Nakapagtala ang Department of Health (DOH) ng panibagong 816 na bagong kaso ng Omicron subvariant BA.5 sa Pilipinas.
Ayon kay Maria Rosario Vergeire, Officer-In-Charge ng DOH, lahat ng rehiyon sa bansa ay nakapagtala ng kaso ng BA.5 maliban sa Bangsamoro Region.
Sa naturang kaso, 686 ang gumaling na, 78 ang kasalukuyang nasa isolation at beneberipika pa ang 52 na natitira.
12 namang Returning Overseas Filipinos ang nagpositibo sa BA.5.
Maliban sa Omicron variant BA.5, nakapagtala rin ang DOH ng 42 kaso ng BA.4 at 52 kaso ng BA.2.12.1.
Sampu sa BA.4 variant ay nagmula sa Region 12, siyam sa Region 11, pito sa Region 6, tig-apat sa NCR at Region 5, tatlo sa Region 4-A At tig-isa sa CAR at BARMM.
Habang ang BA.2.12.1 ay na-detect sa Regions 3, 5, 6, 7, 9, 11, 12, 4a, CAR, CARAGA, at NCR.
