Kinalampag na ng Senado ang Department of Finance (DOF) kaugnay sa patuloy na pagtaas ng presyo ng mga produktong petrolyo.
Ayon kay Senate Committee on Trade, Commerce and Entrepreneurship Chairman Koko Pimentel, panahon na para pag-aralang muli ng DOF ang epekto ng excise tax on oil provision ng TRAIN Law.
“Kung lahat ng assumptions at predictions namin noon ay mali siguro nga ay panahon na para tingnan nila ‘yan, i-propose nila kung kailangan bang suspend, reduce or repeal. Siyempre puwede ang individual congressman or senator, pero kagaya nga noon na kami ay nakinig sa Department of Finance, sila ang nag-depensa ng panukala, sila ang nagbigay ng figures, dapat sila rin ang manguna dito na mag-review kasi part sila ng executive branch.” Ani Pimentel
Pabor naman si Senate President Pro-Tempore Ralph Recto na suspendihin muna ang implementasyon ng naturang probisyon sa halip na suspendihin ang kabuuan ng TRAIN Law at dapat bumalangkas ang DOF ng implementing rules and regulations.
“Kung kailangan nilang gumawa ng IRR ay gawin na nila, automatic na agad, madali lang namang gumawa ng IRR eh, kayang gawin ‘yan o isulat in 30 minutes or an hour, puwedeng i-suspend ‘yung pagkolekta ng excise tax sa diesel at gasolina, palagay ko patuloy ang pagtaas niyan sa world market, it will also address inflation.” Dagdag ni Recto
Samantala, nananawagan si Senador JV Ejercito sa economic managers ni Pangulong Rodrigo Duterte na pag-aralan ang hirit na suspendihin ang excise tax sa langis upang mabawasan ang epekto ng pagtaas ng presyo ng mga pangunahin bilihin.
“Dapat pag-aralan o pag-isipan kung puwedeng momentarily i-suspend habang hindi pa nagno-normalize ang situation.” Pahayag ni Ejercito
(Usapang Senado Interview)
