Kung naka-attend ka na sa kasal, anong souvenir ang nakuha mo?
Parang namalengke lamang ang mga bisita sa kasal nina Niño Basco at Yanna Ferrera dahil ang kanilang pa-giveaway, mga sariwang gulay at prutas!
Ang mga gulay at prutas na ipinamahagi nina Niño at Yanna sa kanilang kasal ay inani mismo ng groom mula sa kanyang taniman sa Laguna.
Limang buwan bago ang kasal, tiniyak ni Niño na may pananim na siya para aanihin niya na lamang ito.
Kabilang sa mga ito ang rambutan, siling labuyo, sitaw, beans, talong, okra, upo, patola, ampalaya, buko, sibuyas, bawang, pipino, at dahon ng sibuyas.
Mayroon ding nakalagay na label sa bawat gulay at prutas kung ilang piraso lamang ang pwedeng kunin ng bawat bisita.
Naisipan ng bride at groom ang kakaibang souvenir na ito dahil gusto nilang mapakinabangan ito ng kanilang mga bisita at hindi lamang itatambak sa kanilang mga bahay.
Masaya naman ang mga panauhin sa kanilang natanggap na souvenir na agad umano nilang nagamit sa pagluluto.
