Judith Estrada-Larino

Mas madaling koordinasyon ng Pangulong Ferdinand “Bongbong” Marcos, Jr. sa mga ahensya ng gobyerno
Ito ayon kay agriculture undersecretary Khristine Evangelista ang number 1 factor kaya’t nais nilang manatiling agriculture secretary ang Pangulong Marcos.
Sinabi ni Evangelista na mas maraming mareresolbang mga problema at concerns kapag mismong ang Pangulong Marcos ang nanguna sa koordinasyon sa iba pang ahensya ng gobyerno.
Magugunitang sa resulta ng Publicus Asia pahayag 2022 quarterly survey mula September 16 hanggang 20, 63% ng 1,500 respondents ang naniniwala sa kakayahan ng Pangulong Marcos na maging pinuno ng Department of Agriculture.

Nagsagawa ng clearing operations ang MMDA sa mga daan patungo sa dalawang sementeryo sa Caloocan at Malabon, isang linggo bago ang paggunita sa araw ng mga patay.

Nilinis at inayos ng mga tauhan ng MMDA ang mga daan patungong Tugatog Public Cemetery sa Malabon at Sangandaan Cemetery sa Caloocan.

Kaugnay nito, tiniyak ni MMDA Task Force Special Operations Chief Bong Nebrija na imo-monitor nila ang mga sementeryo araw araw hanggang Undas para masigurong libre ang mga ito sa illegal parking at illegal vendors.

Ipinabatid ni Nebrija na ilang motorista ang pinagmulta ng 1,000 piso dahil sa illegal parking samantalang itinow nila ang sasakyan ng Caloocan City Disaster Risk Reduction Office na nag park sa no parking sign katabi ng Sangandaan Cemetery.

Bukod sa mga sementeryo, iinspeksyunin din ng MMDA ang mga bus terminal at itutuloy ang road clearing operations kahit tapos na ang holiday para ma-assist ang mga pabalik naman ng Metro Manila mula sa mga lalawigan.

Iniimbestigahan na ng Civil Aviation Authority of the Philippines (CAAP) ang pag overshoot ng isang eroplano ng Korean Air sa runway ng Mactan Cebu International Airport (MCIA), kagabi.

Batay sa initial imbestigasyon ng CAAP, dalawang beses sinubukan ng Airbus SE A330 flight KE361 galing Seoul na mag landing subalit dahil sa sama ng panahon ay nag overshoot ito sa runway sa ikatlong pagkakataon nang muling subukang lumapag.

Humingi na rin ng paumanhin si Korean Air President Keehong Woo sa mga naapektuhang pasahero kasabay ang pagtiyak ng imbestigasyon sa nasabing insidente. —sa ulat ni Raoul Esperas (Patrol 45)

Stranded pa ang maraming pasahero sa Mactan Cebu International Airport (MCIA) matapos mag overshoot ang isang eroplano ng Korean Air sa isang runway ng nasabing paliparan kagabi.

Ayon ito kay Edilyth Maribojoc ng GMCAC Cebu Airport Cooperation Public Affairs, sa gitna na rin ng patuloy na imbestigasyon sa nasabing insidente.

Naipaabot na aniya nila sa mga airlines na dapat gumawa ng kinakailangang adjustments dahil hindi pa magagamit ang naturang runway kung saan naruon pa rin ang sumadsad na eroplano ng Korean Air.

Ligtas namang nai evacuate sa MCIA Terminal 2 ang lahat ng 162 passengers na kinabibilangan ng 160 adults at dalawang sanggol at 11 crew para sa medical evaluation bago payagang makaalis sa airport. —sa ulat ni Raoul Esperas (Patrol 45)

Hinimok ni Senate Minority Leader Aquilino Koko Pimentel, III ang Pangulong Ferdinand Bongbong Marcos, Jr. na magtalaga na ng kalihim ng Department of Health.

Sinabi ni Pimentel na kung sinuman ang bagong DOH Secretary, ay dapat suportahan ng pangulo para mapangunahan ang bansa na “live with the virus”.

Ayon kay Pimentel, hindi naman lahat ay krisis kayat dapat ay ma normalize ang trabaho ng gobyerno partikular sa DOH at DA.

Sa ngayon ay OIC pa rin sa DOH si Undersecretary Maria Rosario Vergeire.

Hindi na ituturing na “Emergency” ng Pilipinas ang COVID-19 pandemic.

Ayon ito sa Pangulong Ferdinand Bongbong Marcos, Jr. bagamat mananatili ang idineklarang State of Calamity sa buong bansa dahil pinaplantsa pa ang ilang usaping may kinalaman sa pandemya.

Binigyang diin ng pangulo na kailangan nang kumawala ng bansa sa emergency situation para makapagbukas na rin ang lahat ng mga negosyo at tuluy tuloy na ang pagpasok ng mga turista.

Inihayag pa ng pangulo na batid na ng DOH ang pagtukoy sa mga itinuturing na vulnerable sa COVID-19 kumpara nuong bago pa lamang ang pandemya na tila nangangapa ang buong mundo. —sa ulat ni Gilbert Perdez (Patrol 13)