RONDA PROBINSYA

Tinorture muna bago pinatay ang 15-anyos na grade 10 student na natagpuang naaagnas sa tubuhan sa La Carlota City, Negros Occidental.

Base ito sa lumabas na autopsy report ayon sa La Carlota City Police Station, kung saan nagtamo ng sugat sa iba’t ibang bahagi ng katawan ng biktima na pinaniniwalaang dahilan ng kanyang pagkasawi.

Gayunman, hindi naman makumpirma kung ginahasa ang biktima dahil nasa state of decomposition na ang katawan nito nang madiskubre sa taniman ng tubo.

Ini-report na nawawala ang biktima noong Hulyo a-30 ng kanyang pamilya matapos na hindi na umuwi pagkatapos pumasok eskwelahan.

Nagpapatuloy pa ang imbestigasyon ng pulisya sa kaso.

Love triangle ang isa sa tinitingnang motibo ng mga awtoridad sa pamamaslang sa isang durg ex-convict sa Cebu City.

Kinilala ng awtoridad ang biktima na si Rico Oquiño, 25-anyos, isang Jeepney Conductor habang pinangalan naman ang pinaghihinalaang suspek na isang si Jephosin Cantunao, 30-anyos.

Ayon sa awtoridad, pumunta si Cantunao sa bahay ng biktima para magbigay umano ng pera sa anak nito sa dating kinakasama na kasalukuyang karelasyon ng biktima.

Ngunit nagka-alitan ang dalawa sa hindi pa malamang dahilan na nagresulta sa pagbabanta ng suspek sa huli.

Sa pagsusuri sa labi ni Oquiño, tadtad ito ilang ng saksak sa katawan.

Narekober din sa pinagyarihan ng krimen ang pitong sachet ng hinihinilang shabu at pera sa bulsa ni Oquiño kasama ng motorsiklo nito malapit sa katawan ng biktima.

Target na ng manhunt operation si Cantunao na maaring maharap kaukulang kaso sakaling mapatunayan na siya ang pumatay kay Oquiño.

Dead on the spot ang isang lalaki matapos masumpak ng kaniyang nakaalitan sa Pili, Camarines Sur.

Ayon sa awtoridad, nagkaroon ng hindi pagkaka-unawaan ang dalawang lalaki na nauwi sa pamamaril.

Iitakin sana ng biktimang si Benjie Batucan ang suspek ngunit naunahan ito ng salarin at sinumpak siya.

Kaagad na nasawi ang biktima matapos magtamo ng apat na tama ng sumpak.

Nabatid na matagal nang may away si Batucan at ang suspek dahil sa habit ng biktima na pandudura.

Hawak na ng awtoridad ang salarin at nahaharap sa kasong homicide.

Patay ang isang 48-anyos na babae sa Daet, Camarines Norte matapos umanong siyang balibagin ng kanyang mister.

Ayon sa awtoridad, naganap umano ang insidente sa labas ng isang Garbage Hauling Facility sa Barangay Dogongan kung saan parehong nagtatrabaho ang biktima at ang kanyang 46-anyos na asawa bilang mga basurero.

Sa salaysay ng isang saksi, nag-away ang mag-asawa bago umano binuhat ng mister ang kanyang misis at binalibag, dahilan para tumama ang ulo nito sa lupa. Nagresulta ito sa matinding pinsala sa ulo.

Itinanggi naman ng asawa ang mga akusasyon.

Nasa kustodiya na ng pulisya ang suspek at nahaharap sa kasong parricide.

Isang 43-anyos na barangay tanod ang nasawi nang ito ay pagbabarilin ng isang 58-anyos na tricycle driver sa Balaoan, La Union.

Kinilala ng mga awtoridad ang nasawing biktima na si Eduardo San Jose.

Batay sa imbestigasyon, bago naganap ang krimen ay kapwa nakikipaglamay ang biktima at suspek na si William Subang nang magkainitan sa hindi pa malamang kadahilanan na nauwi sa pagtatalo.

Sa gitna ng mainitang pagtatalo ay bumunot ng baril si Subang at binaril ang biktima.

Nakatakbo pa si San Jose, subalit hinabol pa ng suspek at nang madapa ay muling binaril ng suspek.

Naaresto ng mga pulis ang suspek at nakuha ang baril sa isang pursuit operation.

Kalunos-lunos ang sinapit ng isang senior citizen matapos na mabangga ng isang kotse sa Legazpi City, Albay.

Ayon sa Legazpi City Police Station, naglalakad umano sa tabi ng kalsada ang matanda nang mabangga ng kotse na minamaneho ng isang Nurse.

Sa lakas nang pagkakabangga ay tumalsik ng ilang metro ang biktima na agaran nitong ikinamatay.

Lumalabas sa imbestigasyon, bago nabangga ang biktima ay unang sumalpok ang kotse sa isang poste ng kuryente saka dumeretso ito sa naglalakad na biktima.

Inamin naman ng suspek na nakatulog siya habang nagmamaneho dahil sa pagod at puyat galing sa pag-duty sa isang hospital na naging dahilan ng aksidente.

Samantala, nahaharap sa kasong reckless imprudence resulting in homicide ang driver.

Nauwi sa aksidente ang pag-shortcut sana ng isang jeep sa Antipolo, Rizal, kung saan, walo katao ang sugatan nang masagasaan nito ang siyam na sasakyan bago bumangga sa mga concrete barrier.

Ayon sa awtoridad, binabaybay ng pampasaherong sasakyan ang Sumulong Highway sa Barangay Dela Paz nang mawalan ng preno ang jeepney at sumalpok sa barrier.

Dinala sa ospital ang jeepney driver na si Roy Franco at pitong driver ng mga sasakyan na naaksidente para gamutin ang mga natamo ng mga ito.

Sa insedente, sinampahan si Franco ng reckless imprudence resulting in multiple damage to property with physical injury.

Samantala, nagkasundo si Franco at ang mga sugatang driver na ayusin ang idinulot nitong perwisyo.

Isang saksak sa likod ang tinamo ng isang 16-anyos na estudyante mula sa kainuman nitong kapwa estudyante rin makaraang magkapikunan habang nag-iinuman sa Tanza, Cavite.

Kinilala ng awtoridad ang biktima na si Rainyl Hatol.

Habang naaresto naman ang suspek at nahaharap sa kasong frustrated homicide na kinilala sa alyas Carl, 18-anyos

Sa imbestigasyon ng pulisya, kapwa na lasing ang biktima at suspek  nang magkaroon ng pagtatalo.

Sa gitna ng pagtatalo ay nakakuha ng patalim ang suspek at sinaksak ang biktima sa likod.

Agad itong naitakbo sa pagamutan habang naaresto rin ang suspek sa tulong ng mga Barangay Official ng nasabing lugar.

Dead on the spot ang isang senior citizen matapos masagasaan siya ng isang truck sa Tangub, Bacolod City.

Ayon sa awtoridad, tumatawid ang bitkima ng bigla itong salpukin ng truck.

Depensa ng driver sa pulisya, hindi niya nakita ang biktima sa daan ddahilan para mabundol nito senior citizen.

Nasa kustodiya na ng pulisya ang driver at nahaharap sa kaukulang reklamo.

Dead on the spot ang isang babae nang barilin ng kanyang live-in partner sa gitna ng kanilang mainitang pagtatalo sa Rodriguez, Rizal.

Kinilala ng awtoridad ang biktima na si Gelli Abogado habang pinaghahanap na ng mga awtoridad ang tumakas na suspek na kinilala lang na si alyas “Jasper”.

Ayon sa Rodriguez Municipal Police, naganap ang krimen sa loob ng tanahan ng mag-live-in partner.

Ayon sa saksi, nakarinig umano sila ng pagtatalo sa pagitan ng mag-asawa mula sa loob ng kanilang kuwarto. Maya-maya ay nagulantang na lang sila nang makarinig ng putok ng baril.

Nang alamin ng saksi kung ano ang nangyari ay nakita umano nito ang biktima na nakahandusay sa higaan at may tama ng bala sa ulo habang ang suspek ay may hawak na baril at mabilis na nagtatakbo patakas sa lugar.