Balik Pinas na ang 29 na Overseas Filipino Workers (OFW) mula Riyadh, Saudi Arabia.
Ito ayon sa Department of Foreign Affairs (DFA) ay pinakahuling repatriation flight ng 2022 na ikinasa ng Philippine Embassy sa Riyadh.
Kabilang sa mga umuwi ng bansa ay mga menor de edad at nasa 600 distressed OFW na ang naiuwi ng embahada mula sa Saudi Arabia sa nakalipas na taon.
Kaagad nag trabaho ang bagong chairman ng Philippine Sports Commission (PSC) matapos manumpa sa puwesto.
Si bagong PSC Chairman Richard Dickie Bachman ay nag-inspeksyon kaagad sa PSC Office maging sa mga Sports Complex facilities tulad ng Rizal Memorial Coliseum, tennis court, baseball stadium, swimming pool, multi-purpose gym at squash centers.
Si Bachman na naging commissioner ng Philippine Basketball Association (PBA) at University Athletic Association of the Philippines (UAAP) ay itinalaga ng Pangulong Ferdinand Marcos, Jr. nitong December 28 kapalit ni Noli Eala.
Nakakalat na ang health emergency response teams sa paligid ng Quirino Grandstand ang Dperatment og Health (DOH) – National Capital Region (NCR) kaugnay sa pista ng itim na Nazareno.
Ipinabatid ni Dr. Gloria Balboa, Regional Director ng DOH Metro Manila Center for Health Development na nagmula sa iba’t ibang ospital sa NCR ang mga aalalay sa mga debotong makikiisa ito sa kapistahan.
Katuwang naman aniya nila ang Manila Disaster Risk Reduction and Management Office (MDRRMO) at Disaster Risk Reduction Management in Health (DRRMH) sa pagtatayo ng medical stations.
Pinayuhan ni Balboa ang makikiisa sa pista na magsuot pa rin ng facemask at huwag nang dumalo sa mga aktibidad kapag may sintomas ng COVID-19.
Kasabay nito, sinabi ni Balboa na handa na ang mga ospital sa Metro Manla para tumanggap ng mga pasyenteng kailangan ng atensyong medikal.
Tuluy-tuloy ang clearing operations ng Metropolitan Manila Development Authority (MMDA) sa Mabuhay lanes at iba pang kalsada sa Metro Manila.
Ito ayon kay MMDA General Manager Procopio Lipanan ay kasunod nang pakikipagpulong nila sa Department of the Interior and Local Government (DILG) at Philippine National Police (PNP) na nangakong tutulong sa clearing operations.
Sinabi ni Lipanan na nakipag-ugnayan na rin sila sa mga barangay officials para mapaluwag ang mga pampublikong kalsada upang maging ligtas sa mga motorista at pedestrian.
Maglalabas din aniya ang DILG ng memorandum kaugnay sa coordinated clearing operations ng mga ahensya ng gobyerno, barangay at kapulisan.
Kanselado ang ilang klase ngayong araw na ito dahil sa masamang panahon.
Kabilang sa mga suspendido ang klase sa Brooke’s Point sa Palawan maging sa trabaho Legazpi City sa Albay – all levels, public at private.
Wala ring pasok sa eskuwela ngayong araw sa Camarines Sur – all levels, public at private.
Gayundin, sa Laguna sa mga lugar ng Bay, Cabuyao, Mabitac, Majayjay, Paete, Pangil, Santa Maria at Siniloan – all levels, public at private.
Inaasahang 5M devotees ang makikiisa sa Walk of Faith Procession sa linggo, January 8 kaugnay sa kapistahan ng Itim na Nazareno sa Lunes, January 9.
Ayon ito kay MPD chief PBGEN Andre Dizon kasabay ang pagsasabing 5,000 pulis ang ikakalat nila sa mga lugar na pagdarausan ng mga aktibidad sa kapistahan ng Itim na Nazareno ngayong taon.
Ang Walk of Faith Procession na magsisilbing alternatibo sa tradisyunal na traslacion ay magsisimula sa Quirino Grandstand hanggang simbahan ng Quiapo sa January 8 mula alas-2 ng madaling araw hanggang alas-4 ng madaling araw.
Hindi kagaya sa traslascion, ang imahe ng Black Nazarene ay hindi ilalabas o isasama sa Walk of Faith Procession.
Una nang pinabatid ni Nazareno 2023 Adviser Alex Irasga na isasagawa pa rin ang traditional activities maliban lamang sa pahalik at pasanan, bilang pag obserba pa rin sa Covid-19 health protocols.
Naglabas na ang Vatican ng ilang detalye ng Requiem Mass at ilang pagbabago rito para sa yumaong si Pope Benedict XVI.
Ipinabatid ni Matteo Bruni, Director ng Holy See Press Office na mismong si Pope Francis ang mangunguna sa Requiem Mass kung saan magbibigay ito ng homily at pagdiriwang ng Rites of Commendatio at Valedictio.
Kasabay nito ay ibinahagi ni Bruni ang ilang bagay na ilalagay sa ibabaw ng cypress wood na kabaong ng yumaong Santo Papa, tulad nang Pallium na sumisimbolo ng ecclesiastical jurisdiction at ispesyal na pakikipag ugnayan sa Santo Papa, commemorative coins at medalya na ginawa sa kanyang termino bilang Santo Papa at ang deed na nakalagay sa metal cylinder.
Pagkatapos ng misa, ilalagak ang labi ni Pope Benedict sa Grotto sa ibaba ng St. Peter’s Basilica katabi ng libingan ni St. John Paul the second bago ang kanyang beatification.
Ang libing ni Pope Benedict ay gaganapin ng bukas, January 5, alas 4:30 ng hapon, oras sa Pilipinas.
Nasa mahigit 100,000 katao na ang nakasilip sa Santo Papa simula nang buksan ang public viewing.
Patuloy ang mahigpit na monitoring ng Bureau of Quarantine (BOQ) sa mga dumating na Chinese nationals na nagpositibo sa COVID-19.
Tiniyak ito ni BOQ Deputy Director Roberto Salvador, Jr. matapos ilagay sa isolation ang mga naturang Chinese nationals na isasalang muli sa RT-PCR test sa Philippine Genome Center para malaman kung anong variant ng COVID-19 ang kumapit sa mga ito.
Muli namang siniguro ng BOQ ang mas pinaigting na border control ng bansa sa inbound travellers mula China.
Kaagad nalinis at naagapan ang posibleng epekto sa mga pananim na gulay ng andap o frost na bumalot sa isang greenhouse sa Atok, Benguet.
Nakitaan ng maninipis na yelo ang gutter ng nasabing greenhouse na nalinis din naman kaya’t hindi na nakaapekto sa mga pananim na repolyo at letsugas.
Ayon sa vegetable farmers, inaasahan na nila ang pagtama ng andap kasabay ng peak season ng amihan sa unang quarter ng taon.
Pumalo na sa halos 600,000 indibidwal ang naapektuhan ng mga pag-ulan at pagbahang dulot ng shearline.
Batay sa pinakahuling situational report ng National Disaster Risk Reduction and Management Council o ndrrmc, umabot sa kabuuang 597,858 individuals o katumbas ng 150,480 families ang naapektuhan sa Mimaropa, Bicol Region, Western Visayas, Central Visayas, Eastern Visayas, Zamboanga Peninsula, Northern Mindanao, Davao Region, Soccsksargen, Caraga, at Bangsamoro Region.
Nasa 2,811 na pamilya ang nananatili sa mga evacuation center habang 10,977 na mga pamilya naman ang nanunuluyan sa ibang mga lugar.
Samantala, nananatili naman sa 51 ang bilang ng mga nasawi dulot ng shearline, kung saan 13 rito ay kumpirmado na.
19 na indibidwal naman ang napaulat na nawawala habang 16 ang nasugatan.