Sumentro sa pagpapatawad at pagmamahal sa kapwa ang christmas message ni Vice President Sara Duterte sa mga Pilipino.
Iginiit ng Pangalawang Pangulo na maliban sa mga materyal na bagay, dapat ding ipagkaloob ng bawat isa ang pang-unawa, respeto at pagmamahal sa bawat isa, lalo na sa mga mahihirap at may karamdaman.
Binigyang diin ni VP Sara na ito ang tunay na diwa ng pasko, at ito rin ay isang paalala sa lahat, hindi lamang ngayong buwan ng disyembre, kundi sa lahat ng araw.
Bumaba ang bilang ng mga Pilipinong umaasa sa masayang selebrasyon ng pasko ngayong taon.
Sa resulta ng Social Weather Stations Survey, bumaba ito sa 65% mula sa 73% noong 2023 at 2022.
Ayon sa SWS, naitala ang kaparehong resulta noong 2021 sa gitna ng panahon ng pandemya.
Bagama’t mas mataas ito ng 15 points sa record-low na 50% noong 2020, mas mababa pa rin ito ng 14 points sa pre-pandemic level na 79% noong 2019.
Lumabas din sa survey na inaasahan na ng 10% ng mga Pilipino ang malungkot na pasko, habang ang natitirang 26% naman ay nagsabing hindi sila umaasa sa masaya o malungkot na pagdiriwang ng pasko. - Sa panulat ni Laica Cuevas
Iginiit ng Malakanyang na hindi basehan ng epektibong serbisyo-publiko ang mataas na popularity ratings.
Ito ayon kay Executive Sec. Lucas Bersamin, kasabay ng pagsasabing kaakibat ng tunay na pamumuno ang mga hakbang na tama subalit hindi popular.
Dagdag pa ni Secretary Bersamin, ang grado ng pamamahala ay hindi lang dapat nakabatay sa survey dahil anya mawawala sa focus ang mahahalagang sukatan gaya ng employment, na nagpapakita ng pag-usad ng bansa.
Sa kabila nito, sinabi ng Kalihim na iginagalang ng palasyo ang paniniwala na ang mga survey ay sukatan ng opinyon ng publiko. – Sa panulat ni John Riz Calata
Nanindigan ang Commission on Elections na hindi nito idedeklarang “Area of Concern” ang Sulu sa kabila ng tangkang pagpatay sa Election Supervisor na si Vidzfar Julie Amil.
Ayon kay COMELEC Chairman George Erwin Garcia, itinuturing pa rin nilang mapayapa ang sitwasyon ng politika sa sulu dahil wala namang katunggali sa darating na eleksyon ang incumbent governor ng probinsya.
Binigyang-diin din ng Poll Body Chief na hindi nito papalitan si Amil bilang Election Officer sa Sulu dahil pagpapakita lamang aniya ito ng pagiging duwag ng COMELEC at pagpapatunay lamang na nagtagumpay ang pananambang.
Tiniyak naman ni Chairman Garcia na bukas ang kanilang ahensiya kung mayroon mang Election Officer na magpapalipat ng destino at pakikinggan nila ang rason ng mga nito.
Nakalaya na mula sa kulungan si Pandi, Bulacan Mayor Enrico Roque matapos pagbigyan ng korte ang mosyon nito na ipawalang bisa ang warrant of arrest na inihain laban sa kanya.
Nakabalik na ang alkalde sa bahay nito sa Pandi, Bulacan mula sa Caloocan Police District Detention Facility.
Nagmula ang kaso na inihain laban kay Mayor Roque mula sa reklamo ng isang babae kung saan sinasabing hinalay siya ng alkalde kasama ang dalawang iba pa sa bahay mismong alkalde sa Bagong Silang.
Matatandaang inilabas ang nasabing warrant noong November 11, kung saan kabilang sa sinilbihan sina Pandi Councilor Jonjon Rojas at ang Municipal Driver na si Roel Raymundo. – Sa panulat ni Alyssa Quevedo
Sinong mag-aakala na dahil lamang sa isang kendi ay magtatapos ang buhay ng isang tatlong taong gulang na bata sa San Jose City Nueva Ecija pati na rin ang pangarap para sa kaniya ng kaniyang pamilya?
Kung paano ito nangyari, alamin.
Sa isang tila normal na araw, pinagbigyan ang tatlong taong gulang na si Harvey na sumama sa kaniyang ama na si Christian matapos nitong umiyak dahil sa kagustuhan na sumama rito sa tindahan.
Habang nasa tindahan ay nagpabili si Harvey ng dalawang kendi sa kaniyang ama, kung saan maya-maya lang ay nagulat ang ama nang makita ang bata na namumutla, hindi makahinga, at namumula na ang mga mata dahil nabilaukan na pala ito.
Agad namang sinubukan ni Christian na mailabas ang kendi ngunit hindi ito tumalab kung kaya naman humingi na ito ng tulong.
Nagawa ng sumaklolong residente na si Dayanara na ilabas ang kendi mula sa bibig ni Harvey pero may isa pa palang kendi na bumara sa lalamunan nito.
Agad namang dinala sa ospital ang bata at sinubukang i-revive ngunit hindi nagtagal ay inirekomenda rin ng doktor na ilipat ito sa mas malaking ospital.
Ngunit habang nasa byahe papunta sa pangalawang pagamutan ay nawalan ito ng heartbeat bagama’t agad ding naisalba dahil binigyan ito ng CPR, at pagdating sa ospital ay idiniretso agad ito sa Intensive Care Unit dahil sa pagdurugo ng baga.
Ang kinain ni Harvey na isa palang gummy candy ay napunta sa kaniyang baga at naubusan din siya ng oxygen sa kaniyang utak, dahilan upang hindi ito na magising.
Panandalian pa raw bumuti ang lagay ng bata pagpatak ng gabi ngunit makalipas lamang ang ilang oras ay nagpakita na ito ng hindi magandang senyales at tuluyang namaalam sa murang edad.
Gayunpaman, wala nang nagawa ang mga magulang ni Harvey kundi palayain ang kanilang anak kahit na gaano pa ito kasakit at nakapanghihinayang sa kanila lalo na at masyado pa itong bata at ngayon lamang sila nabigyan ng pagkakataon na bumawi sana sa kanilang mga anak dahil ngayon lamang sila nakaaahon sa buhay.
Ikaw, ano ang masasabi mo sa masalimuot na pangyayari na ito?
Isang Arizona-born na lalaki na mayroong rare condition na nagdulot sa kaniya upang hindi makapagsalita, ay isa na ngayong rapper at songwriter!
Kung paano ito nangyari, alamin.
Taong 1999 nang ipanganak si Isaiah Acosta sa Arizona na mayroong iba’t-ibang kumplikasyon sa kalusugan kabilang na ang Agnathia na isang rare condition na nagdudulot ng kawalan ng isang bahagi ng panga o ang kabuuan nito.
Nang ipanganak daw si Isaiah ay inabisuhan ng mga doktor ang kaniyang ina na wala itong tyansa na mabuhay nang mahaba, ngunit nagawa itong lampasan ni isaiah at ngayon ay isa na siyang ganap na rapper.
Dahil sa kaniyang kondisyon, maraming kinaharap na hamon sa buhay si Isaiah katulad ng bullying at ang panghuhusga ng mga tao sa kaniyang hitsura.
Ayon kay Isaiah, isa sa pinakamalaking challenge sa kaniyang buhay ay ang pakikipag-communicate. Ngunit marami naman daw siyang paraan para makipag-usap katulad ng pagsusulat, pagte-text, pagsa-sign language, at ang paggamit ng communication device.
Pero hindi naging hadlang ang mga challenge na ito para i-pursue ni Isaiah ang kaniyang music career at kung paano siya nakapag-produce ng kanta bagama’t mayroon siyang ganitong klase ng kondisyon?
Iyon ay dahil sa isang rapper na ipinakilala sa kaniya ng mga staff sa ospital na si Traphouse na nagsilbing boses sa kaniyang mga kanta, ngunit sa kasamaang palad ay binawian ito ng buhay noong 2019 dahil sa pancreatic cancer.
Gayunpaman, nagpatuloy ang positibong pananaw ni Isaiah sa buhay kahit na ano pa ang ibinabato ng mga tao sa kaniya, at ngayon, nagsisilbi na siyang inspirasyon dahil sa pagbabahagi niya ng kaniyang kuwento sa pamamagitan ng kaniyang kanta na “Oxygen to Fly.”
Ikaw, anong masasabi mo sa inspiring na kuwento na ito?
Umabot na sa 17 ang bilang ng sugatan dahil sa paputok sa loob ng dalawang araw, mula Disyembre a-22 hanggang Disyembre a-23.
Ayon sa Department of Health, mula sa nasabing bilang, labing anim ang lalaki na nasa pagitan ng edad 7 hanggang 37 taon.
Dahil dito, nagpaalala ang doh sa publiko, partikular na sa mga menor de edad, na iwasan ang paggamit ng anumang paputok, sa halip ay gumamit na lamang ng tambol, torotot, o anumang pampaingay. – Sa panulat ni John Riz Calata
Iginiit ng Bureau of Immigration na hindi na nila palalawigin pa ang deadline ng pagpapaalis sa mga Foreign POGO workers sa December 31.
Ayon kay Immigration Spokesperson Dana Sandoval, sa panayam ng DWIZ, kasunod ito ng kautusan ni pangulong ferdinand marcos junior na ipasara ang lahat ng operasyon ng pogo sa bansa sa katapusan ng taon.
Sinabi ni Spokesperson Sandoval, mula sa 33,000 na dayuhang trabahador ng POGO, 21,000 sa mga ito ang nag-downgrade na ng kanilang visa, kung saan karamihan sa mga ito ay umalis na ng Pilipinas.
Kaugnay nito, inaasahan aniya ng B.I. na mas marami pang Foreign POGO workers ang aalis ng bansa sa mga susunod na araw. - Sa panulat ni John Riz Calata
Tiniyak ng PhilHealth na magagawa pa rin nilang bawasan ang contribution ng mga miyembro at palawakin ang coverage nito sa susunod na taon.
Ito’y sa kabila ng zero subsidy sa ilalim ng 2025 national budget.
Ayon kay President at Chief Executive Officer Emmanuel Ledesma Jr., ang hangarin lamang ng PhilHealth ay ang pagpapababa sa mga kontribusyon, alinsunod sa nakabinbing panukala ng senado na naglalayong bawasan ang rate mula sa 5% hanggang 3.25%.
Kasabay nito, tiniyak ni Ledesma kay House Assistant Majority Leader Jil Bongalon na ang PhilHealth ay nananatiling nakatuon sa pagpapataas ng mga benepisyo ng programa na inaasahang maipapasa ng senado sa susunod na taon.
Matatandaang inihayag ni Speaker Martin Romualdez na sisilipin ng kamara ang sinasabing sobrang pondo ng philhealth, gayong, mataas pa rin ang contribution ng mga miyembro nito.
Gayunman, bilang tugon sa mga mambabatas , binigyang-diin ng PhilHealth na palalawakin din nila ang saklaw ng pagpapa-ospital ng mga miyembro nito na nasa 50%.
Samantala, nakatakdang isagawa ang pagdinig ng philhealth sa January 13, 2025 kasabay ng pagbabalik session ng Kongreso. – Sa panulat ni Jeraline Doinog