Rashid Locsin

Hindi masyado mabigat at marami ang naitalang casualties dala ng shearline sa Northern Mindanao, lalo na sa Misamis Oriental.

Ito ang inihayag ni Pangulong Ferdinand Bongbong Marcos Jr. sa harap ng paniniwalang natugunan naman ng immediate concern.

Ayon sa Pangulo, kung titignan ang kabuuan lalo na at ito ay malawakang pagbaha at hindi nakapaghanda ang lahat, maliit na numero lamang ang naitalang casualty.

Nakikitang dahilan nito ay ang aniyang suporta ng lokal na pamahalaan at mga ahensya ng gobyerno sa mga evacuees at sa mga taong nakikiramdam pa ng sitwasyon sa kanilang binahang lugar.

Batay sa ulat ng lokal na pamahalaan ng Gingoog , 2 ang nasawi, at 7 ang nasugatan.

Sa kabuuan, naitala ang 20 taong nasawi kabilang na ang 8 sa Oroquieta City, Misamis Occidental.

Naitala ng Department of Health (DOH) ang nasa 128 karagdagang kaso ng OMICRON subvariant ng COVID-19.
Ito’y natukoy batay sa pinakahuling genome sequencing na isinagawa nuong Enero 3 – Enero 9.

Ayon sa kagawaran,52 dito ay natukoy bilang BA.2.3.20,1 kaso ng BN.1,10 ang BA.5,28 ang XBB, 13 naman ang XBC at 24 ang iba pang OMICRON SUBVARIANTS.

Samantala, kabilang sa mga bagong kaso ng BA.5 ay ang 3 kaso ng BF.7 at 1 BQ.1.

Inilabas na ng Land Transportation Office (LTO) ang show cause order laban sa may ari ng driver at driver ng SUV na kumaladkad sa 12 sasakyan sa One San Miguel Avenue, Mandaluyong City.

Nakatakda namang ipatawag ng Intelligence and Investigation Division (IID) ang may-ari ng SUV maging ang 2 sinasabing drayber sa Enero 16.

Pinagpaliwanag ng LTO ang mga ito kung bakit hindi sila dapat patawan ng parusa at bawian ng driver’s license.

Kasabay nito, iniutos na rin ng IID ang suspensyon ng 90 araw at pagsusuko ng lisensya ng 2 drayber.

Ito’y para hindi makapagmaneho habang nagpapatuloy ang imbestigasyon sa naturang insidente.

Sinimulan nang patakbuhin ng MRT ang mga bago na isinailalim na sa overhauling o masusing pagkukumpuni.

Sa abiso ng MRT, nadagdagan na ang mga train set matapos makumpleto ang overhauling sa 71 sa 72 bagon na kanilang isinailalim dito.

Bago ideploy, sumailalim muna sa serye ng quality at safety check ang mga bagon upang matiyak na ligtas itong I-byahe.
Nasa 14 namang train set ang bumabiyahe sa linya ng MRT habang nasa 18 train set naman ang pinapa-biyahe tuwing peak hours.

Nagdeklara ng state of calamity ang Local Government Unit (LGU) ng Gandara Samar bunsod ng malawakang pagbaha dahil sa patuloy na pag-ulan sa lugar

Batay sa resolusyon inaprubahan ni Mayor Warren Aguilar ang deklarasyon ay bunsod ng mga pagbaha sa mga barangay na nasa mababang lugar partikular iyong mga malapit sa ilog.

Batay pa sa ulat ng Gandara Municipal Disaster Risk Reduction and Managenent Office (GMDRRMO) nagdulot ng pagbaha ang tuloy-tuloy na pag ulang dala ng low pressure area sa munisipalidad dahilan upang ilikas ang karamihan ng mga residente. - sa ulat mula kay Agustina Nolasco (Patrol 11) 

Naglaan ng P3-M pondo ang pamahalaan para sa pagkukumpuni ng mga school buildings na napinsala ng kalamidad sa Misamis Oriental.

Sa situation briefing sa Gingoog City, Misor, tiniyak ni PBBM sa lokal na pamahalaan na pinaaasikaso na niya ang pagre-release ng pondo para rito.

Ayon sa pangulo, nasa 63 na silid-aralan ang napinsala ng pag-ulan at pagbaha na dulot ng shear line.

Kasabay nito, inatasan ni PBBM ang Department of Public Works and Highways (DPWH) na madaliin ang pagsasaayos ng mga imprastraktura sa oras na humupa na ang tubig-baha.

Namahagi ng tulong pinansiyal si Pang. Ferdinand Marcos Jr. sa mga mangingisda at magsasaka na apektado ng mga pag-ulan at pagbaha sa Northern Mindanao.

Pinangunahan ni PBBM ang pamimigay ng P5000 sa mga benepisyaryo sa ilalim ng Assistance to Individuals In Crisis Situations (AICS) program sa Gingoog City Hall sa Gingoog, Misamis Oriental.

Tiniyak ng pangulo na tutulungan ang mga residente na maitayo muli ang kanilang mga tirahan.

Sa ginanap na situation briefing, iniulat ng lokal na pamahalaan ng Gingoog na umakyat na sa 18,452 ang bilang ng mga pamilyang apektado ng kalamidad.

Nasa 45 sa 59 na barangay ang apektado ng kalamidad kung saan karamihan sa mga napuruhan ay mula sa mga coastal areas.

Kabilang sa mga bagong itinalaga ni PBBM sina Faith De Guia bilang DIRECTOR III ng Presidential Communications Office; Gloria Balboa bilang Assistant Secretary ng Department of Health (DOH) ; Johanna Banzon bilang Director IV ng DOH; at Rodley Desmond Daniel Muñoz Carza bilang Director III ng DOH.

Iniluklok din si Geneses Abot bilang Deputy Director General ng Anti-Red Tape Authority (ARTA) habang in-appoint naman si Michael Aguinaldo bilang Chairperson ng Philippine Competition Commission na nasa ilalim ng Office of the President.
Sina Jocelyn Cabreza at Alan Luga naman ay inilagay sa Board of Trustees ng Government Service Insurance System (GSIS) bilang acting members na kumakatawan sa banking, finance, investment, and insurance sectors.

Si Edgardo Pamintuan naman ay itinalaga rin bilang bagong acting chairman at member ng board of directors ng Clark Development Corporation (CDC) habang si Robert Joseph De Claro ay iniluklok din bilang acting member ng social security commission na kumakatawan sa employers’ group.

Samantala, si Robert Bioco ay naluklok naman bilang Acting Administrator ng National Food Authority na nasa ilalim ng pamamahala ng Department of Agriculture (DA).

Hindi naman binanggit ni PCO SEC. Cheloy Garafil kung nanumpa na sa kani-kanilang mga tungkulin ang mga nasabing opisyal.- sa ulat mula kay Gilbert Perdez (Patrol 13).