Judith Estrada-Larino

Balik ang fireworks display sa Boracay sa pagsalubong sa bagong taon.

Ayon kay Mayor Frolibar Bautista ng Malay, Aklan, ibabalik nila ang taunang atraksyon sa Boracay kung saan excited ang mga may-ari ng establishments na sumali sa fireworks display sa December 31.

Ipinabatid ni Bautista na 12 lugar ang itinalaga nila sa buong Boracay na lalahok sa nasabing event.

Kasabay nito, sinabi ni Bautista na plano nilang gawing mas wholesome destination ang Boracay lalo na para sa mga pamilya.

Matapos ilunsad ang “Bawal ang pasaway sa Boracay” program na tututok sa isla bilang isang discipline zone para makapag-enjoy ang mga guest ng iba’t ibang aktibidad at accommodations.

Tuluy-tuloy ang pakikipag usap ng Department of Agriculture (DA) sa mga bansang pagkukunan ng fertilizers.

Ayon ito kay Agriculture Assistant Secretary Arnel De Mesa sa gitna na rin nang pagsasapinal ng government to government deal sa pag supply ng fertilizer sa susunod na taon.

Target aniyang sa susunod na buwan ay malagdaan na ang kasunduan sa pag supply ng mga pataba.

Ipinabatid ni De Mesa na P4-B ang inilaang halaga ng fertilizers bilang subsidy ng DA sa mga magsasaka.

Target ng DOJ na makapagtayo ng regional prisons sa susunod na taon.

Kasunod na rin ito ng pasya ng departamento na tuluyang alisin ang New Bilibid Prisons (NBP) sa Muntinlupa City.

Sinabi ni Justice Secretary Jesus Crispin Remulla na posibleng sa 2025 ay maging operational na ang hanggang apat na regional prisons partikular ang pagtatayo ng super maximum sa Mindoro Province.

Pinaplano rin aniya nilang pumasok sa Public Private Partnership (PPP) kasama ang local government units para makapagpatayo ng bagong kulungan at tuluyan nang maisara ang NBP na magiging isa na lamang government center. —sa ulat ni Bert Mozo (Patrol 3)

Tiwala si House Speaker Martin Romualdez na maaabot ng Marcos administration ang target nitong makapagpatayo ng 6-M pabahay sa loob ng anim na taon.

Binigyang diin ni Romualdez na ang nasabing pabahay program ay hindi lamang tugon sa problema sa pabahay kundi katuparan din ng pangarap ng milyong Pilipino na nagnanais magkaruon ng sariling bahay.

Una nang idinaos ang groundbreaking ceremony ng Pambansang Pabahay para sa Pilipino Program sa Barangay Atate, Palayan City sa Nueva Ecija kung saan itatayo ang A44 tower building na may 11,000 housing units.

Ipinabatid ng Department of Human Settlement and Urban Development (DHSUD) na papalo sa halos 11-M ang housing backlog ng bansa sa pagtatapos ng Marcos administration kapag hindi ito agarang matugunan.

Tinutulan ni dating COMELEC Commissioner, ngayo’y P3PWD Party List representative Rowena Guanzon ang pahayag ng DTI na uubra ang P500 para sa noche buena ng isang pamilya na may limang miyebro.

Ayon kay Guanzon, padadalhan niya si DTI Undersecretary Ruth Castelo ng Christmas gift na nagkakahalaga ng P500 kasama ang 1/8th kilo ng giniling na baboy kapag ipinaggiitan pa nito ang P500 noche buena.

Una na ring umani ng batikos si Castelo sa nasabing pahayag matapos magpalabas ang DTI ng price guide para makapamili ang publiko ng noche buena items.

Pinaalalahanan ng Land Transportation Office (LTO) ang publiko kaugnay sa road safety ngayong holiday season.

Kasunod na rin ito nang naitalang 156 road accidents kada araw sa Metro Manila sa taong ito.

Ayon kay LTO Chief Assistant Secretary Jose Arturo Tugade, dapat palaging isaisip ang kaligtasan sa kalsada lalo na sa pagtungo sa mga party at iba pang social gatherings bilang pagdiriwang ng kapaskukahan.

Matapos ang halos tatlong taong hindi nakagala  dahil sa COVID-19 pandemic, sinabi ni Tugade na kailangang mag-ingat sa daan ngayo’y malaya nang nakakagalaw ang mga tao matapos magluwag ng restrictions.

Una nang inilunsad ng DOTr ang Oplan Pasko 2022 na naglalayong matiyak ang kaligtasan, seguridad at convenience ng mga pasahero, drivers at lahat ng mga gumagamit ng lansangan sa bansa ngayon holidays.

Bahagi ng Oplan Pasko 2022 ang pagsasagawa ng mga otoridad ng terminal at roadside inspections para ma-check ang road worthiness ng mga sasakyan gayundin ang pagpapakalat ng mga impormasyon sa kaligtasan sa daan at maging ng transportation laws.

Pinarerekunsider ng Batanes Provincial Government sa Civil Aviation Authority of the Philippines (CAAP) ang anito’y over zealous o bonggang dress code na ipinatutupad sa mga paliparan kabilang ang Batanes Airport.

Sa kanyang sulat sa CAAP officials, binigyang diin ni Batanes Governor Marilou Cayco na ang probinsya bilang maliit na komunidad kung saan indigenous peoples ang karamihan sa mga nakatira, ay hindi sanay magdamit ng casual sa tuwing may susunduin o kaya naman ay kukuning mga kung anu-anong padala sa eroplano.

Itinuturing din aniyang discriminatory sa indigenous folks ang pagpapatupad ng nasabing dress code sa Basco Airport kung saan ipinagbabawal ang pagsusuot ng sando, shorts at tsinelas.

Bagamat suportado nila ang nasabing hakbang, sinabi ni Cayco na applicable o maaari lamang ipatupad ang naturang dress code sa CAAP business transactions o kung ang mga opisyal ng ahensya ay naruruon sa mismong airport.

Dismayado aniya ang mga Ivatan sa hakbangin ng CAAP bagama’t ipinag-utos ang relaxed implementation habang pinaplantsa pa ang nasabing usapin.

Inamin ni Pope Francis ang pinirmahang resignation letter na ilalabas sakaling lumala ang kanyang sakit at mabigo nang gampanan ang kaniyang tungkulin.

Ayon sa Santo Papa, 2013 pa nang pirmahan niya ang nasabing sulat na ibinigay niya sa nuo’y Vatican Secretary of State na si Cardinal Tarcisio Bertone.

Dahil sa resignation ni Bertone nuong 2013, hindi na alam ng argentinian pope kung saan niya isinumite ang nasabing sulat.

Ginawa rin aniya ng mga dating santo papa na sina Paul the 5th at Pious the 12th ang kanyang ginawa sakaling magkaruon ng permanenteng sakit at mabaldado.