Coach Roach handa nang payuhang magretiro si Pacquiao

Handa na ang Hall of Famer Coach na si Freddie Roach na payuhan na si 8-Division World Champion Manny Pacquiao na tuluyan ng magretiro matapos ang pagkatalo kay undefeated fighter Jeff Horn ng Australia.

Aminado si Roach na maaaring ang pagkatalo ni Senator Pacquiao kay Horn ang hudyat ng pagpapaalam ni Pacman sa 22 taong professional  boxing career.

Ayon kay Coach Freddie, kakausapin na niya ang pambansang kamao at hihimukin na ikunsidera na ang pagreretiro lalo’t wala na itong dapat patunayan sa naturang larangan na nagbigay sa kanya ng  world title sa walong (8) weight class.

Kumbinsido rin ang  Australian boxing legend at  three-time world champion Jeff Fenech na panahon na para sa People’s Champ na tuluyan ng isabit ang kanyang gloves at kalimutan na ang rematch kay Horn.

Hindi anya mapipigilan ng isang boksingero o ng kahit sinuman ang unti-unting pagtanda  at isa sa mga indikasyon  ay ang paghina ng suntok at pagbagal ng galaw sa ibabaw ng ring.

Taong 2009 pa noong manalo si Pacquiao via technical knockout  kay  Miguel Cotto.

By Drew Nacino

Comments

comments