Tiwala ang Criminal Investigation and Detection Group (CIDG) ng Philippine National Police na nasa bansa pa ang umano’y bigtime druglord na si Peter Lim.
Ayon iyan kay CIDG Director P/BGen. Albert Ignatius Ferro kasunod ng naunang pahayag ni Interior and Local Government Sec. Eduardo Año na posibleng wala na nga sa bansa si Lim.
Sinabi ni Ferro, hindi nila isinasantabi ang paggamit ng “backdoor exits” ni Lim upang makatakas lalo’t mayroon itong 500,000 pisong patong sa ulo kaya’t ito ang sentro aniya ng kanilang ginagawang imbestigasyon.
Magugunitang ini-uugnay si Lim sa iba pang malalaking pangalan sa kalakalan ng iligal na droga tulad nila Kerwin Espinosa, Marcelo Adorco at Ruel Malindangan.
Giit pa ni Ferro, malaking personalidad si Lim na kaniya pang inihalintulad kay Colombian drug lord na si Pablo Escobar ng Pilipinas dahil sa tindi ng koneksyon nito sa iligal na droga.—ulat mula kay Jaymark Dagala (Patrol 9)
