Kinasuhan na ng kidnaping sa Panabo City Regional Trial Court ang self-confessed member ng Davao Death Squad na si Edgar Matobato.
Isinampa ang kaso noong Enero 19 o halos isang buwan matapos makitaan ng probable cause ni City Prosecutor Joseph Apao ang reklamong kidnapping laban kina Matobato at kapwa akusadong si Sonny Custodio.
Sina Matobato at Custodio ay itinuturong dumukot at pumatay sa umano’y teroristang si Salih Muck Doom sa Island Garden City of Samal noong November 9, 2000.
Tumayong complainant sa kaso ang live-in partner ni Muck Doom na si Mirasol Marquez.
Walang inirekomendang piyansa ang piskalya para sa pansamantalang paglaya ng mga akusado.
Nauna nang inamin ni Matobato ang pagdukot kay Muck Doom na sa kalaunan ay pinatay din at ibinaon sa isang quarry site sa Davao.
By: Mheann Tanbio / Bert Mozo
