Jopel Pelenio

Pumalo na sa P3.16-B ang halaga ng kabuuang pinsala sa agrikultura, matapos ang pananalasa ni Severe Tropical Storm Paeng sa bansa kamakailan.

Base sa Disaster Risk Reduction Management Operations Center data ng Department of Agriculture (DA), aabot sa 197,811 metric tons ang nawala sa agricultural production ng bansa , at nasa 84,677 hectares ang matinding napinsala sa mga area ng Cordillera Administrative Region, Cagayan Valley, Central Luzon, CALABARZON, MIMAROPA, Bicol, Western Visayas, Eastern Visayas, Zamboanga Peninsula, Central Mindanao, at Soccsksargen.

Halos 83,704 naman na mga magsasaka at mangingisda ang naapektuhan dahil sa Bagyong Paeng.

Ayon sa DA, kabilang sa mga apektadong commodities ang bigas, mais, high-value crops, fisheries, livestock, poultry, agricultural infrastructure, machinery, at mga equipment.

Samantala, sinabi ng DA na mayroon na silang inilaang pondo para sa mga ipamamahaging tulong at suporta sa mga affected farmers and fisherman kasunod ng paghagupit ni Typhoon Paeng sa bansa.

Nakapagtala ang Department of Health (DOH) ng 1,229 new infections kahapon.

Pero sa kabila nito, ayon sa ahensya, nakitaan naman ng pagbaba ang bilang ng active cases sa bansa na umabot na lamang sa 17,123 mula sa 18,085 nitong nakaraang Biyernes.

Kasunod ito ng naitalang mas mababa sa isang libo na mga bagong kaso ng virus sa magkakasunod na apat na araw.

Samantala, umabot na sa 4,008,550 ang kabuuang bilang ng mga nahawaan ng virus sa buong bansa.

Sa nakalipas na dalawang linggo, nakapagtala ang National Capital Region ng pinakamataas na new infections na aabot sa 3,666, sinundan ng CALABARZON na mayroong 2,262 cases, Western Visayas – 1,543; Central Luzon – 1,298; at Central Visayas-922.

Umakyat naman sa 3,927,187 ang bilang ng mga gumaling sa sakit makaraang madagdagan ito ng 2,165 na new recoveries.

Inanunsyo ng lunsod ng Maynila na pansamantala nilang isasara ang ilang lansangan upang bigyang daan  ang 2022 bar examinations.

Pahayag ng Manila LGU, ipatutupad ang road closure sa mga araw ng November 9, 13, 16, at 20.

Kasunod ito ng isasagawang pagsusulit sa San Beda University at De La Salle University.

Kabilang sa mga isasarang kalsada na malapit sa san beda university, ang mendiola street, ang 1st, 2nd, 3rd, at 4th Street, at ang Concepcion Aguila Street.

Hindi rin padadaan sa mga motorista ang ilang lansangan na malapit sa De La Salle University na kinabibilangan ng Taft Avenue Northbound, Taft Avenue Southbound.

Sisimulan naman ang pagsasara ng mga kalsadang ito ganap na alas-12 ng madaling araw hanggang alas-11 ng gabi.

Dahil dito, asahan na, ayon sa Manila LGU, ang pagbigat ng daloy ng trapiko sa mga itinakdang araw ng eksaminasyon.

Muling pamumunuan ni Atty. Romando artes ang Metropolitan Manila Development Authority (MMDA).

Kasunod ito ng ginawang pag-anunsyo ng Office of the Press Secretary sa appointment ni Artes bilang acting MMDA Chairperson.

Papalitan sa pwesto ni Artes si Carlo Dimayuga III na itinalaga lamang sa ahensya nitong nakalipas na Agosto.

Unang nanungkulan sa MMDA si Atty. Artes bilang Assistant General Manager for Finance and Administration noong May 2017, at naging General Manager noong October 2021, habang naitala naman siyang Officer-In-Charge noong February 2022.

Samantala, tuluyan itong inappoint ni dating Pang. Rodrigo duterte bilang MMDA Chairman noong Marso ng taong kasalukuyan.

Subalit kinailangang lisanin ni artes ang pwesto nito pagpasok ng Administrasyon ni Pang. Ferdinand Marcos Jr.

Apektado ang land travel o ang pagbyahe ng mga sasakyan sa ilang bahagi ng Bicol, Visayas, at Mindanao bunsod ng paghagupit ni Typhoon Paeng.

Sa inilabas na advisory ng Department of Transportation (DOTr), sinabi nito na pinapayuhan ng Land Transportation Office-Philippines (LTO) Region V ang publiko na pansamantala nilang sinuspende ang mga byahe o land travel patungo sa Masbate, Virac, Visayas, at Mindanao.

Pahayag ng ahensya, layun nito na matiyak ang kaligtasan ng mga pasahero at maiwasan ang pagkakaipon ng mga sasakyan sa Matnog at iba pang Sea Ports sa Bicol.

Giit ng DOTr, mananatili ang kautusang ito hanggat hindi nawawala ang typhoon at storm signals sa ibat ibang bahagi ng bansa dahil sa pananalasa ni Bagyong Paeng.

Masusing minomonitor ng mga Lokal na Pamahalaan ng Bulacan ang posibleng pag-apaw ng mga baybayin at ilog sa kanilang mga lugar dahil sa Bagyong Paeng.

Kabilang sa mahigpit na binabantayan dito ang mga low-lying area sa bahagi ng Marilao at Meycauayan.

Pero base sa Bulacan LGU, wala pa silang natatanggap na anumang ulat ng seryosong pagbaha sa lalawigan maliban sa pagkaipon ng tubig sa Guiguinto Footbridge kasunod ng malakas na pagbuhos ng ulan.

Samantala, nagpakawala na ng tubig ang Bustos Dam simula pa Biyernes ng gabi matapos na umabot na sa 17.17 ang water level ng dam.

Aabot naman sa 60 cubic meters per second ang pinakawalang tubig ng Ipo dam kahapon ng alas tres ng hapon makaraang umabot na sa 100.19 meters ang water level nito at malapit na sa spilling level na 101 meters.