Judith Estrada-Larino

Suportado ng Philippine Chamber of Commerce and Industry (PCCI) ang panukalang nag aalis sa value added tax (VAT) sa mga pangunahing bilihin.

Sinabi ni PCCI President George Barcelon na kapwa consumers at mga negosyo ang makikinabang kapag tinanggal ang VAT sa tinapay, asukal, cooking oil at iba pa.

Ayon kay Barcelon, maiibsan ang paghihirap ng mga Pilipino sa mataas na presyo ng bilihin kapag naalis ang VAT.

Makakatulong din aniya ang nasabing hakbang sa mga lokal na negosyo sa bansa para makapagbenta ng mas marami pang mga produkto.

Tatlong kondisyon ang itinakda ng Department of Health (DOH) para maalis ang State of Public Health Emergency sa bansa dahil sa COVID-19.

Kabilang sa mga kondisyong ito, ayon kay Health OIC Maria Rosario Vergeire ang plateauing of cases, improved vaccination coverage at minimal severe and critical admissions sa mga ospital.

Sinabi ni Vergeire na nais lang nilang matiyak na protektado na ang senior citizens, persons with commorbidities at mga bata kontra COVID-19.

Susuriin muna aniya ng DOH ang bilang ng mga nahawahan ng COVID-19 lalo na ang mga severe at critical cases gayundin ang mga admission sa ospital bago irekomenda ang pagtatanggal nang idineklarang State of Public Health Emergency.

Malaki ang posibilidad na magtuluy tuloy ang pagtaas ng presyo ng oil products sa susunod na linggo.

Ito ayon kay Director Rino Abad ng Oil Industry Management Bureau ay sakaling hindi i atras ng Organization of Petroleum Exporting Countries (OPEC) ang bantang bawasan ng dalawang milyong bariles kada araw ang kanilang oil production sa susunod na buwan.

Gayunman, hindi tinukoy ni Abad kung magkano ang posibleng panibagong taas presyo.

Magugunitang nasa 1.20 hanggang sa halos P7 ang dagdag sa presyo ng oil products kahapon.

Halos 17 million National ID cards ang nai-deliver na.

Ito ayon kay PSA OIC Deputy National Statistician Fred Sollesta ay mula sa 21. 6 million printed National ID cards.

Ipnabatid ni Sollesta na posibleng sa katapusan ng taong ito o sa unang bahagi ng 2023 ay magpapalabas sila ng downloadable mobile version ng National ID para magamit na ng publiko.

Sinabi ni Sollesta na masyadong mabilis ang registration na hindi naman natapatan ng backend process dahil sa ilang considerations tulad ng mahigpit na requirements sa ilalim ng procurement process.

Sinelyuhan ng Pilipinas at Indonesia ang mga panuntunan kaugnay sa paglalatag ng pundasyon para sa delimitation ng kani-kanilang Continental Shelf Boundary.

Ang Continental Shelf Boundary ay kapwa priority ng gobyerno ng Pilipinas at Indonesia.

Ayon sa DFA, magkakasabay na nilagdaan ng mga kinatawan ng dalawang gobyerno.

Sa pamamagitan ng video conference ang mga dokumentong nasa ilalim ng The Principles and Guidelines hinggil sa Continental Shelf Boundary.

Kaugnay nito, muling pinagtibay nina Foreign Affairs Secretary Enrique Manalo at counterpart nitong si Minister Retno L. P Marsudi ang negosasyon ng Continental Shelf Boundary bilang sideline ng UN General Assembly.

2014 nang magkasundo ang Pilipinas at Indonesia na limitahan ang kanilang Exclusive Economic Zones.