Hindi pa rin nagtatapos ang laban ng Cotabato City sa coronavirus disease 2019 (COVID-19) kahit pa nakarekober na sa virus ang unang kaso nito sa lungsod.
Ito ay makaraang magpositibo sa COVID-19 ang isang 68-anyos na person under investigation (PUI) sa kanilang lugar.
Ayon sa Department of Health (DOH) Region 12, ang naturang pasyente ang pinakahuling isinailalim sa paggamot sa isolation room ng Cotabato Regional and Medical Center.
May travel history umano ito sa Maynila at dumating lamang sa kanilang tahanan sa Cotabato noong ika-12 ng Marso.
Dagdag pa ng kagawaran, nasa stable na kalagayan ang pasyente at kasalukuyang nakasailalim sa mahigpit na home quarantine.
