Kumbinsido ang isang Lider sa Kamara na isinama si dating Department of Education Spokesman Michael Poa sa legal team ni VP Sara Duterte upang hindi ito maipatawag bilang testigo sa senate impeachment trial bunsod ng prinsipyo ng lawyer-client confidentiality
Ipinunto ni House Assistant Majority Leader Jude Acidre ng Tingog Party-List na nasa posisyon si Atty. Poa na nagsilbi rin dati bilang tagapagsalita ng Office of the Vice President upang magbigay-linaw sa mahahalagang isyu kaugnay ng paggamit ng confidential funds ng Pangalawang Pangulo.
At dahil sa pagsasama sa kanya sa depensa, sinabi ng kongresista na maaaring hindi na mapilitang tumestigo sa impeachment court si Atty. Poa.
Naniniwala rin si Cong. Acidre na mistulang isa pang pagtatangka ang hakbang na ito ng kampo ng mga Duterte upang ilihis ang atensyon mula sa mga tanong na hindi pa nasasagot kaugnay ng sinasabing maling paggamit ng pondo ng pamahalaan.
Sinuportahan naman ni House Assistant Majority Leader at Taguig City Rep. Pammy Zamora ang pahayag ni Cong Acidre sa pagsasabing magreresulta ng mas maraming katanungan ang pagsama kay atty poa sa legal team ni VP Sara. —sa panulat ni Kat Gonzales
