Patay ang isang barangay chairman matapos pagbabarilin ng hindi pa nakikilalang mga salarin sa Roxas City, Capiz.
Kinilala ang biktima na si Barangay Lawaan Chairman Elvis Asis na binawian ng buhay habang ginagamot sa ospital.
Batay sa imbestigasyon, papunta sana sa isang kasiyahan si Asis at isa nitong kasamahan habang sakay ng motorsiklo nang pagbabarilin ang mga ito.
Nagtamo ang biktimang barangay chairman ng dalawang tama ng bala sa katawan at isa sa ulo na ikinamatay nito habang nakaligtas naman ang kanyang kasamahan.
Patuloy namang iniimbestigahan ng mga otoridad kung election related ang insidente lalo’t kandidato ang biktima sa darating na barangay elections.
