Natawa na lamang ang Kapuso actor na Gabby Concepcion sa itinuring niyang ‘mistaken identity’ ni Pangulong Rodrigo Duterte sa kanya sa isang talumpati nito noong Miyerkules.
Nagbigay ng reaksyon si Gabby sa kanyang Instagram account kung saan sinabi nitong ‘We all make mistakes’.
Pabirong sinabi din nito sa Pangulo na, ‘Thankyou for watching ika 6 na Utos sir President’.
Nag-post din si Gabby gamit ang video ng isang eksena niya sa naturang afternoon soap ng Kapuso Network, na may caption na ‘Na ospital bigla dahil sa mistaken identity’.
Matatandaang aksidenteng nabanggit ang pangalan ng aktor sa talumpati ng Pangulo sa ika-120 anibersaryo ng DOJ o Department of Justice, kung saan sinabi ng Pangulo ang mga katagang, ‘Ikaw? Gabby Concepcion, mukha kang pera’.
Ang tinutukoy sa naturang bahagi ng talumpati ng Pangulo ay ang Chairman at CEO ng Kapamilya Network na si Gabby Lopez.
