Judith Estrada-Larino

Tuluy tuloy ang pakikipag ugnayan ng Public Attorney’s Office (PAO) sa DOJ at BuCor kaugnay sa pagpapalaya ng mga persons deprived of liberty (PDL).

Tiniyak ito ni PAO Chief Atty. Percida Rueda-Acosta kasunod nang pagpapalaya sa 500 PDLs.

Ito aniya ay ika-4 na batch na ng mga pinalayang PDLs at umaasa silang magsusunud sunod na ang pagpapalaya sa iba pa.

Ipinabatid ni Acosta na naisumite na nila kay BuCor Director General Gregorio Catapang ang listahan ng inmate na uubra nang palayain matapos mapagsilbihan ang kanilang sentensya.

Kabilang aniya sa mga dapat palayain ay mga overdue na sa kulungan at nakitaan ng good conduct time allowance.

Inaasahang malulusaw na ang pwersa ng CPP-NPA-NDF sa unang quarter ng 2023.

Ayon ito kay National Security Adviser Clarita Carlos matapos sumakabilang buhay ni CPP Founder Jose Maria Sison.

Sinabi sa DWIZ ni Carlos na ang pagkamatay ni Sison ay pagsisimula nang tuluyang pagbagsak ng communist insurgency para naman sumulong na ang ekonomiya ng bansa.

Pinaaalam ni Senador Cynthia Villar kung saan nanggagaling ang Salmon na nabibili sa mga palengke.

Sinabi ni Villar na nakita niya ang Certificate of Importation ng BFAR kung saan hindi kabilang ang Salmon na maaaring nanggaling sa institutional buyer para sa mga hotel at restaurant at ipinagbili sa wet market.

Dahil dito, pinare-reporma ni Villar sa BFAR ang sistema ng sa importation matapos na ring naglaban-bawi ang ahensya sa usapin ng pagbebenta ng Salmon sa mga palengke.

Tiyak na mababantayan ng publiko ang bilyung-bilyong pisong pondo na nakapaloob sa isinusulong na Maharlika Investment Fund (MIF).

Tiniyak ito ni House Speaker Martin Romualdez batay na rin sa mga probisyong sa MIF bill na inirekomenda ng Minority Bloc.

Ang inaprubahang bersyon ng MIF ay may probisyon para magamit ng publiko ang Right to Freedom of Information hinggil sa mga transaksyong papasukin ng MIF.

Kabilang sa mga naipasok na probisyon sa MIF bago maaprubahan sa ikalawang pagbasa ang Period of Individual Amendments.

Isa sa mga probisyon na maaaring silipin at makakuha ng kopya ang publiko sa lahat ng dokumento ng MIF at ng Maharlika Investment Corporation (MIC) na siyang nangangasiwa sa pondo.

Itatago rin ng National Archives of the Philippines ang investment record ng MIC.

Tumaas ng 84% ang kaso ng leptospirosis sa bansa.

Ito ayon sa DOH ay matapos sumipa na sa 3,000 ang kaso ng leptospirosis sa taong ito kumpara sa naitalang 1,784 nuong isang taon.

Ipinabatid ng DOH na ang National Capital Region ang nakapagtala ng pinakamataas na kaso ng leptospirosis na nasa 725, sumunod ang Western Visayas – 402 at Cagayan Valley – 344.

Muling nagpaalala ang DOH sa publiko na iwasang lumusong sa baha lalo na kung may sugat para makaiwas sa leptospirosis.

Hindi naniniwala ang abogado ng Pamilya Mabasa sa pahayag ni dating BuCor Deputy Director for Security and Operations Ricardo Zulueta na-na frame up lang siya ng drug lords sa usapin nang pagpaslang kay Journalist Percy Lapid.

Kasunod na rin ito nang paglantad ni Zulueta sa kauna unahang pagkakataon matapos masangkot sa Lapid Case at pagpatay sa umanoy middleman na si Jun Villamor.

Sinabi ni Zulueta na galit na sa kaniya at maging sa kanyang boss na si Suspended BuCor chief Gerald Bantag ang mga drug lord dahil sa mahigpit na seguridad na pinaiiral nila sa New Bilibid Prisons para mawala na ang mga kontrabando at maging ang mga kubol.

Ayon kay Atty. Danilo Pelagio, abogado ng Pamilya Mabasa, hindi kapani- paniwala ang pahayag ni Zulueta dahil wala silang nakikitang motibo para ipapatay si Lapid na wala naman aniyang sinasabing masama laban sa mga drug lords.

Una nang inakusahan ng NBI at PNP si Zulueta na inutusan ang gang commanders na patayin sina Lapid at Villamor, batay na rin sa utos sa kanya ni Bantag.

Posibleng maabot ng Pilipinas ang target nitong maging upper middle income economy sa 2025.

Binigyang diin ito ni Socioeconomic Planning secretary Arsenio Balisacan kasunod na rin ng pagtiyak ng Pangulong Ferdinand Bongbong Marcos, Jr. na dadalhin ang Pilipinas sa upper middle income status sa taong 2024 kung kailan maitatala ang nasa mahigit $4,000 income per capita.

Batay sa data ng Philippine Statistics Authority, ang Gross National Income (GNI) ng Pilipinas ay nasa mahigit 182,000 o $3, 300 per capita nuong isang taon, mas mataas kaysa sa peak ng pandemic year 2020 na nasa $3, 200 lamang subalit mas mababa pa rin kaysa pre-pandemic GNI.

Taong 2019 nang ilagay ang Pilipinas sa kategoryang lower middle income country matapos maitala ang GNI per capita na nasa pagitan ng one hanggang halos $4,000.

Operational na sa mahigit 350 locations ang Kadiwa ng Pasko Caravan.

Ipinabatid ito mismo ng Pangulong Ferdinand Bongbong Marcos, Jr., na nagsabi ring itutuloy-tuloy ang pagpapalawig ng Kadiwa ng Pasko Caravan sa buong bansa.

Tiwala naman ang Pangulong Marcos na maayos pa ring makakapagdiwang ng Pasko ang mga Pilipino sa kabila ng mga hamong kinakaharap ng mga ito.

Target ng PHILHEALTH na makakuha pa ng dagdag na service providers sa ilalim ng Konsultasyong Sulit at Tama (KONSULTA) package sa susunod na taon.

Ito ayon kay PHILHEALTH Corporate Communications Department Senior Manager Rey Balenia ay para matutukan nila ang ikinakasang isang pasilidad sa kada 20K katao.

Sinabi ni Balenia na sa taong ito ay nasa mahigit 2,000 KONSULTA Providers ang na accredit ng PHILHEALTH subalit kailangan pa ng dagdag na pasilidad para magamot ang mga Pilipino.

Una nang inihayag ng PHILHEALTH na ang application para sa KONSULTA Accreditation ay bukas sa non hospital facilities tulad ng rural health units, ambulatory surgical clinics at infirmaries samantalang hinihimok na ma accredit din sa programa ang mga nasa Level 1, 2 at 3 na public at private hospitals.