Itinalaga ng mababang kapulungan ng Kongreso si dating House Speaker ngayo’y Quezon City Rep. Sonny Belmonte bilang caretaker ng lone district ng Batanes.
Ito’y makaraang pumanaw ang kinatawan ng nasabing lalawigan na si Henedina Abad nuong Oktubre 18 bunsod ng pakikipaglaban nito sa sakit na cancer.
Mismong si Majority Leader at Ilocos Norte Rep. Rudy Fariñas ang naghain ng mosyon sa sesyon kahapon na agad namang inaprubahan ng plenaryo.
Nagsilbing kinatawan ng nasabing lalawigan ang may bahay ni dating Budget Secretary Florencio Butch Abad mula taong 2004 hanggang 2007 at mula 2010 hanggang sa sumakabilang buhay ito ngayong taon.
