Jenn Patrolla

Nakapagtala ang Department of Health ng anim na mga kaso ng e-cigarette or vaping use-associated lung injury o evali sa bansa ngayong taon.

Ito ay batay sa ulat ng  Philippine College of Chest Physicians mula Abril hanggang Hulyo sa kasalukuyang taon.

Ayon sa DOH, ang evali ay isang medical condition kung saan ang mga pasyente ay natutukoy na may respiratory illness o lung injury na may kaugnayan sa paggamit ng electronic cigarettes o vaping products.

Dahil dito, nanawagan ang kagawaran sa mga medical experts na kaagad na ireport sa kanila ang mga maitatalang evali cases.

Makatutulong din anya kanilang pag-rerport sa collective efforts upang sugpuin ang pagkalat ng sakit.

Walang ceasefire na ipinatupad sa exploratory talks sa pagitan ng gobyerno at mga rebeldeng komunista.

Ito ang nilinaw ng Office of the Presidential Adviser on Peace, Reconciliation and Unity matapos lumutang ang usapin hinggil sa tigil-putukan.

Ayon kay OPAPRU Presidential Assistant Wilben Mayor, ang exploratory talks ng administrasyon ni Pangulong Ferdinand Marcos Jr. kasama ang CPP-NPA-NDF ay isang bagong prosesong pangkapayapaan.

Kinumpirma pa ng opisyal na magpapatuloy ang ang anti-insurgency operations ng Armed Forces of the Philippines at pagpapanatili ng peace and order ng Philippine National Police sa gitna ng exploratory talk.

Matatandaang nagkasundo ang pamahalaan at CCP-NPA-NDF sa isang mapayapang paglutas ng armadong tunggalian gayundin ang pagwawakas ng mga armadong pakikibaka.

Tutol ang limampu’t isang Pilipino na gawing legal ang diborsiyo sa Pilipinas.

Sa tugon ng masa survey ng OCTA Research group, 41% ng mga respondents ang sang-ayon sa divorce habang 9% pa ang undecided.

Karamihan sa mga Pilipinong sumusuporta sa diborsyo ay mula sa Mindanao na may 48%, sinundan ng National Capital Region na may 46%.

May pinakamataas naman na porsyento ng pagtutol sa diborsyo ang Visayas na nasa 59%.

Ang survey ay isinagawa mula September 30 hanggang October 4, sa pamamagitan ng face-to-face interviews sa 1,200 respondents.

Una nang inaprubahan ng House of Representatives ang Divorce Bill sa unanimous vote na 12-0, gayundin ng senado.

Wala pang paggalaw sa presyo ng baboy at manok sa ilang pamilihan sa Metro Manila lalo na’t papalapit na holiday season.

Ayon sa mga vendor, naglalaro sa ₱180 ang kada kilo ng manok habang nasa ₱260 hanggang ₱300 naman ang presyo sa kada kilo ng baboy.

Mabibili rin sa halagang ₱150 ang kada kilo ng chicharong bulaklak habang ₱95 hanggang ₱120 naman ang kada kilo ng adidas o paa ng manok.

Inaasahan naman ng mga vendor na tataas pa ang presyo ng karne sa mga susunod na araw lalo’t tatlong linggo na lamang ay sasapit na ang Pasko.

Posibleng tumagal pa ng mahigit isang linggo ang mga nararanasang aftershock matapos tumama ang malakas na lindol sa Hinatuan, Surigao del Sur.

Ayon kay  PHIVOLCS Director Teresito Bacolcol, hanggang ngayon ay nakakaranas pa rin ng aftershock ang mga residente sa lalawigan.

Nag-aadjust pa aniya ang mga bato kaya makakaramdam pa rin ng  pag-uga ang mga apektadong residente ng magnitude 7.4 earthquake.

Dahil dito, pinayuhan naman ni Director Bacolcol ang mga apektadong residente na kumunsulta sa mga civil engineer at huwag munang pumasok sa kanilang mga bahay kung may makikitang mga bitak pagkatapos ng lindol.

Itinaas ng Philippine National Police ang alerto sa Metro Manila dahil sa panahon ng Christmas season at sa naganap na pagsabog sa Mindanao State University sa Marawi City.

Ayon kay PNP Public Information Office Chief Colonel Jean Fajardo, pinalakas pa ang mga checkpoint tulad ng border sa Metro Manila at Bulacan.

Anya, gumagamit din ng K9 teams sa mga bus terminals, malls, at iba pang matataong lugar upang matiyak ang kaligtasan ng publiko.

Hinigpitan din ang pagbabantay sa mga simbahan o sambahan dahil magsisimula na rin ang simbang-gabi sa Disyembre 16.

Paglilinaw naman ni Colonel Fajardo na wala namang namomonitor na banta ng pag-atake ng terorismo sa Metro Manila ngunit kailangan pa ring dagdagan ang seguridad dahil sa Christmas season.

Inako ng terror group na Islamic State of Iraq and Syria ang pambobomba sa Mindanao State University.

Sa isang communique, sinabi ng ISIS, na miyembro nila ang nag-detonate ng bomba.

Tinitignan din ang partisipasyon ng teroristang Dawlah Islamiyah Maute Group kung saan may apatnapu’t isang remnants ng Maute group sa Marawi mula sa dating isandaan.

Paghihiganti rin ang nakikitang motibo ng militar dahil sunud-sunod ang kanilang operasyon laban sa mga terrorist groups na ikinamatay ng labing isang miyembro nito kamakailan.

Una nang inihayag ni Defense Secretary Gilbert Teodoro na dayuhan ang nasa likod ng pagpapasabog.

Kumikilos na ang mga ahensya ng pamahalaan upang agad maasistehan at matulungan ang mga naapektuhan ng magnitude 7.4 na lindol na tumama sa Mindanao.

Ito ang iginiit ni Pangulong Ferdinand Marcos Jr. matapos ang malakas na pagyanig sa Surigao del Sur at iba pang lugar sa Mindanao.

Sinabi ni Pangulong Marcos Jr., na aktibong  kumikilos ang Department of Social Welfare and Development at Department of Interior and Local Government sa tulong ng local government units upang agad na maibigay ang pangangailangan ng mga naapektuhan ng lindol.

Dagdag pa ng pangulo, inaalam na ng Department of Public Works and Highways ang lawak ng pinsala sa Caraga region sa tulong ng Office of Civil Defense at NDRRMC.

Mahigpit ding nakabantay ang PHIVOLCS sa aftershocks ng malakas na lindol upang matiyak ang kaligtasan ng mamamayan sa mga lugar na naapektuhan ng malakas na pagyanig.

Asahan na bukas ang dagdag-bawas sa presyo ng produktong petrolyo.

Ayon sa Department of Energy, aabutin ng ₱0.25 hanggang ₱0.40 ang rollback sa kada litro ng diesel, habang tataas ng ₱0.25 hanggang ₱0.45 ang presyo ng gasolina kada litro.

Wala namang paggalaw sa presyo ng kerosene.

Giit ng DOE, na ang sinasabing oil price adjustment ay dulot ng galaw ng presyuhan ng petrolyo sa nagdaang apat na araw.

Ibinulgar ng Land of Transportation Office sa senado na mahigit labing tatlong milyong motorsiklo ang hindi pa nakakapagparehistro.

Subalit giit ni Senator Francis Tolentino, na batay sa kanilang naunang pagdinig noong Pebrero tungkol sa panukalang amyendahan ang Motorcycle Crime Prevention Act, may apat na milyong motorsiklo lamang ang hindi nakarehistro.

Nais sanang pigain ng senador ang LTO hinggil sa detalye ng backlog sa bawat rehiyon, partikular sa Metro Manila ngunit inamin nito na wala silang impormasyon at nangakong isusumite na lamang nila ito sa senado.

Dismayado naman si Senador Joseph Victor Ejercito dahil walang maipakitang impormasyon ang mga ipinadalang kinatawan sa LTO sa nasabing pagdinig.

Inaasahan ni Senador Ejercito na makumpleto ng LTO ang kanilang records.