Judith Estrada-Larino

Nakikiisa si DILG Secretary Benhur Abalos, Jr. sa pagkilala ng Pangulong Ferdinand Marcos sa 10 Local Government Unit Awardees sa 2022 Galing Pook Awards bilang huwaran ng good governance at innovation.

Binigyang diin ni Abalos na natutuwa siya sa epektibong liderato ng mga naturang LGU sa pamamagitan ng mga binubuong programa at solusyon sa mga problema.

Sinabi ni Abalos, Chairperson ng Board of Judges, na dapat maipagpatuloy ang isinusulong ng mga nasabing LGU na innovation para sa pinaigting na public service na dapat magsilbing inspirasyon sa iba pang LGU.

Isa aniya itong malaking tagumpay sa pagkilala sa kahusayan sa paglilingkod bayan.

Kabilang sa mga pinarangalang LGU sa 2022 Gawad Pook Award ang Libertad Fish Forever Savings Club ng Libertad, Antique; Advancing and Sustaining Good Governance and Community Actions Towards Resiliency and Empowerment mula sa Basilan Provincial Government; I-Bike: A Program Promoting the Development of the Iloilo City Bike Culture ng lungsod; Yaru: A Whole Community Approach Towards Disaster Management mula sa Itbayat, Batanes.

Pasok din sa nasabing parangal ang mga programa ng lalawigan ng Bataan; Tanay, Rizal; Alcala, Cagayan; Goa, Camarines Sur; Biñan, Laguna; at Piddig, Ilocos Norte.

Halos 200 LGUs ang nagsumite ng kanilang application para sa naturang parangal na ang tema ay: Padayon Para Sa Ligtas, Matalino at Matatag na Pamayanan.

Posibleng sumirit pa ang presyo ng kada kilo ng asukal.

Ayon ito mismo sa mga nagtitinda ng asukal , batay na rin sa abiso ng kanilang suppliers.

Nasa P105 kada kilo ang presyo ng refined o white sugar samantalang P85 naman ang brown at washed sugar sa maraming pamilihan partikular sa Quezon City.

Samantala, tuluy-tuloy naman ang bentahan ng murang asukal sa tanggapan ng Sugar Regulatory Administration sa QC.

Gayunman, limitado lamang sa limang kilo o P70 kada kilo ang uubrang bilhin ng bawat isang tao.

Matagumpay na idinaos ang 44th Catholic Mass Media Award (CMMA)  ngayong taon.

Kasunod na rin ito ng dalawang magkasunod na taong hindi naisagawa ng face to face ang naturang paggagawad ng parangal sa mga natatanging programa , palabas o artikulo sa dyaryo , radyo,  telebisyon at digital media.

Sa kanyang mensahe, ipinaabot ni CMMA Acting Chairman at ALC Group Chairman D. Edgard Cabangon.

Ang pagbati sa iba’t ibang media organization na nakatanggap ng parangal sa pagkakaroon nito ng tapang at dedikasyon sa paghahatid ng mga impormasyon sa publiko.

Binigyang pagkilala rin ni Cabangon ang paggamit ng mga talento ng broadcast communicators sa pagbuo ng malilikhain at worthy media broadcast na nagpapakita ng kaugalian at pananampalataya ng isang kristiyano.

Habang kabilang sa mga binigyang diin naman ni Manila Archbishop Jose Cardinal Advincula ang  tema ng CMMA ngayong taon na umikot sa temang “Communicating by Encountering People Where and as They Are”.

Kabilang na sa mga parangal ay ang Student CMMA Awards para sa mga natatanging gawa o produksyon ng mga mag-aaral.

Kabilang na rito ang Best Student Organ, Best Student Public Service Print Ad, Best Student Public Service Radio Ad, Best Student Public Service TV Ad, Best TV Production at Best Short Film gayundin ang Best Website para sa kategorya ng internet awards.

Bahagi rin ng CMMA ang Advertising Awards gaya ng Best Digital at TV Award samantalang naigawad na rin sa iba’t ibang pahayagan ang Best Special Feature, Editorial Cartoon, Comic Story, News Photograph at Opinion Column sa kategorya naman ng Print Awards.

Habang naigawad na rin ang CMMA Award sa mga natatanging programa sa radio kabilang na rito ang  Best Counseling Program, News Commentary, News Feature, Best Public Service Program, Best Entertainment Program at Best Educational Program. —sa ulat ni Tina Nolasco (Patrol 11)

Muling magkakasa ang Department of Health ng panibagong round ng national vaccination days para mas marami pa ang mahimok na magpa-bakuna kontra COVID 19.

Ayon kay health OIC Maria Rosario Vergeire, makatutulong ang tatlong araw na bakunahan sa buong bansa para maging mas madaling ma-access ang COVID 19 jabs.

Ipinabatid ni Vergeire na ang ibinibigay ng gobyerno ay pangunahing bakuna sa lahat ng indibidwal na limang taong gulang pataas, mga unang booster sa lahat ng 12 taong gulang pataas at second booster para sa senior citizens, healthcare workers, with commorbidities at immunocompromised.

Kasabay nito, tiniyak muli ni Vergeire ang pagsusulong ng pagpasa sa panukalang Center for Disease Control Law para sa tuluy-tuloy na pagtugon kontra COVID 19 kahit pa matapos ang deklarasyon ng National State of Calamity sa December 31.

Puspusan ang paghahanda ng Department of Education sa pagpapatupad ng learning recovery program nito.

Kasunod na rin ito nang isinagawang 2022 national planning conference na may temang learning recovery, resiliency and unity.

Naka-sentro ang conference sa pagpapabatid sa mga field office nang pagkakasa ng BEDP 2030 o basic education development plan na kinabibilangan ng mga makabagong tugon at mga hakbangin mula sa lahat ng strand at unit ng DepEd para makatugon sa education needs sa sektor ng basic education .

Hinimok ni Vice President at education secretary Sara Duterte ang publiko na suportahan ang gobyerno para mapabuti ang kalidad ng edukasyon ng bansa sa pamamagitan ng evidence in planning, research programming at policy development.

Responsibilidad ng bawat isa ang panatilihing ligtas ang mga kalsada lalo na sa mga bata.

Binigyang diin ito ni Transportation Undersecretary Mark Pastor sa paggunita ngayong araw sa National Day of Remembrance for Road Traffic Victims, Survivors and their Families.

Batay sa record, nasa 12,000 Pinoy kabilang ang mahigit 1,800 bata ang namamatay sa road crash kada taon.

Bahagi rin ng pagdiriwang ang pagpapakita sa ginawang mural na “Keeping our Streets for Children” na nakalagay sa children’s road safety park ng MMDA kung saan mahigit 1,600 hand prints ng nga kabataang Pinoy na umaapelang gawing ligtas ang mga kalsada sa bansa para sa mga bata.

Binuo ang National Coalition for Child Traffic Injury Prevention na pinangungunahan ng DOTr at ibang ahensya, NGOs, academe, private sectors at civil society groups para matiyak na matutugunan ang problema sa road safety sa bansa.

Tiwala ang Department of Trade and Industry (DTI) na maikakasa kaagad ang plano ng Thailand na palawigin ang operasyon ng mga kumpanyang Thai sa Pilipinas.

Ayon ito kay DTI Secretary Alfredo Pascual matapos ang pagdalo ng Pangulong Ferdinand “Bongbong” Marcos, Jr. sa APEC Summit.

Sinabi ni Pascual, bahagi ng delegasyon ng Pilipinas na ipinaabot ng ilang kumpanya ng Thailand ang plano nilang expansion ng kanilang operasyon sa Pilipinas.

Kabilang sa mga kumpanyang ito ay nasa sektor ng construction, agriculture, retail, renewable energy at posibleng investments sa connectivity ng Pilipinas.

Una nang hinimok ng Pangulong Marcos ang Thai firms tulad ng CP Group na makiisa sa Public Private Partnership (PPP) Projects.