Inilabas ng Bureau of Corrections (BuCor) ang larawan ni Police Major Rodney Baloyo habang nakakulong ito sa New Bilibid Prison sa Muntinlupa City.
Ayon sa tagapagsalita ni BuCor Director General Gerald Bantag na si Atty. Wena fe Dalagan, nakapiit si Baloyo sa ordinaryong selda nito na may lawak na 2.5 by 3 meters at mayruon nang palikuran sa loob.
Nakahiwalay aniya si Baloyo sa ibang mga preso para na rin sa kaligtasan nito.
Sinabi ng opisyal na oras na magkaproblema sa kalusugan si Baloyo ay maaari itong dalhin sa NBP hospital.
Sa ngayon ay patuloy ang pag proseso sa mga dokumento ni Baloyo at oras na maayos ay bibigyan na rin aniya ng rasyon na pagkain ang pulis na gaya ng ibinibigay sa mga preso.
Matatandaang kahapon nang ipa-contempt ng Senado si Baloyo dahil sa pagsisinungaling at pag-iwas sa mga tanong ng mga senador kaugnay ng nangyaring buy bust operation nuong 2013 sa Pampanga.
