Jopel Pelenio

Naniniwala si Vaccine expert panel Dr. Nina Glorianni, na maari nang payagan na maturukan ng vaccine ang mga batang 5 years old pababa upang makumpleto na ang coverage ng pagbabakuna sa bansa.

Pero ayon kay Glorianni, sa ginanap na Laging Handa briefing, dapat munang konsultahin ang doktor dahil karamihan sa mga binabakunahan sa age group na ito ang mga may comorbidities dahil mas madali silang mahawaan ng sakit.

Giit ng eksperto, sa Amerika, binabakunahan na ng Pfizer ang mga batang limang taong gulang pababa at pareho lamang ang side effects nito sa mga nakatatanda na nabigyan na ng bakuna.

Ani Glorianni, inaantabayanan na lamang nila na makapag-aplay ang Pfizer sa FDA para sa pagbabakuna sa 5 y/o pababa.

Inaayos na rin aniya ng Moderna ang kanilang mga datos para makapag-aplay na rin sa FDA sapagkat sa ngayon para sa mga batang anim na taong gulang hanggang labing isang taong gulang pa lamang ang aprubadong bakuna ng Moderna.

Maging ang Moderna ani Gloranni ay nag-aayos narin ng mga dokumento upang makakuha ng approval sa fda para makapagturok narin sa naturang age group.

Labing apat sa labing pitong lunsod sa Metro Manila ang nakitaan ng Department of Health (DOH) ng bahagyang pagtaas ng new COVID-19 cases.

Gayunman, nananatili parin, ayon kay Health Undersecretary Maria Rosario Vergeire, sa low risk classification ang buong National Capital Region (NCR).

Pahayag ni Vergiere, mayroon silang nakitang pag-uptick ng new cases sa NCR, ngunit hindi naman aniya na-sustain o nagpatuloy ang pagsirit ng kaso.

Base aniya sa datos, umakyat ng kaunti ang positivity rate sa kalakhang Maynila na umabot sa 1.6%.

Subalit binigyang-diin ni Vegeire, na hindi ito dapat na ikabahala dahil wala namang pagtaas ng admission sa mga ospital ukol sa mga malalang kaso ng virus.

Posible naman aniya na ang bahagyang pagsipa kaso sa NCR ay dulot ng mga Omicron sub-variants at paghina ng immunity ng mga tao dahil sa hindi pa natuturukan ng booster dose.

Todo paghahanda na ang National Patient Navigation and Referral Center (NPNRC) laban sa posibleng pagpasok sa bansa ng monkeypox.

Ayon kay NPNRC Operations Manager Dra. Bernadette Velasco, mayroon nang sapat na kaalaman ang kanilang mga staff para agad na matukoy ang monkeypox.

On-going narin aniya ang pakikipag koordinasyon nila sa mga health facility upang maipaalam sa kanila kung saan maaring dalhin o idulog ang mga indibidwal na hinihinalang nahawaan ng sakit.

Pero ani Velasco, wala pa silang naitatalang kaso ng monkeypox sa bansa subalit mas maganda aniyang maging handa na ang lahat laban dito.