Judith Estrada-Larino

Iniimbestigahan na ng Pangasinan Provincial Police Office (PPO) ang report na panghaharass umano ng mga pulis-Bayambang sa mga magsasaka ng sibuyas kabilang ang isang humarap sa pagdinig ng senado.

Tiniyak ni Pangasinan Police Director Police Colonel Jeff Fanged na pananagutin niya ang mga nasabing pulis kapag napatunayang totoo ang alegasyon laban sa mga ito.

Una nang ibinunyag ni Senador Imee Marcos ang natanggap na impormasyon na nagtungo sa bahay ng isang Merly Gallardo at iba pang onion farmers ang mga pulis-Bayambang para papirmahin base na rin umano sa direktiba ng DILG at NTF-ELCAC ang mga ito hinggil sa pag atras ng kanilang senate testimony.

Mahigpit nang mino-monitor ng Department of Agriculture (DA) ang bentahan umano ng mga jumbo o malalaking imported onions.

Ayon ito kay Agriculture Spokesperson Khristine Evangelista lalo pa’t wala pang report na dumating na sa bansa ang mahigit 5,000 tonelada ng imported na sibuyas.

Dahil dito, pinag-iingat ni Evangelista ang publiko sa pagbili ng mga imported na sibuyas sa merkado na maaaring smuggled at hindi dumaan sa phytosanitary inspection.

Tiniyak naman ni Assistant Secretary Rex Estoperez ang patuloy na operasyon ng inspectorate and enforcement unit ng DA para kumpiskahin ang smuggled onions.

Posibleng ngayong linggo ay dumating na sa bansa ang inangkat na sibuyas para bumaba ang presyo nito.

Kumikilos na ang halos 40 samahan ng mga OFW sa Hong Kong para isulong ang pagbasura sa Overseas Employment Certificate (OEC).

Ayon sa mga OFWs, target nilang makakalap ng 40,000 pirma via online at face to face para isumite sa tanggapan ng Philippine Overseas Labor Office (POLO), kongreso at Department of Migrant Workers (DMW).

Kasabay nito, ipinabatid ng OFW organizations ang pagbasura sa mandatory contributions nila tulad ng PhilHealth, Pag-Ibig, SSS at compulsory insurance.

Pinaboran ng Teachers Dignity Coalition (TDC) ang naging rekomendasyon ng Senate Blue Ribbon Committee sa isyu nang pagbili ng overpriced at outdated laptops ng Department of Education (DepEd).

Sinabi ni TDC Chairman Benjo Basas na tama lamang ang rekomendasyon ng senado na panagutin sa usapin ang mga sangkot na dating opisyal ng DepEd at maging ng DBM Procurement Services.

Ayon kay Basas, natutuwa sila sa ginawa ng senado na pinatunayang dapat nang matigil ang korupsyon sa DepEd.

Una nang pinakakasuhan ng paglabag sa Republic Act 3019 o Anti-Graft and Corrupt Practices Act sina dating DepEd Undersecretaries Alain Del Pascua at Annalyn Sevilla, dating Assistant Secretary Salvador Malana III, director abram Y.C. Abanil, dating DBM-PS OIC Executive Director Lloyd Christopher Lao, dating PS-DBM OIC Executive Director Jasonmer Uayan at Bids at Awards Committee Chairman Ulysses Mora.

Iniimbestigahan na ng CHR at BJMP ang umano’y strip search ng kaanak ng isang bilanggo sa Metro Manila District Jail Annex 4 sa Camp Bagong Diwa sa Bicutan City.

Kasunod na rin ito, ayon sa CHR ng natanggap nilang reklamo na isinasailalim sa strip search ang mga bumibisita sa nasabing bilangguan.

Sinabi ng CHR na batay sa reklamo ng isang babaeng visitor nuong January 8, habang binibisita niya ang kanyang tatay ay dinala siya sa isang kuwarto na walang pintuan o kahit man lang kurtina at sinabihan siyang itaas ang kaniyang shirt para makapag search sa kanyang undergarment o bra ang jail custodian sa posibleng kontrabando.

Bukod dito, binubuksan din at ginagalaw sa pamamagitan ng stick ang mga pagkaing nasa container na dala ng mga bisita.
Inihayag pa ng CHR na hindi man lang nasabihan ang biktima ng kanyang mga karapatan o papirmahin man lang ng waiver bago isagawa ang pagse-search.

Hindi rin pinapasok ang asawa ng biktima sa premises kaya’t lalo itong napahiya.

Binigyang diin ng CHR na hindi naaayon sa Mandela Rules gayundin sa operations manual ng BJMP ang nasabing insidente.

Tuluy-tuloy ang imbestigasyon ng DOTr sa nangyaring technical glitch sa NAIA nitong nakalipas na January 1.

Ipinabatid ito ni Transportation Undersecretary for Aviation Roberto Lim kasunod nang muling pagtiyak sa transparency ng resulta ng imbestigasyon.

Ayon kay Lim, may binuo na silang independent investigating body para tutukan ang usapin.

Kabilang dito ang NBI, National Intelligence Coordinating Agency (NICA), Cybercrime Investigation and Coordinating Center at DICT.

Posibleng ilikas ng lokal na pamahalaan ng Samar ang mga binahang residente nito dahil sa low pressure area.

Ayon kay Manuel Van Torrevillas, pinuno ng Provincial Disaster Risk Reduction and Management Office, ina-assess na ng Engineering Office ang low lying areas at mga bahay na palagiang binabaha kung saan magandang paglipatan sa mga ito o ma-relocate sa mas mataas na lugar.

Sinabi ni Torrevillas na nakabalik na rin sa kani kanilang mga bahay ang halos 21,000 families na una na nilang inilikas.
Kasabay nito, nagpapasaklolo na rin si Torrevillas para sa sektor ng agrikultura sa lalawigan.