Patay ang isang city public officer habang sugatan ang kaniyang driver matapos barilin sa Cotabato kahapon.
Kinilala ang biktima na si dating Cotabato City Police Director at Retired Colonel Rolen Balquin na kasalukuyang hepe ng City Public Safety Office.
Habang ang driver naman nito ay si Police Chief Master Sergeant o pcms Arial Gutang.
Ayon kay Cotabato City Police Director Colonel Rommel Javier, paparada lamang sana ang sinasakyan ng mga biktima sa harap ng isang milktea house, nang pagbabarilin ng mga hindi nakilalang suspek.
Mabilis na tumakas ang mga salarin lulan ng hindi pa matukoy na sasakyan.
Dinala pa sa pagamutan ang mga biktima ngunit idineklarang dead on arrival si Balquin nang tamaan ng bala sa ulo at dibdib.
Mariin namang kinondena ni Cotabato City Mayor Cynthia Guiani Sayadi ang pagpatay kay balquin kasabay ng pagtiyak ng pagpapanagot sa mga suspek. —sa panulat ni Abby Malanday
