Muli nanamang nakapagtala ng panibagong record ang Department of Health (DOH) sa may pinakamaraming karagdagang kaso ng COVID-19 sa Pilipinas sa nakalipas na magdamag.
Ito’y matapos maitala ang 4,963 new COVID-19 cases ngayong Sabado, unang araw ng Agosto.
Nahigitan nito ang record kahapon, Hulyo 31, na may 4,063 new COVID-19 cases.
Dahil dito, pumalo na sa 98,232 ang kabuuang bilang ng kaso ng COVID-19 sa bansa, kung saan 30,928 dito ay active cases.
Samantala, sumampa na sa 65,265 ang kabuuang bilang ng mga nakarekober matapos ang panibagong 93 cases; habang 17 naman ang nadagdag sa mga namatay dito kaya’t pumalo na sa 2,039 ang death toll ng COVID-19 sa bansa.
