Judith Estrada-Larino

 Tiyak nang malulusaw sa unang quarter ng taon ang limang natitirang guerilla fronts sa bansa.

Ayon ito sa National Security Council (NSC) sa gitna nang rin nang paglalatag ng year end accomplishment report ng National Task Force to End Communist Armed Conflict (NTF-ELCAC) sa Malakanyang.

Binigyang diin ni National Security Adviser Clarita Carlos ang kahalagahan nang pagpapatuloy ng momentum ng NTF-ELCAC para tuluyang tapusin ang insurgency.

Ipinabatid ni Carlos na inatasan na niya ang NTF-ELCAC na ayusin na ang road map nito sa implementation plan para lusawin na ang lahat ng guerilla fronts sa taong ito.

Balik ang libreng sakay program ng gobyerno kabilang ang Edsa Bus Carousel system.

Binigyang-diin ito ni Budget Secretary Amenah Pangandaman matapos aniyang maglaan ng mahigit isang bilyong piso para sa service contracting program ngayong taon sa ilalim ng 2023 budget ng Department of Transportation (DOTR).

Magugunitang nagtapos na nitong January 1 ang libreng sakay na programa ng DOTR at LTFRB para matulungang makaagapay ang commuters sa tumataas na presyo ng mga bilihin at serbisyo.

Inilarga na ng Land Transportation Franchising and Regulatory Board (LTFRB) at Landbank of the Philippines ang pamamahagi ng fuel subsidy sa mahigit 10,000 kuwalipikadong tricycle drivers sa Metro Manila, Central Luzon at Ilocos region.

Kasunod na rin ito nang inilabas na 10. 3 million pesos na pondo ng Landbank para sa isanlibong pisong fuel subsidy sa kada tricycle driver.

Makukuha aniya ng tricycle driver ang nasabing subsidy sa mga itinalagang sangay ng landbank.

Ang hakbang ay bilang suporta sa public utility vehicle drivers na apektado ng sumisirit na presyo ng mga produktong petrolyo.

 Pormal nang nanungkulan si Rolando Ledesma Macasaet bilang Pangulo at Chief Executive Officer ng Social Security System (SSS).

 Pinalitan ni Macasaet si Michael Gonzales Regino na pitong taong nanungkulan sa SSS.

 Tiniyak ni Macasaet na tuluy-tuloy ang pagpapatupad ng mga reporma para mapaigting pa ang serbisyo ng SSS sa mga Pilipino.

 Bago maitalaga sa SSS si Macasaet ay naging president at general manager ng Government Service Insurance System (GSIS) sa ilalim ng administrasyong Duterte.

Nagkasa ng limang taong programa ang United States Agency for International Development (USAID) para sa 30,000 maliliit na negosyante sa bansa.

Ayon kay US Ambassador to the Philippines Mary Kay Carlson pinondohan ng 18 million dollars ang programang “strengthening private enterprises for the digital economy” para makasabay ang small at medium enterprises (MSME’s) sa aniya’y lumalagong digital marketing sa Pilipinas.

 Katuwang ng usad sa implementasyon ng naturang programa ang Department of Trade and Industry (DTI), Department of Finance (DOF), Bangko Sentral ng Pilipinas (BSP) at Anti-Red Tape Authority (ARTA).