Tuluy-tuloy ang imbestigasyon ng DOTr sa nangyaring technical glitch sa NAIA nitong nakalipas na January 1.
Ipinabatid ito ni Transportation Undersecretary for Aviation Roberto Lim kasunod nang muling pagtiyak sa transparency ng resulta ng imbestigasyon.
Ayon kay Lim, may binuo na silang independent investigating body para tutukan ang usapin.
Kabilang dito ang NBI, National Intelligence Coordinating Agency (NICA), Cybercrime Investigation and Coordinating Center at DICT.
Pinadapa ng Milwaukee Bucks ang Toronto Raptors sa kanilang sagupaan tungo sa final score na 130-112.
Pinangunahan ni star player Jrae Holiday ang panalo ng Bucks sa nasabing laban matapos magpaulan ng season high 37 points habang absent ang power forward player ng Bucks na si Giannis Antetokoumpo.
Nagsilbing suporta kay Holiday si Grayson Allen na gumawa ng 25 points.
Gumawa naman ng 39 points si Fred Van Vleet ng Raptors.
Sinasabing hanggang sa huling minuto ng laro ay tinangka ng Raptors na mangibabaw sa Bucks subalit hindi sila umubra.
Posibleng ilikas ng lokal na pamahalaan ng Samar ang mga binahang residente nito dahil sa low pressure area.
Ayon kay Manuel Van Torrevillas, pinuno ng Provincial Disaster Risk Reduction and Management Office, ina-assess na ng Engineering Office ang low lying areas at mga bahay na palagiang binabaha kung saan magandang paglipatan sa mga ito o ma-relocate sa mas mataas na lugar.
Sinabi ni Torrevillas na nakabalik na rin sa kani kanilang mga bahay ang halos 21,000 families na una na nilang inilikas.
Kasabay nito, nagpapasaklolo na rin si Torrevillas para sa sektor ng agrikultura sa lalawigan.
Bubuo ang COMELEC ng sariling Cybersecurity Division para tugunan ang posibleng data breach o hacking sa server nito.
Ayon ito kay COMELEC Spokesperson John Rex Laudiangco matapos i-absuwelto ng National Privacy Commission (NPC) ang COMELEC at Smartmatic sa reklamong data breach.
Sinabi ni Laudiangco na ang Cybersecurity Division ay bahagi ng road map kasabay ang pagpapatibay sa technological systems ng poll body para sa mga susunod na halalan.
Nakikipag ugnayan na aniya sila sa NPC at kumukunsulta sa kanilang law department, OSG at DOJ para sa binubuong Cybersecurity Division.
Humihingi ng dagdag na 3% hanggang 4% na dagdag sa presyo ang isang grupo ng mga gumagawa ng sardinas.
Ayon kay Francisco “Bombit” Buencamino, Executive Director ng Canned Sardines Association of the Philippines (CSAP), krusyal ang langis sa kanilang operasyon lalo na’t ito ang nagpapatakbo sa mga bangka na ginagamit sa paghuli ng mga isda.
Sinabi ni Buencamino na 2019 pa pinakahuling naaprubahan ang dagdag presyo sa kanilang produkto gayung halos taun-taon ay nagkakaruon ng serye ng pagtataas sa halaga ng langis.
Inamin ni Buencamino ang pressure na palakihin ang produksyon ang catching season sa siyam na buwan kada taon at ang tatlong buwang nalalabi ay non-fishing season para maka recover ang sardine population.
Bumaba ng bahagya ang presyo ng sibuyas sa ilang palengke sa Metro Manila.
Nabatid na nasa P330.00 mula sa P350.00 ang kilo ng sibuyas partikular sa Mega Q Mart sa Quezon City at nasa P280.00 kada kilo sa bagsakan area malapit dito, bagamat P20.00 pa rin kada piraso ng sibuyas sa ilang talipapa.
Bumaba rin ang presyo ng talong na nasa P100.00 na kada kilo, ampalaya P140.00, kamatis P60.00, siling labuyo P180.00 hangang P200.00, bawang P90.00 at sitaw P140.00.
Wala namang paggalaw sa baguio vegetables kung saan nasa P80.00 kada kilo ang carrots, patatas at pipino P120.00 at repolyo P80.00.
Samantala, mayruon nang mabibiling murang itlog na nasa P7.50 hanggang P7.80 na ang isa.
Walang kinalaman ang Leonel Waste Management Corp. sa ga-bundok na basura na hindi nakolekta sa 16 na barangay sa lungsod nitong nakaraang 3 linggo.
Ito ang iginiit ni Parañaque Vice Mayor Joan Villafuerte matapos ang naging pahayag ni Mayor Eric Olivarez na posibleng “Sinabotahe” raw ng Dating Contractor matapos maranasan ng mga residente ang pagtambak ng mga basura sa kalye.
Aniya, ang dapat sagutin ni Olivarez ay kung bakit nito nilagdaan ang kontrata ng Metrowaste Solid Management Corp.(Metro Waste) na hindi dumaan sa konseho noong December 27, 2022.
Pangalawa, ang kontrata ng lungsod sa Leonel noong isang taon ay nagkakahalagang P 414, 240 – M lamang habang ang metrowaste ay P 414, 803 – M , o mas mababa ng P 373 ,000 , pero na award ang kontrata rito.
Ayon pa sa bise-alkalde, ipinagtataka ng ilang konsehal kung bakit parang hindi aniya alam ng alkalde na ang Leonel ay naging garbage contractor ng lungsod ng 9 na taon, kung saan ang Alkalde noon ay ang mismong nakakatanda niyang kapatid na si Congressman Edwin Olivarez.
Matatandaang nagbigay ng privilege speech sina councilor Rico Golez at Jomari Yllana sa isang special session kung saan kinuwestyon din nila ang madaliang pag-award ng kontrata sa metrowaste.
Aprubado na ng Department of Budget and Management (DBM) ang mahigit P14-B na pondo para sa regular pension ng mga military retiree.
Sinabi ng DBM na ang naturang pondo sa ilalim ng Special Allotment Release Order (SARO) ay ipapalabas na sa DND.
Ang Notice of Cash Allocation (NCA) ay sumasakop sa pension mula January hanggang March 2023.
Ayon kay Budget Secretary Amenah Pangandaman, responsibilidad ng gobyerno na tiyaking makukuha ng mga retiree ang mga benepisyong para sa kanila gayundin sa kanilang pamilya.
Hanggang nitong nakalipas na December 31, nasa halos 138,000 pensioners na ang pasok sa buwanang pension requirement sa unang quarter ng taong ito.
Kanselado ang ilang biyahe ng eroplano ngayong araw na ito dahil sa masamang panahon na dala ng low pressure area sa Visayas at Mindanao.
Ayon sa MIAA, kabilang sa cancelled flights ay biyahe ng Cebu Pacific mula Maynila pa Virac, Catanduanes at pabalik.
Gayundin ang Cebgo flights mula Maynila pa Masbate at pabalik at Manila – Naga at vice versa.
Tinapos ng social media ang pagtatago ng isang wanted person sa Maynila.
Kasunod na rin ito nang pagkakatimbog ng mga pulis Maynila sa Pulilan, Bulacan kay alias Rence, miyembro ng isang gun for hire.
Ayon sa mga otoridad, ang suspek ay nagpanggap pang napatay sa isang engkuwentro sa Tondo, Maynila nuong 2019 subalit nagtago lamang pala sa iba’t ibang bahagi ng bansa.
Natunton ng PNP ang kinaroroonan ng suspek dahil sa mga post nito sa social media.
Ang suspek ay nahaharap sa mga kasong murder at attempted murder.