Inaasahang ilalabas ngayong linggo ang autopsy report sa pinaniniwalang bangkay ng 16 anyos na si Michael Angelo Remecio, na narekober sa malapit sa isang sapa sa San Jose Del Monte City, Bulacan.
Ayon kay Supt. Fitz Macariola, hepe ng San Jose Del Monte, Bulacan, nagsagawa sila ng DNA test at kumuha na rin sila ng swab sample mula sa pamilya na umaako sa bangkay at inaasahang lalabas ang resulta sa loob ng 15 araw.
Ipinaliwanag ni Macariola na kahit kinilala ng ama ni Michael ang suot na damit ng kanyang anak, hindi muna nila ito maaaring ibigay sa pamilya hanggat wala pa ang resulta ng DNA test.
Nananatili ang bangkay sa Faith Funeral sa San Jose Del Monte, Bulacan.
Agosto 25 nang magpaalam si Michael Angelo na papasada lamang ng tricycle sa kanilang lugar sa Bagong Silang, Caloocan City pero hindi na ito umuwi.
Setyembre 13 naman nang madiskubre ng mga basurero ang na-aagnas na bangkay ng pinaniniwalaang binatilyo sa barangay Gaya-Gaya.
SMW: RPE
