Humingi ng paumanhin si Bb. Pilipinas Universe 2017 Rachel Peters sa Pilipinas matapos itong mabigong makuha ang inaasam na korona sa Miss Universe kahapon.
Sa isang pahayag, sinabi ni Peters na ginawa niya ang lahat ng makakaya para manalo subali’t hindi pa rin ito naging sapat.
Gayunman, nagpaabot pa rin ng labis na pasasalamat si Peters sa mga natanggap na pagmamahal at suporta para sa aniya hindi matatawarang karanasan sa Miss Universe.
Si Peters ay nakapasok sa top 16 bilang wild card matapos na makakuha ng pinakamataas na online votes at nagtapos naman sa top 10.
Samantala, itinanghal bilang 2017 Miss Universe ang pambato ng South Africa na si Demi-Leigh Nel-Peters na nangakong pagtutuunan ang problema sa HIV-AIDS at self-defense.
Naging 1st runner up naman si Miss Colombia Laura Gonzales habang 2nd runner up si Miss Jamaica Davina Bennett.
—-
