“Hakot Queen of the Year” kung tawagin ng mga netizen ang real estate agent na si Sherlyn Lumapas.
Sa video na trending ngayon, mapapanood si Sherlyn na kumukuha ng iba’t ibang produkto sa isang supermarket sa pamamagitan ng “Hakot Challenge Award” ng kanyang pinapasukang kumpanya.
Ayon kay Sherlyn, unang beses na nagpa-hakot challenge ang kanilang kumpanya at maswerte siyang napili rito bilang incentive.
Talaga namang deserved ni Sherlyn ang parangal na ito dahil kakaiba ang bilis, lakas, at diskarteng ipinamalas niya sa paghahakot ng groceries.
Agad namang kumalat sa social media ang kanyang video na hinangaan ng mga netizen.
Para sa kanila, satisfying ang hakot challenge ni Sherlyn. Tukso pa ng isang netizen, “Yung chicks ka pero suma-sideline na kargador.”
May ilang nagsabing pwede nang magkaroon ng sari-sari store ang babae, habang biro naman ng iba, kaya na nitong magpatayo ng sariling grocery store.
Taos-puso naman ang pasasalamat ni Sherlyn sa kanyang kumpanya na kumilala sa mga pagsisikap niya at nagbigay ng oportunidad sa kanya na lumahok sa hakot challenge.
