Timbog ang isang dating alkalde at apat (4) na iba pa matapos mahulihan ng umano’y droga at sari-saring armas sa operasyon ng mga ahente ng PNP Special Action Force at Criminal Investigation and Detection Team sa bayan ng Arayat sa Pampanga.
Kinilala ni Chief Insp. Reynold Macabitas, hepe ng CIDT-3, ang mga nadakip na sina dating Arayat Mayor Luisito “Chito” Espino, Chairman Rosendo Dizon ng Barangay Cacutud, Romy Mallari , Rosauro Dillera Jr., at Cesar Peralta.
Ayon kay Macabitas, sinalakay ang bahay ni Espino sa Alonzo Subdivision sa barangay Cacutud sa bisa ng search warrant na inilabas ni judge Ana Marie Joson-Viterbo ng Cabanatuan City RTC.
Sinasabing si Espino ang lider ng Espino Criminal Gang na umano’y sangkot sa mga insidente ng robbery-hold-up, contract killing, gun-running at drug trade sa probinsya.
By Jelbert Perdez
