HEADLINES

Nagkasundo sina Pangulong Ferdinand Marcos Jr. at Indonesian President Joko Widodo na paigtingin pa ang kooperasyon ng dalawang bansa pagdating sa usaping seguridad at politika.

Matatandaang noong January 9, 2024, dumating si President Widodo sa Manila para sa kanyang three-day official visit sa bansa. Layon ng pagbisitang ito na mas palalimin at patatagin ang bilateral ties sa pagitan ng Pilipinas at Indonesia.

Sa ginanap na Leaders’ Statement kasama si President Widodo, sinabi ni Pangulong Marcos na malalim ang historic roots sa pagitan ng Pilipinas at Indonesia. Kaya naman nagkasundo ang dalawang bansa na ipagpatuloy ang pagtutulungan, partikular na sa mga isyung politikal at seguridad na binanggit sa katatapos lang na Joint Commission for Bilateral Cooperation (JCBC).

Ang JCBC ang pangunahing dialogue mechanism sa pagitan ng Pilipinas at Indonesia kung saan pinag-uusapan ang iba’t ibang isyu at pinagtutuunan ng pansin ang mga planong magpapahusay sa kooperasyon ng dalawang bansa. Sinusuri rin dito ang naging accomplishments ng mutual collaboration initiatives.

Isa sa mga inisyatibang ito ang pagpapatupad sa mga prayoridad ng Philippines-Indonesia Plan of Action 2022-2027 na nilagdaan sa state visit ni Pangulong Marcos sa Indonesia noong September 2022.

Tinutugunan ng Plan of Action ang iba’t ibang aspeto sa kooperasyon ng Pilipinas at Indonesia, kabilang na ang politika at seguridad, ekonomiya, isyu sa border, sociocultural at people-to-people exchange, regional at global issues, at iba pa.

Samantala, nilagdaan na rin ng Department of Energy (DOE) ng Pilipinas at Ministry of Energy and Natural Resources ng Indonesia ang Memorandum of Understanding (MOU) para sa kooperasyon sa industriya ng enerhiya. Isusulong nito ang pagtutulungan ng dalawang bansa sa energy transition, renewable energy, demand-side management, electric vehicles, at alternative fuels gaya ng hydrogen, ammonia, at biofuels. Itataguyod rin nito ang business sectors, lalo na sa panahong kritikal ang energy commodities tulad ng coal at liquified natural gas.

Sabi nga ni Pangulong Marcos, isa ang Indonesia sa “closest friends at regional partners” ng Pilipinas. Kaya naman inaasahan ang patuloy na partnership sa pagitan ng Pilipinas at Indonesia upang mas tumibay ang kooperasyon sa depensa, seguridad, kalakalan, at imprastraktura na maghahanda sa dalawang bansang harapin ang iba’t ibang hamon sa Asya.

Patuloy ang pagbagal ng inflation sa bansa.

Ito ay base sa ulat na inilabas ng Philippine Statistics Authority (PSA) noong January 5, 2024 kung saan naipakitang bumaba sa 3.9% ang inflation rate ng bansa noong December 2023, mula 4.1% noong November 2023 at 8.1% noong December 2022.

Lubos naman itong ikinatuwa ni Pangulong Ferdinand Marcos Jr. na nagsabing ipagpapatuloy ng pamahalaan ang pagsusumikap upang mas pagandahin ang ekonomiya ng Pilipinas.

Malaking bahagi sa pagbagal ng inflation ang mga sunod-sunod na direktiba ni Pangulong Marcos na nagbibigay ng proteksyon sa mga magsasaka at konsyumer.

Iba’t ibang inisyatiba ang ipinatupad ni Pangulong Marcos para sa produksyon, gastusin, at transportasyon sa sektor ng agrikultura na siya namang nagpababa sa presyo ng mga bilihin, partikular na ng pagkain.

Noong January 2023, umabot sa 8.7% ang inflation rate sa bansa. Bilang proactive measure upang malabanan ang epekto nito, inaprubahan ni Pangulong Marcos ang pagtatatag ng Inter-agency Committee on Inflation and Market Outlook (IAC-IMO) noong May 26, 2023.

Sa pangunguna ng National Economic and Development Authority (NEDA) at Department of Finance (DOF), committed ang IAC-IMO sa pagsusulong ng modernization sa agrikultura at sa pagpapalakas ng produksyon upang makontrol ang implasyon at matiyak ang food security sa bansa.

Matatandaang ipinatigil din ni Pangulong Marcos ang paniningil ng pass-through fees sa mga sasakyang naghahatid ng produkto sa pamamagitan ng Executive Order no. 41. Isa sa mga dahilan kung bakit sinuspinde ang pangongolekta ng pass-through fees ay upang makontrol ang epekto ng inflation.

Isa pang direktibang nakatulong sa pagbagal ng inflation ang libreng rice seeds, fertilizer, financial assistance, at technical support na ibinahagi ng Department of Agriculture (DA) para sa mga magsasaka na nagpalakas sa lokal na produksyon.

Namahagi rin ang administrasyong Marcos ng financial assistance sa mga mahihirap na Pilipino sa pamamagitan ng third tranche ng Targeted Cash Transfer (TCT) Program; Pantawid Pasada Program para sa mga driver at operators ng public transportation at delivery services; at Fuel Subsidy Program para sa mga magsasaka at mangingisda. Pinuri ng International Monetary Fund (IMF) ang targeted strategy na ito.

Pangako ni Pangulong Marcos para sa 2024, mas palalakasin niya ang mga programang pang-agrikultura at tututukan ang mga hakbang upang mapanatiling abot-kaya ang presyo ng pagkain at iba pang mga pangunahing bilihin para sa bawat Pilipino.

Sa inilabas na pinakahuling survey results ng Pulse Asia nitong January 8, 2024, kapansin-pansin ang pagtaas ng approval rating ni Pangulong Ferdinand Marcos Jr.

Mula 65% noong September 2023, tumaas ang approval rating ni Pangulong Marcos sa 68% para sa December.

Ayon kay Eastern Samar Governor Ben P. Evardone, nakatulong sa pag-angat ng approval rating ni Pangulong Marcos ang mga pagsisikap nito sa pagtugon sa three key issues ng bansa: ang inflation, economic growth, at employment.

Bago isagawa ang survey period ng Pulse Asia, matatandaang noong October 2023, umabot ang employment rate sa bansa ng 95.8% ayon sa Philippine Statistics Authority (PSA). Ito ang pinakamataas na employment rate na naitala sa loob ng 18 years.

Record-breaking din ang unemployment rate sa ilalim ng administrasyong Marcos na bumaba sa 4.2% noong kaparehong buwan.

Kaugnay nito, umabot sa 5.9% ang gross domestic product (GDP) growth ng bansa sa ikatlong quarter ng 2023, mula 4.3% noong ikalawang quarter. Dahil sa performance na ito, itinuring ang Pilipinas bilang pinakamabilis sa major Asian economies.

Samantala, patuloy rin ang pagbagal ng inflation sa bansa. Ayon sa inilabas na ulat ng PSA noong January 5, 2024, naipakitang bumaba sa 3.9% ang inflation rate ng bansa noong December 2023; mula 4.1% noong November 2023 at 8.1% noong December 2022.

Sabi ni Gov. Evardone, dapat asahan ang bounce-back sa approval ratings ni Pangulong Marcos dahil nagbubunga na ang mga pagsisikap ng administrasyon. Aniya, sumasalamin ito sa approval at appreciation ng publiko sa mga ginawang aksyon ng Pangulo upang pabagalin ang inflation, pasiglahin ang ekonomiya, at makalikha ng mga trabaho.

Gayumpaman, pinaalalahanan ng Eastern Samar governor ang public officials na huwag magpaapekto sa survey ratings at sa halip, ipagpatuloy ang commitment na pagsilbihan ang mga Pilipino.

Sa isang mensahe, nangako naman si Pangulong Marcos na ipagpapatuloy niya ang pagsusumikap upang mas lumakas ang produksyon ng pagkain at mas tumatag ang ekonomiya ng Pilipinas.