Nais ipabawi ni Senadora Grace Poe ang iginawad na Fernando Poe Jr. o FPJ Award for Excellence sa pelikulang Oro sa Metro Manila Film Festival o MMFF.
Ito’y makaraang lumutang ang balitang isang aso ang totoong pinatay habang ginagawa ang naturang pelikula.
Sa ipinalabas na pahayag ng Senadora, hiniling nito sa mga organizers ng MMFF na tingnang maigi ang nasabing usapin at alamin kung may nilabag na batas ang naturang pelikula.
Sakaling mapatunayang totoo, sinabi ni Senadora Poe na kanyang kinukondena ang naturang hakbang kaya’t kanyang isusulong na bawiin ang ibinigay na parangal sa nasabing pelikula na kalakip ang pangalan ng kanyang ama.
By Jaymark Dagala
