Posibleng maharap ang beauty expert at dermatologist to the stars Dr. Vicki Belo sa kasong administratibo at kriminal dahil sa pagbebenta ng mga hindi rehistradong produkto.
Ito ay matapos na inspeksyunin ng Food and Drugs Administration o FDA ang clinic nito sa Muntinlupa City kung saan nakita na labing isa (11) sa mga ibinibenta nitong beauty product ay hindi lisensyado.
Ayon kay FDA Director General Nela Charade Puno, partikular na tinukoy na walang approval ng FDA ay ilang produkto na kabilang sa z-o o zen obagi product line.
Binigyang diin ng FDA na bagama’t sinisiguro din ng Belo Medical Group na ligtas ang kanilang produkto ay kinakailangan pa rin itong dumaan sa pagsusuri at maaprubahan ng FDA.
Nilinaw naman ng Belo Medical Group na ang naging inspeksyon ng FDA ay hindi bunsod ng anumang reklamo laban sa kanila o sa produkto bagkus ay sa usapin lamang ng product registration.
Handa naman ang kumpanya na tumalima sa itinatakda ng batas.
—-
