Nakabalik na sa kanyang lalawigan sa South Cotabato si Father Teresito Suganob, ang paring naging bihag ng Maute Terror Group nang kubkubin nito ang Marawi City noong Mayo 23.
Ayon kay Fr. Suganob, walang pagsidlan ang kaniyang kasiyahan na masilayan pang muli ang kaniyang home town matapos ang ilang buwang pagkakabihag ng mga terorista.
Dinumog naman ng kaniyang mga kababayan si Suganob na nagpapasalamat sa may kapal dahil sa tila milagrong pagkakaligtas nito mula sa bangungot na karanasan at ang muling pagbabalik nito sa kanilang piling.
Bukas naman inaasahang magsasagawa ng unang misa si Fr. Suganob mula nang mapalaya ito na sasabayan naman ng isang programa ng pamahalaang lokal ng Norala para sa pari.
—-
