Nakatakdang sumailalim sa stem cell treatment si dating Pangulo ngayo’y Pampanga Second District Representative Gloria Macapagal Arroyo sa Munich, Germany.
Inihayag ito ni Arroyo makaraang mag-donate ng medical equipment sa Veterans Memorial Medical Center o VMMC sa Quezon City kung saan siya isinailalim sa hospital arrest sa loob ng apat na taon.
Ayon sa kongresista, umaasa siyang pagbibigyan ng Sandiganbayan 4th Division ang kanyang motion for leave kung saan hiniling nito na payagan siyang makabiyahe sa Germany mula September 10 hanggang 29 at sa Paris, France mula September 29 hanggang October 3.
Layon ng nasabing pagbiyahe ni Arroyo na makapagpagamot sa Germany na susundan naman ng maiksing bakasyon sa France.
Samantala, hiniling rin nito na payagan siyang makabiyahe patungong Hong Kong mula October 29 hanggang November 4 para dumalo sa family reunion.
By Meann Tanbio
