Iniimbestigahan na ng mga awtoridad ang umano’y pagdukot sa dalawang lalaking kumakain sa isang resturant sa loob ng isang hotel sa Sta. Rosa, Laguna kagabi.
Kinilala ang mga dinukot na sina Allan Lumbres Fajardo at Ricky Atienza.
Si Fajardo ay dating pinuno ng Anti-Crime Group nang pinaslang na mayor ng Tanauan, Batangas na si Antonio Halili.
Ayon sa security guard ng nasabing restaurant, pumasok sa kainan ang mga armadong kalalakihang bumaba mula sa tatlong sasakyan, kinuha ang kanilang mga armas, pinadapa ang iba pang kumakain bago dumiretso sa puwesto ng mga biktima at kinaladkad ang mga ito.
Nakarekober naman ang mga awtoridad ng mga armas sa labas ng restaurant kung saan naiwan sa parking lot ang sasakyan ni Fajardo na iniimbestigahan na rin ng mga pulis.
Ang pangalan ni Fajardo ay kabilang sa drug matrix na iprinisinta ng PNP bilang pinuno ng grupong sangkot sa illegal drug trade.
(Ulat ni Jill Resontoc)
