito’y matapos aprubahan ng Metro Manila Council ang isang resolusyon kung saan ipinagbabawal ang paggamit ng mga E-vehicle, tricycle, pedicabs, pushcarts, at kuliglig sa mga National Road.

Kabilang sa mga kalsada ang:

Recto avenue

Araneta avenue

Roxas boulevard

Ortigas avenue

At shaw boulevard

Ayon kay Metropolitan Manila Development Authority Acting Chair Don Artes, ang mga lalabag sa panuntunan ay pagmumultahin ng PHP 2,500.

Dagdag pa ng MMDA Official, na kailangan na ring magkaroon ng lisensya ang mga driver ng e-vehicle at e-trike.

Kung walang driver liscense anya ay ma-iimpound ang sasakyan.

Handa ang Department of Health sa anumang uri ng sakit na maaaring pumasok sa bansa.

Ito ang tiniyak ni Health Deputy Spokesman Assistant Secretary Albert Domingo matapos iulat ng World Health Organization na dapat maghanda ang buong mundo sa disease ‘X’ na posibleng mauwi sa pandemya.

Sinabi ng DOH Official, mayroon ng sistema ang Pilipinas dahil sa nangyaring pandemya sa COVID-19.

Mayroon na ring joint external evaluation na ginawa ang  kagawaran noong 2018 upang makapasa sa pamantayan ng WHO.

Sa ngayon, nakabantay ang DOH sa posibleng ‘alarm sign’ sa panibagong uri ng sakit na maaaring tumama sa bansa.

Hindi kayang ibaba ng ilang rice retailers ang  kanilang ibinebentang bigas sa kabila ng papalapit na  harvest season o anihan ng mga palay.

Kasunod din ito ng pagbaba ng presyo ng produkto sa world market at pagdami ng suplay.

Ayon sa mga rice retailers sa Pasay Public Market, na hindi sila basta-basta nagbababa ng presyo ng bigas, hindi tulad sa ilang pamilihan.

Kung mayroon man anyang bagsak-presyo, hindi ito tinatangkilik ng nakararami dahil sa kalidad nitong madilaw at mabahong amoy.

Sa ngayon, nananatiling mataas ang ilang klase ng bigas gaya ng  well milled rice na maalsa at mabango na naglalaro ang presyo sa hanggang P56 at special rice na nasa P70  ang kada kilo.

Inihirit ng pribadong sektor na gawing utay-utay ang panukalang P100 wage hike.

Binigyang diin ni Go Negosyo Founder at Private Sector Lead for Jobs Joey Concepcion na hindi kakayanin ng mga negosyante ang bilaang pagtaas ng sahod ng mga manggagawa.

Dahil dito, iminungkahi ng opisyal na kung maaari ay unti-unting ipatupad upang hindi mabigla ang mga negosyante.

Bagama’t kaya naman ito anya ng mga malalaking kumpanya at korporasyon, nagaalala lamang siya sa mga maliliit na negosyante na bumubuo ng karamihan sa negosyo sa bansa.

Giit pa ni Concepcion na kahit sa mga nagdaang tatlong administrasyon ay walang nagbigay ng buong P100 sa dagdag-sahod para sa mga manggagawa.   – sa ulat mula kay Gilbert Perdez ( Patrol 13).

Hinimok ng National Anti-Poverty Commission ang Department of Labor and Employment na mag-inspeksyon sa mga kumpanya upang malaman kung sumusunod ang bagong resolusyon sa usapin ng service charge.

Sa gitna ito ng hindi pagtalima ng ilang kumpanya sa nasabing kautusan ng dole na dapat ay mapunta sa lahat ng mga kawani ang 100% ng service charge.

Ayon kay NAPC Alternate Representative Sector Danilo Laserna,  mayroon pa ring mga restaurant, hotels at resorts sa bansa ang hindi sumusunod sa service charge law dahil wala nang mapupunta sa kanila.

Sa ilalim ng bagong resolusyon na inilabas ng DOLE,  100 % na ng service charge ay dapat ibigay sa mga kawani o manggagawa, mula  sa dating 85 % lamang habang ang 15 %  ay sa may-ari ng establisyimento.

Dahil dito, hinikayat ng opisyal ang mga waiter, security guard at mga serbidora na maghain ng reklamo sa kanila o sa mismong DOLE sakaling hindi nakatatanggap ng service charge  para agad maaksyunan.  – sa ulat mula kay Gilbert Perdez (Patrol 13)

Pinatawan na ng 90 araw na preventive suspension ng Land Transportation Office ang lisensya ng babaeng driver ng sports utility vehicle na sangkot sa panibagong kaso ng road rage sa Subic Bay Freeport Zone.

Ito’y dahil natunton at natukoy na ng LTO-Region 3 ang driver ng SUV na toyota fortuner sa kanyang tirahan sa Morong, Bataan.

Natunton din ang registered owner ng SUV na nakatira sa Makati City na isa ring babae.

Dahil dito, inatasan ng ahensya ang registered owner at ang driver na magsumite ng notarized explanation bago sumapit ang pitong araw matapos nilang matanggap ang show cause order.

Magugunitang nag-viral sa social media ang video kung saan tila sadyang binangga ng Toyota Fortuner na may conduction sticker na “z-7-n-7-8-8” Ang ang minamaneho ng senior citizen na Hyundai Eon na isang abugado.

Umabot sa mahigit 8,000 miyembro ng Philippine National Police ang ipapakalat sa  isasagawang mga aktibidad na may kinalaman sa ika-38 anibersaryo ng EDSA People Power Revolution sa linggo, Pebrero 25.

Ayon kay PNP Chief General Benjamin Acorda Junior, target nila mag-deploy ng 2,500 police personnel sa Cebu habang 6,000 sa Metro Manila.

Umapela pa si General Acorda sa mga magpo-protesta at mga grupo na gawing mapayapa ang kanilang mga aktibidad.

Matatandaan na ngayong taon ay hindi kasama sa listahan ng mga holiday ang pebrero a-bente singko dahil tumapat ito sa araw ng linggo.