Judith Estrada-Larino

Naiuwi na ng DSWD ang halos 300 kababayang badjao sa Zamboanga.

Ipinabatid ito sa DWIZ ni DSWD secretary Erwin Tulfo na nagsabing target nilang maiuwi rin kaagad sa iba pang lugar sa Mindanao ang mga kapatid na Badjao na nasa Metro Manila pa.

Sinabi ni Tulfo na sa tulong ng LGU’s ay bibigyan nila ng ayuda at hanapbuhay tulad nang pagtitinda ng mga alahas ang mga Badjao para manatili na ito sa kani kanilang mga tirahan sa Mindanao.

Sa mga susunod na araw aniya ay bibigyan din nila ng tulong ang mga Badjao at maging mga Tausug na nasa bayan ng Jolo sa Sulu.

Inaasikaso namin, naipadala na po namin ‘yung 300 pero napakadami pa po nila, isang libo diyan sa Metro Manila so mayroon pa kaming iuuwi na 700 at ire-rescue, 300 na naipadala namin dito hinihintay na lang namin ‘yung pagdating ng another 300 dito so mga 600 po iyan…iuuwi po natin sila sa Basilan sa Jolo ang iba sa Tawi-Tawi ‘yung iba sa Zamboanga…’’ -DSWD secretary Erwin Tulfo, sa panayam ng DWIZ.

Isang mananaya ang bagong milyonaryo matapos tumama sa pinakahuling 6/49 Super Lotto draw.

Ayon sa PCSO, ang 6/49 winning numbers combination ay 05, 42, 40, 03, 25 at 35 na may premyong P63M at tinayaan sa Valenzuela City.

Sinabi ng PCSO na wala namang nanalo sa 6/58 Ultra Lotto Draw kung saan nakataya ang mahigit P293M.

Target ng DOST na makipag-partner sa local businesses.

Ito ay kaugnay sa plano ng DOST na magkasa ng science and technology scholarship program na mayroong entrepreneurship training.

Sinabi ni DOST secretary Renato Solidum, Jr. na layon ng naturang hakbangin na mahimok ang mga scientist at mga kabataang magkaroon ng kaalaman bilang entrepreneurs.

Sa science and technology, ipinabatid ni Solidum na engineering at math ang focus kaya’t nais nila aniyang magkaroon ng training ng entrepreneurship upang hindi lamang sa agham ang matutukan.

Magugunitang binigyang-diin ng Pangulong Ferdinand Marcos, Jr. na dapat makipag-partner ang mga scientist at researcher sa national government at ibahagi rito ang kanilang skills upang mapataas ang antas ng pamumuhay ng mga Pilipino at makatulong sa bansa.

Dalawa hanggang 13% ang itinaas ng presyo ng mga pangunahing bilihin sa nakalipas na ilang linggo habang papalapit ang Christmas season.

Ipinabatid ito ni Steven Cua, pangulo ng Philippine Amalgamated Supermarkets Association Incorporated kung saan ilan sa mga nagtaas ay may sangkap na asukal tulad ng ready to drink beverages, chocolate, jelly at peanut butter.

Sinabi ni Cua na mahigit 20 manufacturers ang humiling ng dagdag-presyo kabilang ang non-essential items.

Para sa Noche Buena items, inihayag ni Cua na uubrang mamili ng mas murang uri ng goods tulad ng fruit cocktail na ang imported ay nasa 13% ang itinaas na presyo samantalang hindi naman ganito ang iniakyat ng halaga ng local fruit cocktail.

Una nang nagpalabas ng price guide ang DTI para sa mga consumer at retailer sa pagbili ng Noche Buena products ngayong Kapaskuhan.

Sinira ng matinding pagbaha ang ilang kabahayan at isang tulay sa Pigcawayan, Cotabato.

Partikular na naapektuhan ng nasabing pagbaha, ayon sa awtoridad ang barangay Kimarayag kung saan nag-evacuate ang mga residente na wala na ring nagawa sa pag-anod ng baha sa kanilang mga alagang hayop at livestock.

Sinabi ng PAGASA na ang matinding pag-ulan sa Mindanao ay dulot ng ITCZ o Intertropical Convergence Zone na epektibo pa rin hanggang ngayong araw na ito na magdudulot din ng pag-ulan at pagkidlat sa Eastern Visayas at Caraga.