Inalmahan ng ilang senador ang pagtawag ni Pangulong Rodrigo Duterte ng “hero” kay Health Secretary Francisco Duque III dahil sa umano’y mahusay nitong pagtugon sa coronavirus disease 2019 (COVID-19) pandemic.
Ayon kay Senate President Vicente Sotto III, mga frontliners ang tunay na bayani sa paglaban sa COVID-19 pandemic.
Giit ni Sotto, opinyon lang ito ng pangulo ngunit para sa kaniya ang mga medical frontliners ang dapat na tawaging bayani na nakikibaka sa pandemya.
Sinabi naman ni Sen. Sherwin Gatchalian na team effort at hindi iisang tao lang ang may kakayahan at kumikilos para malaban natin ang COVID-19.
Marami aniyang bayani na tumutulong sa gobyerno sa COVID-19 response gaya nina vaccine czar Carlito Galvez, COVID-19 task force deputy chief implementer Vince Dizon at lahat ng medical frontliners.
Binigyang diin naman ni Sen. Kiko Pangilinan na sila-sila na lang nina Pangulong Duterte ang naniniwala na “hero” at mahusay ang pagtugon ni Duque sa COVID-19 pandemic. —ulat mula kay Cely Ortega-Bueno (Patrol 19)